🔯বঙাইগাঁৱত বানৰ ক্ষয়-ক্ষতিৰ বুজ ল'লে মন্ত্ৰী ৰণজিৎ কুমাৰ দাসে🔯

🔯বঙাইগাঁৱত বানৰ ক্ষয়-ক্ষতিৰ বুজ ল'লে মন্ত্ৰী ৰণজিৎ কুমাৰ দাসে🔯 

📝বঙাইগাঁওঃ ২৯ জুনঃ অসম চৰকাৰৰ পঞ্চায়ত, গ্ৰামোন্নয়ন তথা যোগান, সাধাৰণ প্ৰশাসন, আইন আৰু ন্যায় বিভাগৰ মন্ত্ৰী ৰণজিৎ কুমাৰ দাসে বঙাইগাঁও জিলাত যোৱা দুসপ্তাহ ধৰি হোৱা প্ৰথমটো বানত জিলাখনৰ ক্ষয়-ক্ষতিৰ বুজ লোৱাৰ নিমিত্তে বুধবাৰে জিলাখনত উপস্থিত হৈ পৰ্যালোচনা কৰে ৷ উল্লেখ্য যে বাৰিষাৰ প্ৰথম ঢৌতে বানাক্ৰান্ত হয় বঙাইগাঁও জিলাৰ বহু গাঁও। একেধাৰে কেবাদিন ধৰি হোৱা বৰষুণ আৰু ভূটানৰ কুৰিশ্বু বান্ধৰ পৰা এৰি দিয়া পানীৰ বাবে আই আৰু মানাহ নদীৰ জলপৃষ্ঠ ওফন্দি উঠি বানৰ কৱলত পৰে বঙাইগাঁও জিলাৰ ৩৫০ৰো অধিক ৰাজহ গাঁও। তাৰফলত বানাত আক্ৰান্ত হয় গাঁওসমূহৰ লোকসকল। তাৰ পিচতে যোৱা ২১ জুনত মন্ত্ৰী দাসে জিলাখনৰ বানাক্ৰান্ত অঞ্চল পৰিদৰ্শন কৰিছিল। ইয়াৰ পিচতে বুধবাৰে  বঙাইগাঁও জিলাৰো অভিভাৱক মন্ত্ৰী দাসে বঙাইগাঁও জিলাত পুনৰ উপস্থিত হৈ বানপানীত হোৱা ক্ষয়-ক্ষতিৰ বুজ লোৱাৰ অৰ্থে জিলা উপায়ুক্তৰ সভাকক্ষত বিষয়াসকলৰ লগত এক পৰ্যালোচনা সভাত মিলিত হয়। জিলা উপায়ুক্ত নবদ্বীপ পাঠক, জিলা পৰিষদৰ অধ্যক্ষ বিজয় সিংহ, বঙাইগাঁও পৌৰসভাৰ অধ্যক্ষ সুবোধ চন্দ্ৰ দাস, জিলা পৰিষদৰ মুখ্য কাৰ্যবাহী বিষয়া, জিলা আৰক্ষী অধীক্ষক,জিলা উন্নয়ন আয়ুক্ত, অতিৰিক্ত উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ মুখ্য কাৰ্যবাহী বিষয়া, চক্ৰ বিষয়াসকল, বিভিন্ন বিভাগৰ জিলা পৰ্যায়ৰ মুৰব্বী বিষয়াসকল,খণ্ড উন্নয়ন বিষয়াসকলৰ উপস্থিতিত অনুষ্ঠিত পৰ্যালোচনা সভাত মন্ত্ৰী ৰণজিৎ কুমাৰ দাসে বিভাগীয় ক্ষয়-ক্ষতিৰ বুজ লয়। উপায়ুক্ত নবদ্বীপ পাঠকে মন্ত্ৰী দাসৰ সন্মুখত  জিলাখনত বানত হোৱা ক্ষয়-ক্ষতিৰ এক চমু আভাস দাঙি ধৰে আৰু বানপানীৰ সময়ত জিলা প্ৰশাসন,জিলা দুৰ্যোগ ব্যৱস্থাপনা প্ৰাধিকৰণ,  জলসম্পদ বিভাগ,অগ্নি আৰু আপাতকালীন সেৱা, এন ডি আৰ এফ, এছ ডি আৰ এফ, জনস্বাস্থ্য কাৰিকৰী বিভাগ, স্বাস্থ্য বিভাগ, লোকনিৰ্মাণ, পশুপালন আদি বিভাগে কেনেদৰে বানাক্ৰান্তক উদ্ধাৰ কৰিলে,  কেনেদৰে আশ্ৰয় শিবিৰত ৰাখিলে, সাহায্য শিবিৰৰ ব্যৱস্থা কৰিলে আৰু ৰিলিফ সামগ্ৰী দিলে, মথাউৰি ভাঙি নোযোৱাৰ ব্যৱস্থা কৰিলে, বানাক্ৰান্তক বিশুদ্ধ খোৱাপানী আৰু অনাময় ব্যৱস্থা কৰিলে, জীৱ-জন্তুবিলাকক বানৰ কবলৰ পৰা উদ্ধাৰ কৰি পশুখাদ্য যোগান ধৰিলে, শিশু-গৰ্ভৱতী মহিলা আৰু মাতৃদুগ্ধ পান কৰি থকা শিশু থকা মহিলাৰ বিশেষ যত্ন ল'লে সেই আটাইবোৰ সম্পৰ্কত মন্ত্ৰী দাসক  উপায়ুক্তগৰাকীয়ে অৱগত কৰে। 

মন্ত্ৰী ৰণজিৎ কুমাৰ দাসে জিলাখনত বানৰ সময়ত জিলা প্ৰশাসন তথা আন আন বিভাগবিলাকে কৰা কামবোৰত সন্তুষ্টি প্ৰকাশ কৰে আৰু ধন্যবাদ জনায়। তেওঁ কৃষি বিভাগৰ বিষয়াক কয় যে কোনো কাৰণতে কৃষকসকলে শালিধানৰ কঠিয়াৰ অভাৱ পাব নালাগে। লাগিলে কৃষি বিভাগে জিলাখনত যি ৭০ হেক্টৰ কৃষিভূমিত কঠিয়াৰ কমিউনিটি নাৰ্ছাৰীৰ ব্যৱস্থা কৰাৰ কথা কৈছে তাতকৈ বেছিকৈয়ে কৰক বুলি মন্ত্ৰীগৰাকীয়ে কয়।কৃষকসকলেই দেশৰ উন্নতিৰ মূল বুলি মন্ত্ৰীগৰাকীয়ে দোহাৰে। স্বাস্থ্য বিভাগে বানপানীৰ পিছত অনুষ্ঠিত কৰিবলগীয়া মেগা স্বাস্থ্য শিবিৰৰ বিষয়ে যুটীয়া স্বাস্থ্য সেৱা সঞ্চালকে জানিবলৈ দি কয় যে প্ৰতিটো উন্নয়ন খণ্ডতে অন্তত তিনিটাকৈ মেগা স্বাস্থ্য শিবিৰ অনুষ্ঠিত কৰা হ'ব। সেইদৰে পশুপালন বিভাগে জনায় যে পশুধনৰ বাবে বৰ্তমানেও শিবিৰ অনুষ্ঠিত কৰি থকা হৈছে আৰু  বানপানীৰ বতৰ শেষ হোৱাৰ সময়তো শিবিৰ পতা হ'ব।🔯