🔯তৃতীয় পৰ্যায়ৰ বাহ্যিক মূল্যায়নৰ মূল্যায়নত চিৰাং জিলা উপায়ুক্ত নৰেন্দ্ৰ কুমাৰ শ্বাহৰ নিৰীক্ষণ🔯

🔯তৃতীয় পৰ্যায়ৰ বাহ্যিক মূল্যায়নৰ মূল্যায়নত চিৰাং জিলা উপায়ুক্ত নৰেন্দ্ৰ কুমাৰ শ্বাহৰ নিৰীক্ষণ🔯

📝কাজলগাঁওঃ ৩ জুন: তৃতীয় পৰ্যায়ৰ গুণোৎসৱ-২০২২ৰ  তৃতীয় দিনা শুকুৰবাৰে চিৰাঙৰ উপায়ুক্ত নৰেন্দ্ৰ কুমাৰ শ্বাহে চিৰাং জিলাৰ বিদ্যালয় সমূহৰ পৰিদৰ্শক বিজয় বৈষ্ণৱৰ সহযোগত একাংশ বিদ্যালয় পৰিদৰ্শন কৰে ৷ তৃতীয় দিনৰ বাবে বাহ্যিক মূল্যায়নৰ সময়ছোৱাত তেওঁ প্ৰথমে চিৰাং জিলাৰ হাতীপোতা আঞ্চলিক হাইস্কুল পৰিদৰ্শন কৰি প্ৰাতঃসভা আৰু বিভিন্ন কাৰ্যক্ৰম লগতে ছাত্ৰ ছাত্ৰীৰ শিক্ষাৰ মানদণ্ড আৰু বিদ্যালয়ৰ আন্তঃগাঁথনিৰ ওপৰত নিৰীক্ষণ কৰে। ঠিক তেনেদৰেই তেওঁ ২০৮ নং বাসুগাঁও ৰাজাচাৰাং প্ৰাথমিক বিদ্যালয় আৰু ২৪৮ নং বাসুগাঁও টাউন জে বি স্কুল পৰিদৰ্শন কৰি চলি থকা বাহ্যিক মূল্যায়ন কাৰ্য্যসূচীৰ বুজ লয় আৰু ছাত্ৰ-ছাত্ৰীৰ পঢ়া, লিখা আৰু সংখ্যা বিজ্ঞানৰ দক্ষতা, অভিভাৱকৰ অংশ গ্ৰহণ, বিনামূলীয়া ইউনিফৰ্ম আৰু পাঠ্যপুথি গ্ৰহণ, শিক্ষক আৰু ছাত্ৰ-ছাত্ৰীৰ উপস্থিতি, বিদ্যালয়ৰ শৌচাগাৰ আৰু পৰিষ্কাৰ-পৰিচ্ছন্নতা অৱস্থাৰ মূল্যাংকণ কৰে। তেওঁ মধ্যাহ্ন ভোজন প্ৰস্তুত কৰাটোও পৰ্যবেক্ষণ কৰে আৰু বাসুগাঁও  জে বি স্কুলৰ প্ৰাথমিক পৰ্যায়ৰ ছাত্ৰ- ছাত্ৰীৰ লগত একেলগ বহি মধ্যাহ্ন ভোজন গ্ৰহণ কৰি ইয়াৰ গুণগত মানদণ্ডৰ বুজ লয়। 

জিলাখনৰ ২০৮ নম্বৰ বাসুগাঁও ৰাজাচাৰাং প্ৰাথমিক বিদ্যালয় পৰিদৰ্শন কৰা সময়ত জিলা উপায়ুক্ত নৰেন্দ্ৰ কুমাৰ শ্বাহে সংবাদ মাধ্যমৰ আগত বিগত কৰ'না সৃষ্ট পৰিৱেশত জিলাখনৰ বিদ্যালয় সমূহৰ নিম্ন স্তৰত স্কুলীয়া লৰা-ছোৱালী সকলৰ পঢ়া শুনাত বিশেষ  ক্ষতি হোৱা নাই যদিও অষ্টম আৰু নৱম শ্ৰেণীৰ ছাত্ৰ ছাত্ৰী সকলৰ কিছু আঁসোৱাহ৷ৰৈ গৈছে বুলি মত ব্যক্ত কৰে ৷ এই গুণোৎসৱৰ জৰিয়তে শিক্ষাৰ্থীসকলৰ শিক্ষণ স্তৰ, শিক্ষণৰ ব্যৱধান, ছাত্ৰ ছাত্ৰী আৰু অভিভাৱক সকলৰ অভাৱ- অভিযোগ, বিদ্যালয়সমূহৰ আন্তঃগাঁথনিৰ প্ৰয়োজনীয়তা চিনাক্ত কৰি ভৱিষ্যতে সেইবোৰ সমস্যা সমাধান কৰিব পৰা যাব বুলিও তেওঁ মত ব্যক্ত কৰে ৷ জিলা খনৰ ভালে সংখ্যক বিদ্যালয়ত শিক্ষকৰ নাটনিৰ সমস্যা দূৰ কৰাৰ বাবে বিটিচি কৰ্তৃপক্ষই ব্যৱস্থা লৈ থকা হৈছে বুলি তেওঁ উল্লেখ কৰে ৷ উল্লেখযোগ্য যে, তৃতীয় পৰ্য্যায়ৰ গুণোৎসৱৰ তৃতীয় দিনা শুক্ৰবাৰে মুঠ ৩২৮ খন  বিদ্যালয়ত বাহ্যিক মূল্যায়ন অনুষ্ঠিত হয় আৰু অহাকালি তথা অন্তিম দিনা ২৫৭ খন বিদ্যালয়ত বাহ্যিক মূল্যায়ন অনুষ্ঠিত হ’ব । জিলা উপায়ুক্তৰ সৈতে বিদ্যালয় পৰিদৰ্শন কৰা চিৰাং জিলাৰ বিদ্যালয় সমূহৰ পৰিদৰ্শক বিজয় বৈষ্ণৱেও জিলাৰ বিদ্যালয় সমূহত শিক্ষকৰ নাটনিৰ সমস্যা দূৰ কৰাৰ বাবে বিটিচি প্ৰশাসনে শাৰিৰীক ভাৱে সুস্থ আৰু পাঠদান কৰিব বিচৰা অৱসৰ প্ৰাপ্ত শিক্ষকক নিয়োগ কৰাৰ প্ৰচেষ্টা কৰি থকা বুলি মন্তব্য কৰে ।🔯