🔯কামৰূপ জিলাৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাৰ স্থান প্ৰাপ্ত সকলক সম্বৰ্দ্ধনা জনালে জিলা প্ৰশাসনে

🔯কামৰূপ জিলাৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাৰ স্থান প্ৰাপ্ত সকলক সম্বৰ্দ্ধনা জনালে জিলা প্ৰশাসনে

📝কামৰূপ আমিনগাওঁঃ ৩০ জুন:- আমিনগাওঁস্থিত সংহত উপায়ুক্ত কাৰ্যালয়ৰ সভাকক্ষত বৃহস্পতিবাৰে কামৰূপ জিলা প্ৰশাসন আৰু কামৰূপ জিলা শিক্ষা বিভাগৰ উদ্যোগত আয়োজিত এক অনুষ্ঠানত সদ্যঘোষিত হাইস্কুল শিক্ষান্ত আৰু উচ্চতৰ মাধ্যমিক পৰীক্ষাত জিলাখনৰ বিভিন্ন শিক্ষানুষ্ঠানৰ পৰা স্থান প্ৰাপ্ত ৫ গৰাকী ছাত্ৰ-ছাত্ৰীক বিশেষভাৱে সম্বৰ্দ্ধনা জনোৱা হয়। উল্লেখ্য যে হাইস্কুল শিক্ষান্ত পৰীক্ষাত গৰৈমাৰীৰ আল-অমিন ইছলামিক মডে’ল স্কুলৰ ছাত্ৰ তবিবুল হকে নৱম স্থান লাভ কৰি জিলাখনলৈ গৌৰৱ কঢ়িয়াই আনিছে। তদুপৰি উচ্চতৰ মাধ্যমিক চূড়ান্ত পৰীক্ষাৰ ক’লা শাখাত ৰামানুজন একাডেমিৰ পৰা সাধনা দেৱীয়ে প্ৰথম স্থান তথা উক্ত বিদ্যালয়ৰ নিখিল দাসে অষ্টম স্থান লাভ কৰাৰ উপৰি গেটৱে একাডেমীৰ ৰ’জি ৰৌচনে ষষ্ঠ স্থান লাভ কৰি জিলাখনৰ জনসাধাৰণক গৌৰৱান্বিত হোৱাৰ সুযোগ প্ৰদান কৰিছে। ইয়াৰ উপৰি উচ্চতৰ মাধ্যমিক পৰীক্ষাৰ বিজ্ঞান শাখাত জিলাখনৰ দমদমা উচ্চতৰ মাধ্যমিক বিদ্যালয়ৰ পৰা পৰীক্ষাত অৱতীৰ্ণ হৈ দেৱব্ৰত কলিতাই সপ্তম স্থান দখল কৰিবলৈ সক্ষম হৈছে। আজি এই আটাইকেইগৰাকী মেধাৱী ছাত্ৰ-ছাত্ৰীক জিলা প্ৰশাসন তথা কামৰূপ জিলা শিক্ষা বিভাগৰ তৰফৰ পৰা তেওঁলোকৰ উজ্বল ভৱিষ্যত কামনা কৰি সম্বৰ্দ্ধনা জনোৱাৰ উপৰি তেওঁলোকৰ শিক্ষানুষ্ঠানৰ মূৰব্বী তথা অভিভাৱক সকলোকো সম্বৰ্দ্ধনা জনোৱা হয়। একেটা অনুষ্ঠানতে জিলাখনৰ ১৪খন শিক্ষানুষ্ঠানৰ মুৰব্বী তথা বিদ্যালয় পৰিচালনা সমিতিৰ বিষয়ৱবীয়াক স্বচ্ছ বিদ্যালয়ৰ পুৰস্কাৰৰ মান-পত্ৰ প্ৰদান কৰা হয়।

