🔯কৃত্রিম বানৰ কবলত বঙাইগাঁও চহৰঃ এছ ডি আৰ এফৰ উদ্ধাৰ অভিযান🔯

🔯কৃত্রিম বানৰ কবলত বঙাইগাঁও চহৰঃ এছ ডি আৰ এফৰ উদ্ধাৰ অভিযান🔯

📝বঙাইগাঁওঃ ১৬ জুন: পশ্চিম অসমৰ ব্যৱসায়িক চহৰ বঙাইগাঁৱত কৃত্ৰিম বানৰ সমস্যাই জটিলৰূপ ধাৰণ কৰিছে । কেইবাদিন ধৰি হৈ থকা  নেৰানেপেৰা বৰষুণত পঁচিশটা ৱাৰ্ডযুক্ত বঙাইগাঁও চহৰৰ মুখ্যপথ আৰু উপপথ সমূহত কৃত্রিম বানৰ সৃষ্টি হৈছে৷ উল্লেখ্য যে চহৰখনৰ ৯ নম্বৰ আৰু ১১ নম্বৰ ৱাৰ্ড দুটা সবাতকৈ অধিক কৃত্ৰিম বানৰ দ্বাৰা প্ৰভাৱিত হৈ আছে ৷ এইবাৰো তাৰ ব্যতিক্ৰম ন'হল ৷ কৃত্ৰিম বানত বিপযস্ত হৈ পৰিছে ৱাৰ্ড দুটাৰ আবাসীসকল ৷ পালপাৰা, বাবুপাৰাত  প্ৰায়ে হাহাকাৰ পৰিৱেশৰ সৃষ্টি হৈ আহিছে ধাৰাষাৰ বৰষুণ দিলে ৷ সেয়ে নেৰানেপেৰা বৰষুণত দি থকাৰ ফলত পালপাৰা, বাবুপাৰা অঞ্চলৰ বঙাইগাঁও পৌৰ সভাৰ অন্তৰ্গত ৯ আৰু ১১ নং ৱাৰ্ডৰ লোক সকল সম্প্ৰতি বানৰ কবলত পৰে ৷ বঙাইগাঁও জিলা প্ৰশাসনে বৃহস্পতিবাৰৰ পুৱাৰে পৰা এছ ডি আৰ এফৰ জোৱানসকলক উদ্ধাৰ কাৰ্যত নিয়োগ কৰি পালপাৰাত মুঠ ১৫ টা পৰিয়াল আৰু বাবুপাৰাত প্ৰায় ২০০ টা পৰিয়াল বান পানীৰ মাজত আবদ্ধ হৈ পৰাত তেওঁলোকক নাওৰে এছ ডি আৰ এফৰ জোৱান সকলে উদ্ধাৰ কৰি স্থানীয়  ১০৪৯ নং নেতাজী বিদ্যা নিকেতন প্ৰাথমিক বিদ্যালয়ত স্থাপন কৰা আশ্ৰয় শিবিৰত ৰখাৰ ব্যৱস্থা কৰে ৷  দিনৰ এক বজালৈ এছ ডি আৰ এফৰ তৰফৰ পৰা ১৩ গৰাকী পুৰুষ ,১৮ গৰাকী মহিলাৰ লগতে ৭ গৰাকী শিশুক উদ্ধাৰ কৰে ৷ বঙাইগাঁও জিলা প্ৰশাসনৰ তৰফৰ পৰা আশ্ৰয় শিবিৰত থকা লোক সকলক খাদ্য সামগ্ৰী যোগান ধৰাৰ লগতে চিকিৎসাৰ ব্যৱস্থা কৰে৷ ইপিনে অঞ্চলটোৰ স্থানীয় লোকে জানিব দিয়া মতে বঙাইগাঁও শ্মশানৰ ওচৰত থকা ৰে’ল পথৰ তলেৰে পানী নিষ্কাশনৰ ব্যৱস্থাটো সঠিক ৰূপত গঢ়ি  নুঠাত প্ৰতিবছৰে বাবুপাৰা, পালপাৰা বানৰ কবলত পৰে বুুলি অভিযোগ কৰে ৷ আনহাতে, ১৩ নম্বৰ ৱাৰ্ডৰ অন্তৰ্গত গুৰুনানক নগৰ, জ্যোতি নগৰ, দোলাইগাঁও উজান পাৰা, বঙাইগাঁও ষ্টেডিয়াম, আৰক্ষী ৰিজাৰ্ভৰ দক্ষিণ-পশ্চিমাংশ, ১২ নম্বৰ ৱাৰ্ডৰ অন্তৰ্গত কদমতলী-শালবাৰী (উত্তৰ আৰু দক্ষিণ), বিবেকানন্দ পল্লী, পাইপ লাইন, আদিৰ লগতে বৰপাৰা পাহাৰতলী, নতুনপাৰা, বঙাইগাঁও এঅচি ৰোডৰ বাঘেশ্বৰী মিষ্টান্ন ভাণ্ডাৰৰ সন্মুখ,বঙাইগাঁও আৰক্ষী অধীক্ষক কাৰ্যালয়ৰ সন্মুখ,উত্তৰ বঙাইগাঁৱৰ জাহ্নৱী হোটেলৰ পৰা পপুলাৰ বাছ আস্থানৰ মুখ্য পথ, উত্তৰ বঙাইগাঁৱস্থিত পেট্ৰ'ল পাম্প আদি এলেকা কৃত্রিম বানৰ কবলত পৰিছে। চহৰৰখনৰ উত্তৰৰ চাপাগুৰিৰ পৰা কদমতলী  (শালবাৰী), পালপাৰা হৈ বীৰঝৰা চাহ বাগানৰ সমীপৰ কুঁজিয়া নদীত মিলিত হোৱা টেকনঝৰাৰ বাঢ়নী পানী বহু লোকৰ গৃহত প্ৰৱেশ কৰাত তেওঁলোক সমস্যাৰ সন্মুখীন হৈছে । আশ্বৰ্যজনক যে, চহৰখনৰ অধিকাংশ উপপথত পানী নিস্কাশনৰ ব্যবস্থা নথকাত চহৰখনৰ ১২ নম্বৰ ৱাৰ্ড, ১৩ নম্বৰ ৱাৰ্ডৰ সম্ভ্ৰান্ত আৱাসীৰ ঘৰৰ চোতালৰ লগতে মাৰ্বল-টাইলচ লগোৱা লোকৰ আৱাস গৃহত পানী আবদ্ধ হৈ পৰাত অঞ্চলটোৰ লোকসকলক একপ্ৰকাৰ জলবন্দী কৰি ৰাখিছে।

