🔯পৃথক কমতাপুৰ - জনজাতিকৰণৰ দাবীত পুনৰ আন্দোলনমুখী হৈছে কোচ ৰাজবংশী সংগঠন🔯

🔯পৃথক কমতাপুৰ - জনজাতিকৰণৰ দাবীত পুনৰ আন্দোলনমুখী হৈছে কোচ ৰাজবংশী সংগঠন🔯 

🔯জাতীয় পৰিষদৰ আন্দোলনৰ কাৰ্যসূচী ঘোষণা🔯

🔯২৫ জুলাইত ৮ ঘন্টীয়া বৃহত্তৰ কমতাপুৰ অঞ্চলত সৰ্বাত্মক বন্ধ, ২  আগষ্টত ১২ ঘণ্টীয়া সৰ্বাত্মক পথ বন্ধৰ আহ্বান

🔯অন্তৰ্ৱৰ্তীকালীন কমতাপুৰ স্বায়ত্বশাসিত পৰিষদ ভংগৰ দাবী🔯

📝বঙাইগাঁওঃ ১১ জুলাইঃ পুনৰ আন্দোলনমুখী হৈছে কোচ ৰাজবংশী জনগোষ্ঠীয় সংগঠন ৷ কেৱল ধৰ্ণা ,স্মাৰক পত্ৰ প্ৰদান কাৰ্যসূচীতে সীমাবদ্ধ নাথাকি ঘোষণা কৰিছে বন্ধৰ দৰে কাৰ্যসূচীও ৷ শেহতীয়াভাৱে পৃথক কমতাপুৰ ৰাজ্য গঠন আৰু কোচ ৰাজবংশী জনগোষ্ঠীটোক জনজাতিকৰণৰ দাবীত অহা ২৫ জুলাইৰ পুৱা ৬ বজাৰ পৰা ২ বজালৈ ৮ ঘন্টীয়া বৃহত্তৰ কমতাপুৰ অঞ্চলত সৰ্বাত্মক বন্ধ কাৰ্যসূচীৰ আহ্বান দিছে কোচ ৰাজবংশী জাতীয় পৰিষদে ৷ উল্লেখ্য যে কমতাপুৰ স্বায়ত্বশাসিত পৰিষদ গঠনৰ জৰিয়তে কোচ ৰাজবংশী জনগোষ্ঠীৰ দীৰ্ঘদিনীয়া কমতাপুৰ ৰাজ্য পুনৰ গঠন আৰু জনজাতিকৰণৰ আন্দোলনক প্ৰশমিত কৰি ৰাখিব পাৰিব বুলি শাসনাধিষ্ঠিত বিজেপি চৰকাৰে ভাবিছিল যদিও সেয়া যে সম্ভৱ নহ'ব তাৰ উমান জনগোষ্ঠীটোৰ বিভিন্ন সংগঠনে শেহতীয়াভাৱে পুনৰ আন্দোলনমুখী হোৱা বিষয়টোৱে প্ৰমাণ কৰিছে ৷ কাৰণ চৰকাৰে কতাপুৰ স্বায়ত্বশাসিত পৰিষদ গঠনৰ সিদ্ধান্ত ঘোষণা কৰাৰ পিচৰে পৰা জনগোষ্ঠীটোৰ আন্দোলনৰ গতি স্তবিৰ হৈ পৰিছিল ৷ কিন্তু সময় উকলি যোৱাৰ লগে লগে যেন কমতাপুৰ স্বায়ত্বশাসিত পৰিষদখনে যে জনগোষ্ঠীটোৰ বিশেষ কোনো উন্নতি সাধিব নোৱাৰে সেয়া জনগোষ্ঠীটোৰ সচেত মহলৰ লগতে একাংশ সংগঠনে বুজি উঠিব ধৰিছে ৷ যাৰ ফলত পুনৰ আন্দোলনমুখী হ'বলৈ ধৰিছে জনগোষ্ঠীটোৰ একাংশ সংগঠন ৷ ঘোষণা কৰিছে এলানি আন্দোলনৰ কাৰ্যসূচী ৷ সোমবাৰে বৃহত্তৰ বঙাইগাঁও প্ৰেছ ক্লাবত কোচ ৰাজবংশী জাতীয় পৰিষদৰ সাধাৰণ  সম্পাদক বিশ্বজিৎ ৰায়ে এক সংবাদমেল সম্বোধন কৰি কোচ বাজবংশী জাতীয় পৰিষদৰ  ১০ জুলাত সিদলসতী জগদ্ধাত্ৰী মন্দিৰ প্ৰেক্ষাগৃহত পৰিষদৰ সভাপতি বিমল কুমাৰ বৰ্মনৰ সভাপতিত্বত অনুষ্ঠিত কাৰ্যনিৰ্বাহক সভাত গৃহীত প্ৰস্তাৱৰ বিষয়ে সদৰি কৰে । কোচ ৰাজবংশী জাতীয় পৰিষদৰ কাৰ্যনিৰ্বাহক সভাত হোৱা সিদ্ধান্তৰ বিষয়ে সদৰি কৰি কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ে অসম আৰু কেন্দ্ৰত বিজেপিৰ ডাবল ইঞ্জিন যুক্ত চৰকাৰ থকা সত্বেও কোচ ৰাজবংশী জনগোষ্ঠীৰ আত্মনিয়ন্ত্ৰণৰ অধিকাৰ আৰু জনজাতিকৰণৰ বিষয়টো ওলোমাই ৰাখি জনগোষ্ঠীটৌক চৰমভাবে প্ৰতাৰণা কৰাৰ লগতে নিঃশেষ কৰাৰ ষড়যন্ত্ৰত লিপ্ত হোৱা বুলি ক্ষুৰধাৰ  সমালোচনা কৰে । ৰায়ে সাংবাদিক মেলত অসম চৰকাৰ আৰু কেন্দ্ৰীয় চৰকাৰক কোচ ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ সুনিশ্চিত কৰিবলৈ দাবী জনাই তৎকালেই ৰাজ্য চৰকাৰ আৰু কেন্দ্ৰীয় চৰকাৰক আগবাঢ়ি আহিবলৈ সজোৰে আহ্বান জনোৱাৰ লগতে এলানি আন্দোলনৰ কাৰ্যসূচীও ঘোষণা কৰে ৷ 

