🔯মুখ্যমন্ত্ৰীৰ চিৰাং জিলা ভ্ৰমণঃবুজ ললে বানৰ ফলত হোৱা ক্ষয়- ক্ষতিৰ🔯

🔯মুখ্যমন্ত্ৰীৰ চিৰাং জিলা ভ্ৰমণঃবুজ ললে বানৰ ফলত হোৱা ক্ষয়- ক্ষতিৰ🔯

🔯নিজলা নৈৰ বান আৰু খহনীয়াৰ স্থায়ী সমাধানৰ বাবে গ্ৰহণ কৰা হ'ব আঁচনি🔯 

📝বঙাইগাঁওঃ ১২ জুলাইঃ মুখ্যমন্ত্ৰী ডঃ হিমন্ত বিশ্ব শৰ্মাই আজি বান আক্ৰান্ত চিৰাং জিলা ভ্ৰমণ কৰে ৷ ভ্ৰমণ কালত মুখ্যমন্ত্ৰীগৰাকীয়ে জিলাখনৰ  লাওখৰীগুৰি অঞ্চল পৰিদৰ্শন কৰে ৷ লগতে ভূটানৰ পৰা বৈ অহা নিজলা নৈৰ বানপানীৰ ফলত হোৱা ক্ষয়-ক্ষতিৰো বুজ লয় মুখ্যমন্ত্ৰীয়ে। মুখ্যমন্ত্রীয়ে কয় যে যিহেতু ভূটানত হোৱা বৰষুণৰ ফলত নিজলা নৈখন ফেনে-ফুটুকাৰে আগবাঢ়ি আহে, সেয়েহে তাৰ ফলত হোৱা বানে খহনীয়াৰ ৰূপত বিধ্বংসী ৰূপ ধাৰণ কৰে। সেয়ে তেওঁ অঞ্চলটোৰ বানপানী আৰু খহনীয়াৰ স্থায়ী সমাধানৰ বাবে জলসম্পদ বিভাগে এক দীৰ্ঘম্যাদী আঁচনি গ্ৰহণ কৰিব বুলি কয় ৷ মুখ্যমন্ত্ৰীয়ে জিলাখন ভ্ৰমণৰ সময়ত জিলা প্রশাসন আৰু সকলো বিভাগৰ মুৰব্বী বিষয়াসকলৰ সৈতেও এক পর্যালোচনামূলক বৈঠকত মিলিত হয়। বানপানীৰ ফলত হোৱা ক্ষয়-ক্ষতিৰ বুজ লোৱাৰ লগতে তেওঁ জিলাখনত বিভিন্ন চৰকাৰী কাৰ্যসূচী আৰু প্ৰকল্প ৰূপায়ণৰ ব্যৱস্থাৰাজিৰো পৰ্যালোচনা কৰে। তেওঁ এমজি এনৰেগা, দক্ষতা বিকাশৰ পদক্ষেপ আদি আঁচনিসমূহৰ বুজ লয়। মুখ্যমন্ত্ৰীয়ে দক্ষতা বিকাশৰ বাবে চিৰাং জিলাৰ উপায়ুক্তগৰাকীক আদিবাসী গাঁৱৰ এক জৰীপ চলাবলৈও নিৰ্দেশ দিয়াৰ লগতে এক প্রতিবেদনো প্রস্তুত কৰিবলৈ কয়।

 মুখ্যমন্ত্ৰীয়ে আদিবাসী গাঁৱৰ পাঁচজনকৈ যুৱকক চিনাক্ত কৰিবলৈ নিৰ্দেশ দিয়ে যাতে তেওঁলোকক দক্ষতা বিকাশৰ প্রশিক্ষণ দিব পৰা যায়। শিশু সৰবৰাহ জিলাখনৰ সমস্যা আছিল বুলি উল্লেখ কৰি মুখ্যমন্ত্ৰীয়ে এই ক্ষেত্ৰত যথোপযুক্ত নিৰীক্ষণ অব্যাহত ৰখাৰ বাবেও উপায়ুক্তগৰাকীক নির্দেশ দিয়ে। মুখ্যমন্ত্ৰীয়ে তেওঁৰ এই  পৰিদৰ্শনৰ অংশ হিচাপে লাওখৰীগুৰি প্ৰাথমিক বিদ্যালয়ত স্থাপন কৰা সাহায্য শিবিৰলৈ যায়। এই শিবিৰত বানপানীৰ সময়ত প্ৰায় ৫০ টা পৰিয়ালে আশ্রয় গ্ৰহণ কৰিছিল।মুখ্যমন্ত্ৰীয়ে বান পীড়িত লোকসকলৰ সৈতে মত-বিনিময় কৰি কয় যে তেওঁলোকৰ আৰ্থিক সাহায্যৰ লগতে পুনৰ সংস্থাপনৰ বাবে সকলোধৰণৰ পদক্ষেপ গ্রহণ কৰিব। মুখ্যমন্ত্ৰীৰ এই পৰিদৰ্শনৰ সময়ত বড়োলেণ্ড উন্নয়ন বিভাগৰ মন্ত্ৰী ইউ জি ব্ৰহ্ম, সাংসদ ৰণগৌড়া নাৰ্জাৰী, বিধায়ক জয়ন্ত বসুমতাৰী আৰু অজয় কুমাৰ ৰয়ৰ লগতে জিলা উপায়ুক্ত নৰেন্দ্ৰ কুমাৰ শ্বাহকে ধৰি বিভিন্ন চৰকাৰী বিভাগৰ বিষয়াসকল উপস্থিত থাকে।🔯