ইপিনে চহৰখনৰ "চাপাগুৰি-উত্তৰ শালমাৰা(বীৰ চিলাৰায় পথ)" মুখ্য পথৰ দুয়োকাষে পকী নলা থাকিলেও নলাটোৰ পৰা অতিৰিক্ত পানী বিজ্ঞান সন্মতভাৱে নিস্কাশনৰ ব্যৱস্থা নথকাত ধাৰাষাৰ বৰষুণৰ সময়ত হোটেল জাহ্নবীৰ পৰা পপুলাৰ বাছ আস্থান এলেকাত পথত পানী হৈ পথচাৰী সকলক অসুবিধাত পেলাই আহিছে। অন্যহাতে, মূষলধাৰ বৰষুণৰ সময়ত মুখ্য নলাত পানী উফন্দি উঠি এডলীয়া অঞ্চল কদমতলী (শালবাৰী) হৈ এই পানী টেকনঝৰা জুৰিত পৰাত বহু বছৰ ধৰি কদমতলীবাসী কৃত্রিম বানৰ সমস্যাত ভূগি আহিছে৷ টেকনঝৰাৰ বাঢ়নি পানীৰ সোঁতে চহৰখনৰ পালপাৰা-বাবুপাৰাতো প্ৰতি বছৰে কৃত্ৰিম বানৰ সৃষ্টি কৰি আহিছে ৷ বঙাইগাঁও চহৰৰ দক্ষিণৰ বৰপাৰাৰ পাহাৰতলীত কৃত্রিম বানে অঞ্চলটোৰ লোকক জ্বলাকলা খুৱাইছে। কৃত্রিম বান পানীৰ কবলত পৰিছে বঙাইগাঁৱৰ নিউ কলনি এলেকা। লক্ষ্যণীয় নতুনপাৰা প্ৰাথমিক বিদ্যালয়, দোলাইগাঁও উজানপাৰা, নতুনপাৰা আদি বিস্তৃৰ্ণ এলেকাত চৌদিশে পানী জমা হৈ আছে । অন্যহাতে নতুনপাৰাৰ পৰা নিউবঙাইগাঁও কাৰ্বন ফেক্টৰীলৈ যোৱা পথেৰে বাগৰিছে পানী৷ উল্লেখ্য যে ধাৰাষাৰ বৰষুণৰ ফলত বিদ্যুৎ যোগাযো ব্যাহত হৈ পৰিছে ৷