🔯বঙাইগাঁৱৰ উত্তৰ শালমাৰাত কমতাপুৰ স্বায়ত্বশাসিত পৰিষদৰ সচিবালয় মুকলি🔯

🔯বঙাইগাঁৱৰ উত্তৰ শালমাৰাত কমতাপুৰ স্বায়ত্বশাসিত পৰিষদৰ সচিবালয় মুকলি🔯 

🔯বান পৰিস্থিতিৰ দোহাই দি উপস্থিত নাথাকিল ৰাজ্য চৰকাৰৰ এগৰাকীও মন্ত্ৰীঃ প্ৰতিক্ৰিয়া🔯 

📝বঙাইগাঁওঃ ৩০ জুনঃ কমতাপুৰ স্বায়ত্বশাসিত পৰিষদৰ সচিবালয় ভৱনটো আজি আনুষ্ঠানিকভাৱে মুকলি কৰা হয় ৷ বঙাইগাঁও জিলাৰ উত্তৰ শালমাৰাস্থিত অসম পৰ্যটন বিভাগৰ অধীনৰ প্ৰশান্তি ল'জত সদ্যহতে মুকলি কৰা অস্থায়ী সচিবালয় ভৱনটো বিজনী বিধান সভা সমষ্টিৰ বিধায়ক অজয় ৰায় ,কেএচিৰ অধ্যক্ষ হিতেশ্বৰ বৰ্মন, উপাধ্যক্ষ সুকেন ৰায়,কাৰ্যবাহী পাৰিষদ অতুল চন্দ্ৰ ৰায়, কৰ্মেশ্বৰ ৰায়, জীৱেশ ৰায়কে ধৰি অন্যান্য কাৰ্যবাহী পাৰিষদ, সাধাৰণ সদস্য আদিৰ উপস্থিতিত মুখ্য কাৰ্যবাহী পাৰিষদ গোকুল বৰ্মনে আনুষ্ঠানিকভাৱে ফিটা কাটি শুভ উদ্বোধন কৰে ৷ সচিবালয় মুকলি অনুষ্ঠানত প্ৰাক্তন বিধায়ক ভূপেন ৰায়, বিশিষ্ট সমাজকৰ্মী, বিভিন্ন দল - সংগঠনৰ প্ৰতিনিধি, বিশিষ্ট ব্যক্তি তথা ভালে সংখ্যক লোক উপস্থিত থাকে ৷ সচিবালয় ভৱন উদ্বোধন উপলক্ষে মাংগলিক অনুষ্ঠান, নাম- প্ৰসংগও অনুষ্ঠিত হয় ৷ সেইদৰে অনুষ্ঠিত হয় এখন সভাও ৷ সভাত বিধায়ক  অজয় ৰায়, কেএচিৰ মুখ্য কাৰ্যবাহী পাৰিষদ, অধ্যক্ষ, উপাধ্যক্ষ, কাৰ্যবাহী পাৰিষদসকল, সাধাৰণ সদস্যসকল, কেএচিৰ প্ৰধান সচিব ভাস্কৰজ্যোতি দাসৰ লগতে, আক্ৰাছুৰ বিষয়ববীয়া আৰু বিশিষ্ট ব্যক্তিসকলউপস্থিত থাকে ৷ সভাত বিভিন্নজনে বক্তব্যও ৰাখে ৷ ইপিনে সচিবালয় মুকলি কৰি কেএচিৰ মুখ্য কাৰ্যবাহী পাৰিষদ গোকুল বৰ্মনে সংবাদমাধ্যমৰ আগত কয় যে আজি আমি খুবেই আনন্দিত ৷ 

কমতাপুৰ  স্বায়ত্বশাসিক পৰিষদ গঠন হোৱাৰ পিচত বিভিন্ন কাৰণত পৰিষদৰ সচিবালয় মুকলি কৰিব পৰা নাছিলো যদিও এই দিনটোত মুকলি কৰাৰ বাবে সিদ্ধান্ত গ্ৰহণ কৰিছিলো আৰু চাৰিওফালে বান পৰিস্থিতিত ৰাইজে ককবকাই থাকিবলগীয়া হোৱা হেতুকে ধুমধাম আয়োজনৰ পৰিবৰ্তে অনুষ্টুপীয়াকৈ সচিবালয় ভৱনটো আনুষ্ঠানিকভাৱে উদ্ধোধন কৰা