🔯বঙাইগাঁৱত 'হৰ ঘৰ দস্তক ২.০ অভিযান'ৰ শুভাৰম্ভণি কৰিলে বিধায়ক ফণীভূষণ চৌধুৰীয়ে🔯

🔯বঙাইগাঁৱত 'হৰ ঘৰ দস্তক ২.০ অভিযান'ৰ শুভাৰম্ভণি কৰিলে বিধায়ক ফণীভূষণ চৌধুৰীয়ে🔯 

📝বঙাইগাঁওঃ ৬ জুনঃ ৰাজ্যৰ সকলো ক’ভিড-১৯  টিকাকৰণৰ বাবে যোগ্য ব্যক্তিৰ ১০০ শতাংশ টিকাকৰণ সম্পূৰ্ণ কৰিবলৈ ৰাজ্য চৰকাৰে “হৰ ঘৰ দস্তক ২.০” অভিযান আৰম্ভ কৰিছে। এই অভিযান সোমবাৰে অসমৰ আন আন জিলাৰ লগতে  বঙাইগাঁও জিলাতো শুভাৰম্ভণি কৰা হয় ৷ বঙাইগাঁও জিলাত এই অভিযানৰ শুভাৰম্ভণি কৰে বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীয়ে।এই উদ্দেশ্যে বঙাইগাঁও খণ্ড প্ৰাথমিক স্বাস্থ্য কেন্দ্ৰত আয়োজিত শুভাৰম্ভণি অনুষ্ঠানত বিধায়ক ফণীভূষণ চৌধুৰীৰ লগতে বঙাইগাঁও জিলাৰ উপায়ুক্ত নবদ্বীপ পাঠক, অতিৰিক্ত উপায়ুক্ত শ্যামল ক্ষেত্ৰ গগৈ, যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়, জিলা টিকাকৰণ বিষয়া ডা:পুস্পেন্দু দাস, জিলা আঁচনি প্ৰবন্ধক কৰুণা ব্ৰহ্ম,জিলা মিডিয়া এক্সপাৰ্ট জ্যোতিষা শইকীয়া, জিলা তথ্য আৰু জনসম্পৰ্কৰক্ষী বিষয়া বিনু ৰাণী ৰাজবংশী, মহকুমা চিকিৎসা তথা স্বাস্থ্য বিষয়া ডা:মহিবুল ইছলাম, খণ্ড প্ৰাথমিক স্বাস্থ্য  কেন্দ্ৰৰ আন আন চিকিৎসক সকল আৰু নাৰ্চ  সমন্বিতে অন্যান্য স্বাস্থ্যকৰ্মীসকল উপস্থিত থাকে ৷ বঙাইগাঁও জিলাত শুভাৰম্ভ কৰা "হৰ ঘৰ দস্তক ২.০ অভিযান"ৰ আৰম্ভণিতে বিধায়ক ফণীভূষণ চৌধুৰীয়ে কোভিডৰ প্ৰতিকাৰমূলক পালি টিকা গ্ৰহণ কৰে। 

ইপিনে অনুষ্ঠানত ভাষণ প্ৰসংগত বিধায়কগৰাকীয়ে কয় যে যদিও কোভিডৰ প্ৰকোপ কমিছে তথাপি আমি কোভিডৰ প্ৰতিষেধক টিকা তিনিও পালিয়েই লোৱা উচিত। এই ক্ষেত্ৰত সাংবাদিকসকলৰ গুৰু দায়িত্ব আছে বুলি কয় বিধায়কগৰাকীয়ে ৷ কিয়নো কোভিডৰ টিকাৰ প্ৰয়োজনীয়তাৰ বিষয়ত সাংবাদিকসকলেই সৰ্বসাধাৰণ ৰাইজক সজাগ কৰিব লাগিব। তদুপৰি এ এন এম নাৰ্চ আৰু আশাকৰ্মীসকলে কোভিডৰ প্ৰতিকাৰমূলক পালি টিকা বা ১২ বছৰৰ উৰ্ধৰ ল'ৰা-ছোৱালীৰ প্ৰথম পালি বা দ্বিতীয় পালি টিকা ল'বৰ বাবে তেওঁলোকক উৎসাহিত কৰিব লাগিব।এই অভিযানৰ অধীনত স্বাস্থ্যকৰ্মী বা সমাজৰ আগশাৰীৰ লোক, ১২ৰ উৰ্ধৰ ল'ৰা-ছোৱালী (প্ৰথম বা দ্বিতীয় পালি টীকা ল'বলৈ বাকী থকা), ১৮ বছৰৰ পৰা ৫৯ বছৰ বয়সৰ লোক (টিকা ল'বলৈ বাকী থকা) আৰু ৬০ বছৰৰ উৰ্ধৰ লোকসকলক কোভিডৰ প্ৰতিকাৰমূলক পালি টিকা দিয়াৰ বাবে ব্যৱস্থা গ্ৰহণ কৰা হৈছে।

আনহাতে অনুষ্ঠানত উপস্থিত থাকি জিলা উপায়ুক্ত নবদ্বীপ পাঠকে স্বাস্থ্যকৰ্মীসকলক বয়স অনুসৰি কোভিড টিকাৰ প্ৰথম পালি বা দ্বিতীয় পালি বা কোভিডৰ তৃতীয় পালি টিকা ঘৰে ঘৰে দিবলৈ যোৱাৰ সম্পৰ্কত স্বাস্থ্যকৰ্মীসকলক পৰিকল্পনা যুগুত কৰি ল'বলৈ আহ্বান জনায়। ৬ জুনৰ পৰা ২০ জুনলৈ  পষেকজোৰা অভিযান সফল কৰিবলৈ সৰ্বান্তকৰণেৰে কাম কৰিবলৈ স্বাস্থ্যকৰ্মী সকলক আহ্বান জনায় উপায়ুক্তগৰাকীয়ে। কোভিড টিকাৰ "হৰ ঘৰ দস্তক ২.০ অভিযান" শুভাৰম্ভণি অনুষ্ঠানত যুটীয়া স্বাস্থ্য সেৱা সঞ্চালকেও বক্তব্য ৰাখে আৰু উপস্থিত সকলোকে ধন্যবাদ জনায়। সভাৰ উদ্দেশ্য ব্যাখ্যা কৰে জিলা টিকাকৰণ বিষয়া পুস্পেন্দু দাসে। উল্লেখ্য যে  এই অভিযানৰ অধীনত  কোভিড-১৯ টিকাকৰণৰ বাবে যোগ্য হিতাধিকাৰীক অনুপ্রাণিত কৰিবলৈ স্বাস্থ্য কর্মীসকল ঘৰে ঘৰে যাব।🔯