কামৰূপ জিলাৰ বিদ্যালয় সমূহৰ পৰিদৰ্শক তথা জিলা প্ৰাথমিক শিক্ষা বিষয়া অপূৰ্ব ঠাকুৰীয়াই আদৰণী ভাষণেৰে আৰম্ভ কৰা এই অনুষ্ঠানত জিলা উপায়ুক্ত কৈলাশ কাৰ্তিক এনে কৃতী ছাত্ৰ-ছাত্ৰী সকলে জিলাখনৰ জনাসাধাৰণক গৌৰৱান্বিত কৰিছে বুলি কয়। তেখেতে ছাত্ৰ-ছাত্ৰী সকলক জ্ঞান আহৰণৰ বাবে যিমান পাৰি পুথি অধ্যয়ন কৰাৰ উপৰি সমাজৰ বিভিন্ন ক্ষেত্ৰৰ জনসাধাৰণৰ লগত মত-বিনিময় তথা যথাসম্ভৱ বিভিন্ন স্থান ভ্ৰমণ কৰাৰ বাবে উপদেশ দিযে। এনে কাৰ্যই তেওঁলোকৰ জ্ঞানৰ পৰিধি বৃদ্ধি কৰি নিজকে ভৱিষ্যতে এগৰাকী সুনিপুণ ব্যক্তি হিচাপে গঢ়ি তোলাৰ দিশত সহায় কৰিব বুলি তেঁও মন্তব্য  কৰে। তেওঁ লগতে শিক্ষাৰ বাবে প্ৰযুক্তি  প্ৰয়োগৰ প্ৰয়োজনীয়তাৰ কথা দোহাৰি এই প্ৰযুক্তি প্ৰয়োগৰ দিশত সচেতনতাৰে আগবঢ়াৰ বাবেও উপদেশ দিযে। ভাষণ প্ৰসঙ্গত তেখেতে বিভিন্ন প্ৰতিযোগিতামূলক পৰীক্ষাত অৱতীৰ্ণ হোৱাৰ দিশত সহায়ক হোৱাকৈ মুখ্যমন্ত্ৰী ড০ হিমন্ত বিশ্ব শৰ্মাই ‘আৰোহণ’ নামৰ এক কায্যসূচীৰ সূচনা কৰাৰ বাবে পদক্ষেপ লৈ আছে বুলিও তেঁও কয়।

অনুষ্ঠানত মুখ্য অতিথি হিচাপে উপস্থিত থাকি ভৰতীয় প্ৰযুক্তি প্ৰতিষ্ঠান, গুৱাহাটীৰ অধ্যাপক কেয়ুৰ চ’ৰাথিয়াই ছাত্ৰ-ছাত্ৰী সকলক উদ্দেশ্যি কয় যে- এয়া তেওঁলোকৰ জীৱনৰ আৰম্ভণিহে। সমগ্ৰ জীৱনজুৰি এই সাধনাত ব্ৰতী হৈ তেওঁলোকে ভৱিষ্যতে আৰু অধিক সফলতাৰ উচ্চ শিখৰত আৰোহণ কৰিবলৈ সক্ষম হব বুলিও তেওঁ কয়।অনুষ্ঠানত বিশিষ্ট অতিথি হিচাপে উপস্থিত থাকি ভাৰতীয় প্ৰশাসনিক সেৱাৰ অৱসৰপ্ৰাপ্ত বিষয়া তথা লেখক থানেশ্বৰ মালাকাৰে কামৰূপ জিলাৰ বাসিন্দা হিচাপে আজি তেওঁ গৌৰৱবোধ কৰিছে বুলি ব্যক্ত কৰাৰ লগতে কৃতী ছাত্ৰ-ছাত্ৰী সকলক সফলতাৰ পথেৰে আগবাঢ়ি যোৱাৰ কামনা কৰাৰ লগতে সফলতাৰ উচ্চ শিখৰত অৱতৰণ কৰাৰ সময়তো নিজৰ মূল শিপাডালৰ পৰা কোনো দিনে বিচ্ছিন্ন নহবলৈ আহ্বান জনায়৷৷অনুষ্ঠানত বিশিষ্ট শিক্ষাবিদ পৰেশ বৈশ্য তথা অন্যান্য অতিথি সকলে ভাষণ প্ৰদান কৰাৰ উপৰি কৃতী ছাত্ৰ-ছাত্ৰী সকলেও নিজৰ মনোভাৱ ব্যক্ত কৰে। অনুষ্ঠানত অতিৰিক্ত উপায়ুক্ত কমল  বৰুৱা, কামৰূপ জিলা সাংবাদিক সন্থাৰ সভাপতি মধুসুধন মেধি, বিভিন্ন বিদ্যালয়ৰ প্ৰধান, জেষ্ঠ সাংবাদিক, বিদ্যালয় পৰিচালনা সমিতিৰ বিষয়ৱবীয়াকে ধৰি বহু গণ্য-মান্য ব্যক্তি উপস্থিত থাকে🔯