ঘোষিত আন্দোলনৰ কাৰ্যসূচী অনুসৰি পৰিষদে সুকীয়া কমতাপুৰ ৰাজ্য গঠন আৰু জনগোষ্ঠীটোক জনজাতিকৰণৰ দাবীত অহা ২৫ জুলাইৰ পুৱা ৬ বজাৰ পৰা ২ বজালৈ ৮ ঘন্টীয়া বৃহত্তৰ কমতাপুৰ অঞ্চলত সৰ্বাত্মক বন্ধ, ২  আগষ্টৰ পুৱা ৫ বজাৰ পৰা বিয়লি ৫ বজালৈ ১২ ঘণ্টীয়া সৰ্বাত্মক পথ বন্ধৰ আহ্বান জনোৱাৰ লগতে ১০ আগষ্টত ভবিষ্যৎ কাৰ্যপন্থা গ্ৰহণাৰ্থে বঙাইগাঁও চহৰত কোচ ৰাজবংশী জনগোষ্ঠীৰ বুদ্ধিজীৱি আৰু শিক্ষাবিদক লৈ এখন অভিৱৰ্তন অনুষ্ঠিত কৰিব বুলি সদৰি কৰে । সংবাদ মেলত কোচ ৰাজবংশী জাতীয় পৰিষদৰ সাধাৰণ সম্পাদক বিশ্বজিৎ ৰায়ে কেএলঅ ৰ দ্বাৰা উত্থাপিত কমতাপুৰ ৰাজ্য গঠনৰ দাবীটোক শান্তিপূৰ্ণ স্থায়ী সমাধানকল্পে কেন্দ্ৰীয় চৰকাৰ, অসম চৰকাৰ আৰু পশ্চিম বংগ চৰকাৰক উচ্চস্তৰীয় এক ঘূৰণীয়া বৈঠক অনুষ্ঠিত কৰিবলৈও দাবী জনায় ৷ লগতে  অচিৰেই অন্তৰ্ৱৰ্তীকালীন কমতাপুৰ স্বায়ত্ত্বশাসিত পৰিষদ ভংগ কৰি অবিভক্ত গোৱালপাৰা জিলাৰ খিলঞ্জীয়া কোচ ৰাজবংশী সকলক ভৈয়াম জনজাতিকৰণৰ মৰ্যাদা প্ৰদান কৰি ষষ্ঠ অনুসূচীত অন্তৰ্ভূক্ত কমতাপুৰ টেৰিটৰিয়েল কাউন্সিল গঠন কৰিবলৈ কোচ ৰাজবংশী জাতীয় পৰিষদে সংবাদমেলৰ জৰিয়তে কেন্দ্ৰীয় আৰু অসম চৰকাৰক এক বাৰ্তা প্ৰেৰণ কৰে । সংবাদ মেলত সাধাৰণ সম্পাদক বিশ্বজিৎ ৰায়ে কয় যে কমতাপুৰ স্বায়ত্বশাসিত পৰিষদখনে কোচ ৰাজবংশী জনসাধাৰণৰ বিকাশ আৰু সামগ্ৰীক উন্নয়নৰ কাৰণে যিদৰে কাম কৰিব লাগিছিল সেয়া দেখা পোৱা নগ'ল ৷ 