হ'ল ৷ এই অনুষ্ঠানলৈ বিভিন্ন জাতি - জনগোষ্ঠী তথা ধৰ্মালম্বী লোক আৰু দল - সংগঠনৰ প্ৰতিনিধি উপস্থিত হৈ উৎসাহ যোগোৱাৰ বাবে সকলোকে মুখ্য কাৰ্যবাহী পাৰিষগৰাকীয়ে ধন্যবাদ আৰু কৃতজ্ঞতা জনায় ৷ আনহাতে অসমৰ মুখ্যমন্ত্ৰী ডঃ হিমন্ত বিশ্ব শৰ্মাক ধন্যবাদ জ্ঞাপন কৰি মুখ্য কাৰ্যবাহী পাৰিষদ গোকুল বৰ্মনে কয় যে আজি কেৱল কমতাপুৰ স্বায়ত্বশাসিত পৰিষদৰ অন্তৰ্গত অধ্যূষিত অঞ্চলৰে নহয় বৰং গোটেই কোচ ৰাজবংশী বা বিভিন্ন জাতি জনগোষ্ঠীৰ মুখত আজি হাঁহিৰ ৰেঙণি দেখিবলৈ পাইছো ৷ এয়া সম্ভৱ হৈছে কেৱল একমাত্ৰ মুখ্যমন্ত্ৰী ডঃ হিমন্ত বিশ্ব শৰ্মাৰ বাবেই ৷ সেয়ে অনাগত দিনত কমতাপুৰ স্বায়ত্বশাসিত পৰিষদৰ সচিবালয়ৰ পৰা এই পৰিষদৰ অন্তৰ্গত অঞ্চলসমূহক সকলোকে লগত লৈ উন্নয়ন আৰু বিকাশ সাধন কৰিবলৈ আমি আগবাঢ়ি যাব পাৰো তাৰ বাবে সহায় - সহযোগিতা বিচাৰি থাকিম বুলিও কয় ৷ গতিকে আজিৰ দিনটোত আমি কমতাপুৰী ৰাইজ হিচাপে খুবেই আনন্দিত ৷ ইপিন অনুষ্ঠানলৈ ৰাজ্য চৰকাৰৰ মন্ত্ৰী ৰণজিৎ কুমাৰ দাস আৰু পীয়ুষ হাজৰিকাকে ধৰি কেইবাগৰাকীও মন্ত্ৰী উপস্থিত থকাৰ কথা আছিল যদিও শেষত এগৰাকীও মন্ত্ৰী উপস্থিত নথকা বিষয়টোৱে সকলোকে হতাশ কৰা পৰিলক্ষিত হয় ৷ আনকি অনুষ্ঠানত ৰাজ্য চৰকাৰৰ মন্ত্ৰী ৰণজিৎ কুমাৰ দাস আৰু পীয়ুষ হাজৰিকা উপস্থিত থাকিব বুলি আগদিনা মাইকযোগেও প্ৰচাৰ চলোৱা হৈছিল ৷ কিন্তু অনুষ্ঠানত কোনো এগৰাকী মন্ত্ৰীক উপস্থিত হোৱা দেখা নগ'ল ৷ যাৰ বাবে এই বিষয়টোকলৈ প্ৰতিক্ৰিয়াৰ সৃষ্টি হয় ৷ ইপিনে এই বিষয়ে মুখ্য কাৰ্যবাহী পাৰিষদগৰাকীক সাংবাদিকে প্ৰশ্ন কৰাত কয় যে ৰাজ্যত হৈ থকা বান পৰিস্থিতিৰ  পৰিপ্ৰেক্ষিতত বুধবাৰে মুখ্যমন্ত্ৰীৰ সৈতে এক টেলিফোনিক বাৰ্তালাপ হৈছিল ৷ এই বাৰ্তালাপৰ সময়ত মুখ্যমন্ত্ৰীগৰাকীয়ে কমতাপুৰ স্বায়ত্বশাসিত পৰিষদৰ সচিবালয়ৰ শুভ উদ্বোধনী অনুষ্ঠানলৈ শুভেচ্ছা জনায় ৷ লগতে এই বান পৰিস্থিতিৰ সময়ত অনুষ্ঠানটো ধুম- ধামেৰে আয়োজন কৰাৰ সলনি অনুষ্ঠুপীয়াকৈ কৰিবলৈ কয় আৰু পৰৱৰ্তী সময়ত তেওঁ অহাৰ প্ৰতিশ্ৰুতি প্ৰদান