🔯বঙাইগাঁও জিলাৰ বান আৰু খহনীয়াগ্ৰস্ত অঞ্চল পৰিদৰ্শন মুখ্যমন্ত্ৰী হিমন্ত বিশ্ব শৰ্মাৰ🔯

🔯বঙাইগাঁও জিলাৰ বান আৰু খহনীয়াগ্ৰস্ত অঞ্চল পৰিদৰ্শন মুখ্যমন্ত্ৰী হিমন্ত বিশ্ব শৰ্মাৰ🔯

🔯জিলা প্ৰশাসনৰ সৈতে কৰিলে পৰ্যালোচনা🔯

📝বঙাইগাঁওঃ ১২ জুলাইঃ আজি অসমৰ মুখ্যমন্ত্ৰী ড:হিমন্ত বিশ্ব শৰ্মাই বঙাইগাঁও জিলাৰ সৃজনগ্ৰাম ৰাজহ চক্ৰ অধীনৰ বান আৰু খহনীয়াত ক্ষতিগ্ৰস্ত তিনকোণীয়া প্ৰথম খণ্ড ( গোবিন্দপুৰ) অঞ্চলটো পৰিদৰ্শন কৰে। মুখ্যমন্ত্ৰীগৰাকীয়ে মালেগড় উচ্চতৰ মাধ্যমিক বিদ্যালয় খেলপথাৰত নিৰ্মিত অস্থায়ী হেলীপেডত নামিয়েই পোনে পোনে তিনকোনীয়া প্ৰথম খণ্ড গাঁৱলৈ যায় আৰু তাত বান আৰু খহনীয়াত ক্ষতিগ্ৰস্ত স্থান  পৰিদৰ্শন কৰে। পৰিদৰ্শনকালত তেওঁ খহনীয়াপীড়িত লোকসকলৰ অৱস্থাৰ বুজ লোৱাৰ লগতে তেওঁলোকৰ সৈতে মত বিনিময় কৰে৷ ইয়াৰ পাছতে মালেগড় উচ্চতৰ মাধ্যমিক বিদ্যালয় চৌহদত জিলা প্ৰশাসনৰ সৈতে বৈঠকত মিলিত হৈ বানপীড়িতলৈ প্ৰশাসনৰ তৰফৰ পৰা গ্ৰহণ কৰা সাহায্য আৰু পুনৰ সংস্থাপন ব্যৱস্থাৱলীৰ পৰ্যালোচনা কৰে ৷ বৈঠকত মুখ্যমন্ত্ৰীগৰাকীয়ে বঙাইগাঁও জিলাত হোৱা বানপানী আৰু জিলা প্ৰশাসনে বানাক্ৰান্ত লোকক আগবঢ়োৱা সাহায্যৰ বুজ লয়।জিলাখনৰ উপায়ুক্ত নবদ্বীপ পাঠকে প্ৰশাসনে বানাক্ৰান্ত সৃজনগ্ৰাম, বইটামাৰী আৰু মাণিকপুৰ ৰাজহ চক্ৰৰ বিভিন্ন স্থান আৰু বন্যাৰ্তক দিয়া ৰিলিফ সম্পৰ্কত এক আভাস দিয়ে।মুখ্যমন্ত্ৰীগৰাকীয়ে বন্যাৰ্তৰ বাবে স্বাস্থ্য বিভাগৰ সেৱা, জলসম্পদ বিভাগৰ কাম, জনস্বাস্থ্য কাৰিকৰী বিভাগৰ পানী যোগান আদিৰ বিষয়ে বিভাগীয় বিষয়াৰ পৰা বুজ লয়।

