🔯বঙাইগাঁৱত বিধায়ক ফণীভূষণ চৌধুৰী , প্ৰধান সচিব ড: জে বি এক্কা আৰু আয়ুক্ত সচিব আকাশ দীপৰ উপস্থিতিত অষ্টম আন্তঃ ৰাষ্ট্ৰীয় যোগ দিৱস পালন🔯

🔯বঙাইগাঁৱত বিধায়ক ফণীভূষণ চৌধুৰী , প্ৰধান সচিব ড: জে বি এক্কা আৰু আয়ুক্ত সচিব আকাশ দীপৰ উপস্থিতিত অষ্টম আন্তঃ ৰাষ্ট্ৰীয় যোগ দিৱস পালন🔯

📝বঙাইগাঁওঃ ২১ জুনঃ ৰাজ্যখনৰ আন আন প্ৰান্তৰ লগতে বঙাইগাঁও জিলাতো আজি তিনি ঠাইত বিশিষ্ট ব্যক্তিৰ উপস্থিতিত অষ্টম আন্তঃৰাষ্ট্ৰীয় যোগ দিৱস পালন কৰা হয়। এই উপলক্ষে বঙাইগাঁও জিলাৰ উপায়ুক্ত নবদ্বীপ পাঠকৰ দিহা পৰামৰ্শৰে জিলা প্ৰশাসন আৰু জিলা স্বাস্থ্য সমিতিৰ উদ্যোগত তথা বঙাইগাঁও জিলা পতঞ্জলি যোগ সমিতিৰ সহযোগত বঙাইগাঁও চহৰৰ গান্ধী ময়দানত আয়োজন কৰা যোগ দিৱসৰ অনুষ্ঠানৰ বন্তি প্ৰজ্বলনেৰে শুভাৰম্ভ কৰে  বিধায়ক ফণীভূষণ চৌধুৰীয়ে ৷ পুৱা ৭ বজাৰ পৰা আৰম্ভ হোৱা যোগ দিৱসৰ অনুষ্ঠানত ইয়াৰ পিছতে পতঞ্জলি যোগ সমিতিৰ দ্বাৰা এটি ভজন পৰিৱেশন কৰা হয় ৷ তাৰ পিছতে সমূহীয়া যোগ কাৰ্যসূচী আৰম্ভ হয় ৷ এই সমূহীয়া যোগ কাৰ্যসূচীত বিধায়ক ফণীভূষণ চৌধুৰী , জিলাৰ অতিৰিক্ত উপায়ুক্ত পংকজ চমুৱা , কে এ চিৰ মুখ্য কাৰ্যবাহী পাৰিষদ গোকুল বৰ্মন জিলাৰ যুটীয়া স্বাস্থ্য সেৱা সঞ্চালক ডাঃ পৰেশ কুমাৰ ৰয়, জিলা তথ্য আৰু জনসম্পৰ্কৰক্ষী বিষয়া বিনুৰাণী ৰাজবংশী, জিলা মিডিয়া বিশেষজ্ঞ জ্যোতিষা শইকীয়া,জিলা প্ৰশাসনৰ বিষয়া-কৰ্মচাৰী,আয়ুসুৰ বিষয়ববীয়াৰ লগতে বিশিষ্ট ব্যক্তি আৰু স্থানীয় পতঞ্জলি যোগ সমিতিৰ সদস্যসকলে অংশগ্ৰহণ কৰে ৷ ইপিনে যোগ কাৰ্যসূচীত অংশগ্ৰহণ কৰি বিধায়ক ফণীভূষণ চৌধুৰীয়ে কয় যে যোগৰ উপকাৰিতা আছে ৷ যদিহে নিয়মিতভাৱে যোগ কৰা হয় তেতিয়াহলে কিছু ৰোগৰ পৰা নিৰাময় লাভ কৰিব পাৰি ৷ সেয়ে আমি নিজকে সুস্থ ৰখাৰ বাবে যোগাভ্যাস কৰিব লাগে ৷ সমূহীয়া যোগৰ পিছতে প্ৰদৰ্শনীমূলক যোগ প্ৰদৰ্শন কৰা হয় ৷ 

আনহাতে বঙাইগাঁৱৰ বিদ্যাপুৰস্থিত ৰাজবাৰীতো জিলা প্ৰশাসনৰ উদ্যোগত অষ্টম আন্তঃৰাষ্ট্ৰীয় যোগ দিৱস পালন কৰা হয়। উল্লেখ্য যে বিদ্যাপুৰৰ ৰাজবাৰীত অনুষ্ঠিত আন্তঃৰাষ্ট্ৰীয় যোগ দিৱসৰ অনুষ্ঠানত বিশিষ্ট ব্যক্তি হিচাপে উপস্থিত থাকে অসম চৰকাৰৰ জনস্বাস্থ্য কাৰিকৰী বিভাগৰ আয়ুক্ত সচিব আকাশ দীপ। জিলা প্ৰশাসনৰ পৰা উপস্থিত থাকে অতিৰিক্ত উপায়ুক্ত শ্যামল ক্ষেত্ৰ গগৈ। আনহাতে জিলাখনৰ অভয়াপুৰীত মহকুমা পৰ্যায়ত অনুষ্ঠিত আন্তঃৰাষ্ট্ৰীয় যোগ দিৱসৰ অনুষ্ঠানত পঞ্চায়ত আৰু গ্ৰামোন্নয়ন বিভাগৰ প্ৰধান সচিব ডঃ জে বি এক্কা বিশিষ্ট ব্যক্তি হিচাপে উপস্থিত থাকে। ভাৰতৰ স্বাধীনতাৰ অমৃত মহোৎসৱৰ লগত সংগতি ৰাখি এই বছৰ ৰাজ্যখনৰ ৭৫ টা ঐতিহাসিক স্থানত আন্তঃৰাষ্ট্ৰীয় যোগ দিৱস উলহ-মালহেৰে পাতিবলৈ সিদ্ধান্ত গ্ৰহণ কৰিছিল ৰাজ্য চৰকাৰে। তাৰে ভিতৰত বঙাইগাঁৱৰ গান্ধী ময়দান, অভয়াপুৰী আৰু বিদ্যাপুৰৰ ৰাজবাৰীত ওপৰোক্ত বিশিষ্ট ব্যক্তিত্ৰয়ৰ উপস্থিতিত আন্তঃ ৰাষ্ট্ৰীয় যোগ দিৱস পালন কৰা হয় ৷বঙাইগাঁৱৰ খণ্ড উন্নয়ন বিষয়াৰ কাৰ্যালয়সমূহ আৰু গাঁও-পঞ্চায়ত কাৰ্যালয়সমূহতো আন্তঃৰাষ্ট্ৰীয় যোগ দিৱস পালন কৰা হয়।🔯