কৰে ৷ তেওঁ অহাৰ কথা আছিল যদিও চাৰিওফালে হৈ থকা বান পৰিস্থিতিৰ বাবে আহিব নোৱাৰিলে ৷ সেইদৰে মন্ত্ৰী পীয়ুষ হাজৰিকাও বানপানীকলৈ ব্যস্ত থাকিবলগীয়া হোৱাত তেওঁ আহিব নোৱাৰিলে ৷ আনহাতে মন্ত্ৰী ৰণঞ্জিৎ কুমাৰ দাস বুধবাৰে বঙাইগাঁওলৈ আহি পুনৰ বজালীলৈ যাবলগীয়া হৈছে বান পৰিস্থিতিৰ কাৰণে ৷ মন্ত্ৰী জয়ন্তমল্ল  বৰুৱাও অহাৰ কথা আছিল যদিও তেওঁ শিলচৰলৈ গৈ বানপীড়ত ৰাইজক সহায় সহযোগ আগবঢ়াই আছে ৷ অৱশ্যে জুলাই মাহৰ প্ৰথম সপ্তাহৰ ভিতৰত মন্ত্ৰী জয়ন্ত মল্ল বৰুৱা আহিব বুলি প্ৰতিশ্ৰুতি দিয়া বুলিও জানিবলৈ দিয়ে ৷ সেইদৰে কেএচিৰ বৰ্ষপূৰ্তি অনুষ্ঠানত মুখ্যমন্ত্ৰীকে ধৰি অন্যান্য মন্ত্ৰীক আমন্ত্ৰণ জনোৱাৰ সিদ্ধান্ত গ্ৰহণ কৰা বুলিও কয় ৷ কেএচিৰ দায়িত্বভাৰ গ্ৰহণ কৰি থকাসকলে অনুষ্ঠানত মন্ত্ৰী উপস্থিত নথকা কাৰণ হিচাপে বান পৰিস্থিতি বুলি উল্লেখ কৰিলেও মানি ল'ব খোজা নাই সচেতন মহলে ৷ ৰাজ্য চৰকাৰৰ ইমান কেইজন মন্ত্ৰী থকাৰ পিচতো প্ৰতিনিধি হিচাপে অন্তত এগৰাকী মন্ত্ৰী উপস্থিত থাকিব পাৰিলেহেতেন বুলি মন্তব্য কৰিছে ৷ ৰাজ্য চৰকাৰৰ এনে অনোভাৱক চৰকাৰে যে জনগোষ্ঠীটোক অৱহেলা কৰি আহিছে সেয়া উদঙাই দিয়া বুলিও সচেতন মহলে মন্তব্য কৰিছে ৷ তদুপৰি কেএচিৰ দায়িত্বপ্ৰাপ্তসকলে বিজেপি চৰকাৰৰ জয়গান গাই অহাৰ লগতে অনুষ্ঠানটো মুখ্যমন্ত্ৰী ডঃ হিমন্ত বিশ্ব শৰ্মা জিন্দাবাদ ধ্বনি দিয়াৰ পিচতো এগৰাকী মন্ত্ৰীকো অনুষ্ঠানত উপস্থিত কৰাবলৈ সক্ষম নোহোৱাত নিজৰ বিফলতাকে উদঙাই দিয়া বুলিও সচেতন মহলে মন্তব্য কৰিছে ৷ আনহাতে কেএচিৰ উপাধ্যক্ষ সুকেন ৰায়ে কয় যে আজি কমতাপুৰবাসী ৰাইজৰ বাবে এটা  ঐতিহাসিক দিন ৷ কমতাপুৰ স্বায়ত্বশাসিত পৰিষদ গঠন হোৱাৰ প্ৰায় দহ মাহ পিচত আমি নিজস্বভাৱে এটা কাৰ্যালয় পাবলৈ সক্ষম হৈছো ৷ কমতাপুৰ অঞ্চলৰ যিসকল ৰাইজে আমাৰ কাৰ্যবাহী পাৰিষদ, সাধাৰণ সদস্যসকলক লগ পাব বিচাৰে তেওঁলোকে ক'ত লগ পাব কোনো স্থায়ী ঠিকনা নাছিল ৷ কিন্তু এতিয়া এটা স্থায়ী ঠিকনা হিচাপে কেএচিৰ সচিবালয় ভৱনৰ শুভ উদ্বোধন হ'ল ৷ আনহাতে এই