খহনীয়াগ্ৰস্ত স্থানত কিবা আঁচনি ল'ব পাৰি নেকি সেই বিষয়ে জলসম্পদ বিভাগৰ বিষয়াক মুখ্যমন্ত্ৰীগৰাকীয়ে পৰামৰ্শ দিয়ে। তদুপৰি জিলাখনত জাপানী এনকেফেলাইটিছ বা বানপানীৰ পিছত বানাক্ৰান্ত এলেকাত কিবা বেমাৰৰ প্ৰাদুৰ্ভাৱ হৈছে নেকি যুটীয়া স্বাস্থ্য সেৱা সঞ্চালকৰ পৰা বুজ লয়। মুখ্যমন্ত্ৰীগৰাকীয়ে বানাক্ৰান্ত লোকক সকলো ধৰণৰ সহায় আগবঢ়াবলৈ জিলা প্ৰশাসনক আহ্বান জনায়। বৈঠকৰ পিছত মুখ্যমন্ত্ৰী ড: শৰ্মাই সংবাদ মেল সম্বোধন কৰি কয় যে মালেগড় অঞ্চলৰ গৰাখহনীয়া অঞ্চল পৰিদৰ্শন কৰিবলৈ আহিছিলো আৰু পৰিদৰ্শন কৰিলো ৷ ইয়াত বিশেষকৈ তিনিখন নদীৰ পানী একেলগে অহাৰ কাৰণে গৰাখহনীয়াই এটা অভূতপূৰ্ব পৰিবেশ সৃষ্টি কৰিছে ৷ সেয়ে মই চেষ্টা কৰিম যাতে তিনিকোণীয়া প্ৰথম খণ্ড (গোবিন্দপুৰ) অঞ্চলটোত নৈৰ খহনীয়া ৰোধৰ বাবে ৰাজ্য চৰকাৰে এখন খহনীয়া প্ৰতিৰোধ আঁচনি গ্ৰহণ কৰিব পাৰো ৷ ইয়াৰ উপৰিও বঙাইগাঁও জিলাত বানপানীৰ লগে লগে মাণিকপুৰ, সৃজনগ্ৰাম আদিকে ধৰি বিভিন্ন অঞ্চলৰ আন আন কেইবাটাও স্থানটো গৰাখহনীয়া হৈছে আৰু এই খহনীয়া ৰোধৰ বাবে যথোচিত ব্যৱস্থা গ্ৰহণ কৰা হ'ব ৷ 

জিলাখনত ভালেকেইটা বানপীড়িত লোকৰ বাবে শিবিৰ স্থাপন কৰা হৈছিল যদিও বৰ্তমান পাঁচটা শিবিৰত মানুহ আছে ৷ বাকীসকল ঘৰলৈ ওভতি গৈছে ৷ তেওঁ ইতিমধ্যে বঙাইগাঁও জিলাৰ চাৰি হাজাৰতকৈও অধিক বানপীড়িত পৰিয়ালক ৩,৮০০ টকাকৈ আগবঢ়াবলৈ সক্ষম হোৱা বুলি কোৱাৰ লগতে তিনি লাখতকৈও অধিক বানপীড়িত লোকলৈ যথাযথ সাহায্য আগবঢ়োৱা হৈছে বুলিও কয় ৷ সেইদৰে  জিলাখনত বানত যিসকল লোকৰ গৃহ ক্ষতিগ্ৰস্ত হৈছে তেওঁলোকক আগষ্ট মাহৰ ভিতৰতে আৰ্থিক সাহায্য প্ৰদানৰ পদক্ষেপ লোৱা হৈছে বুলিও উল্লেখ কৰে ৷  একেদৰে বানত যিসকল শিক্ষাৰ্থীৰ কিতাপ-পত্ৰকে ধৰি শিকন সামগ্ৰী নষ্ট হৈছে তেনে ছাত্ৰ-ছাত্ৰীলৈ এককালীন আৰ্থিক সাহায্য প্ৰদান কৰা হ'ব বুলিও কয় ৷ জিলাখনত প্ৰায় দুহেজাৰ ছাত্ৰ - ছাত্ৰীৰ কিতাপ-পত্ৰকে ধৰি শিকন সামগ্ৰী বানত নষ্ট হৈছে আৰু এই শিক্ষাৰ্থীসকলক আৰ্থিক সাহাৰ্য প্ৰদানৰ বাবে বেংকৰ একাউণ্ট নম্বৰ সংগ্ৰহ কৰি থকা হৈছে বুলি কয় ৷ 

মুখ্যমন্ত্ৰীগৰাকীয়ে লগতে কয় যে যদিহে  বানৰ তৃতীয়টো ঢৌ নাহে তেতিয়াহলে জিলাখনলৈ স্বাভাৱিক অৱস্থা ওভতি আহিব ৷ কিন্তু তথাপিটো আমি আগষ্ট মাহৰ শেষলৈকে সাৱধান হৈ থাকিব লাগিব বুলি কয় ৷ খহনীয়াগ্ৰস্ত অঞ্চল পৰিদৰ্শন কালত কেবিনেট মন্ত্ৰী তথা বঙাইগাঁও জিলাৰ অভিভাৱক মন্ত্ৰী ৰঞ্জিৎ কুমাৰ দাস, জিলা উপায়ুক্ত নৱদ্বীপ পাঠককে আদি কৰি বিভিন্ন চৰকাৰী বিভাগৰ মুৰব্বী বিষয়াসকল উপস্থিত থাকে ৷ ইয়াৰ পিছতে  মুখ্যমন্ত্ৰীগৰাকী চিৰাং জিলা অভিমুখে ৰাওনা হয়।🔯