সেইদৰে ৰাজ্য চৰকাৰখনে আৰ্থিক পেকেজ ঘোষণা কৰিব লাগিছিল আজিলৈকে ঘোষণা নকৰিলে ৷ আনকি ৩০ জুনত কেএচিৰ সচিবালয় মুকলি অনুষ্ঠানত দৃষ্টিকটুভাৱে মুখ্যমন্ত্ৰীৰ কথা বাদেই বৰং এগৰাকী মন্ত্ৰীও উপস্থিত নহ'ল ৷ ইয়াৰ জৰিয়তে এই পৰিষদখন যে এখন কেৱল নাম মাত্ৰ পুতলা সদৃশ পৰিষদ আৰু এই পৰিষদখনৰ জৰিয়তে যে কোচ ৰাজবংশী জনগোষ্ঠীৰ বিকাশ আৰু উন্নয়ন নহয়, সাংবিধানিক অধিকাৰ সুৰক্ষিত নহয় তাৰ প্ৰমাণ হৈছে ৷ সেয়ে আমি পৰিষদখন ভংগ কৰিবলৈ দাবী জনাইছো ৷ সেইদৰে কোচ ৰাজবংশী ভাষাক সংবিধানৰ অষ্টম অনুসূচীত অন্তৰ্ভূক্ত কৰি স্বীকৃতি প্ৰদান কৰাৰ লগতে কোচ ৰাজবংশী ভাষাৰ অঞ্চল ভেদে থকা দোৱান বিলাকৰ সুসমন্বয়ৰে কোচ ৰাজবংশী মান্য ভাষাৰ সৃষ্টি কৰিবলৈ কোচ ৰাজবংশী ভাষাৰ উন্নয়ণ, বিকাশ, গবেষণা আৰু ভাষা তাত্বিক বিশ্লেষণৰ বাবে কেন্দ্ৰীয় আৰু অসম চৰকাৰক আৰ্থিক অনুদান প্ৰদাণ কৰিবলৈকো আহ্বান জনায় । কাৰ্যনিৰ্বাহক সভাৰ জৰিয়তে কোচ ৰাজবংশী জাতীয় পৰিষদে কোচ ৰাজবংশী সকলোৰ সমস্যা সমাধানৰ বাবে অৰাজনৈতিক আৰু ৰাজনৈতিকভাবে চৰকাৰৰ ওচৰত দাবী জনোৱাৰ লগতে আনাগত দিনত যিকোনো নিৰ্বাচনত প্ৰত্যক্ষ ভূমিকা গ্ৰহণ কৰিব বুলি প্ৰস্তাৱ লয়। অৱশ্যে এইক্ষেত্ৰত বহলাই আলোচনা কৰাৰ বাবে আগন্তুক অক্টোৱৰ বা নবেম্বৰত এখন অভিৱৰ্তন অনুষ্ঠিত কৰিব বুলি দোহাৰে। সংবাদমেলত কোচ ৰাজবংশী জাতীয পৰিষদৰ সভাপতি বিমল কুমাৰ বৰ্মনে কেন্দ্ৰ আৰু ৰাজ্যত বিজেপি নেতৃত্বাধীন ডাবল ইঞ্জিনযুক্ত চৰকাৰ থকা স্বত্বেও কোচ ৰাজবংশীসকলক জনজাতিকৰণৰ যিটো প্ৰতিশ্ৰুতি আজিলৈকে ৰক্ষা নকৰাত আমি অতিশয় মৰ্মাহত হৈছো ৷ লগতে  অতিশীঘ্ৰে জনজাতিকৰণৰ প্ৰতিশ্ৰুতি পূৰণ কৰিবলৈ মুখ্যমন্ত্ৰী ডঃ হিমন্ত বিশ্ব শৰ্মাক অনুৰোধ জনায় ৷ সংবাদ মেলত পৰিষদৰ সহকাৰী সাধাৰণ সম্পাদকদ্বয় ক্ৰমে ভূপেন ৰায় আৰু জগন্নাথ ৰায়, উত্তৰ শালমাৰা জিলা সমিতিৰ সভাপতি ধীৰাজ ৰায়, সাধাৰণ সম্পাদক ৰহিনী ৰায় আদি উপস্থিত থাকে ৷🔯