ঐতিহাসিক দিনটোত অসম চৰকাৰৰ মন্ত্ৰী উপস্থিত থাকিব লাগিছিল যদিও বানপানীৰ পৰিপ্ৰেক্ষিতত বিভিন্ন দায়িত্বত থকাৰ বাবে তেওঁলোকে আহিব নোৱাৰে বুলি পুৱা জনায় বুলি কৈ কয় যে যিহেতু বানপীড়িত ৰাইজৰ ওচৰত চৰকাৰৰ লগতে বিভিন্ন দল - সংগঠনে লাগি আছে, সেয়ে তেওঁলোক উপস্থিত হ'ব নোৱাৰিলে ৷  সেইদৰে কেএচিৰ অধ্যক্ষ হিতেশ্বৰ বৰ্মনে কয় যে কমতাপুৰবাসী কোচ ৰাজবংশী ৰাইজৰ লগতে বিভিন্ন ৰাইজ স্বতৰ্স্ফূতভাৱে আহিছে ৷ নামনি অসমৰ কমতাপুৰ স্বায়ত্বশাসিত পৰিষদে অঞ্চলটোত উন্নয়নৰ ৰেঙণি কঢ়িয়াই আনিব বুলি ৰাইজ নিশ্চয় আশাবাদী আৰু ৰাইজৰ আশাক আমি যাতে বাস্তৱায়িত কৰিব পাৰো তাৰ বাবে আমি সংকল্প লৈছো বুলিও কয় ৷ ইপিনে অনুষ্ঠানত আক্ৰাছুৰ এটা গোটক মূল গোট বুলি ঘোষণা কৰাৰ পিচতে আৰম্ভ হৈছে বিতৰ্কৰ ৷ সেইদৰে জাঙুৰ খাই উঠিছে আন গোট ৷ আক্ৰাছুৰ বলোৰাম বৰ্মন গোটে এক সংবাদ মেল অনুষ্ঠিত কৰি কয় যে আক্ৰাছুৰ বৰ্তমান কোনো মূল গোট নাই ৷ ৰাইজে সিদ্ধান্ত ল'ব কোনটো মূল গোট ৷ কেএচিৰ সচিবালয় মুকলি অনুষ্ঠানটো হ'ল এটা চৰকাৰী অনুষ্ঠান আৰু কেএচিৰ দায়িত্বপ্ৰাপ্তসকলো চৰকাৰী মানুহ ৷ সেয়ে চৰকাৰী এটা অনুষ্ঠানলৈ মাতি কেএচিৰ নেতৃবৃন্দই কোনোবা এটা গোটক আক্ৰাছুৰ মূল গোট বুলি স্বীকৃতি দিবলৈ ওলোৱা কাৰ্যক গৰিহণা আৰু ধিক্কাৰ দি  আক্ৰাছুৰ মাজত বিভাজন নানিবলৈকো সকিয়াই দিয়ে ৷ আনহাতে কেএচিৰ সচিবালয় মুকলি অনুষ্ঠানত ৰাজ্য চৰকাৰৰ এগৰাকীও মন্ত্ৰী উপস্থিত নথকাত আক্ৰাছুৱে ক্ষোভ প্ৰকাশ কৰে ৷ লগতে চৰকাৰে কেএচিৰ দায়িত্ব অৰ্পণ কৰাসকলৰ যোগ্যতাকলৈও আক্ৰাছুৰ নেতৃত্বই সন্দেহ প্ৰকাশ কৰি অচিৰে নিৰ্বাচন অনুষ্ঠিত কৰিবলৈকো দাবী জনায় ৷ উল্লেখ্য যে কেএচি গঠনৰ দিনাৰ পৰাই আৰম্ভ হোৱা বিতৰ্কৰ আজিও অৱসান ঘটা নাই ৷ সেয়ে কেএচিৰ দায়িত্বত থকাসকলে যদি ৰাইজ তথা স্বগোষ্ঠীয় দল - সংগঠনক আস্থা আৰু বিশ্বাসত লৈ সকলোৰে সৈতে আলাপ - আলোচনাৰ মাজৰে আগনাবাঢ়ে, তেতিয়াহলে পৰিষদখনে কমতাপুৰ স্বায়ত্বশাসিত অঞ্চলৰ কিমানদূৰ উন্নয়ন সাধিব পাৰিব তাকলৈ সন্দেহ আছে ৷🔯