🔯বঙাইগাঁও জিলাত আজিৰে পৰা ৩০ ছেপ্টেম্বৰলৈ বিনামূলীয়াকৈ কোভিড প্ৰতিষেধকৰ সুৰক্ষাসূচক পালি প্ৰদানৰ শুভাৰম্ভ🔯

🔯বঙাইগাঁও জিলাত আজিৰে পৰা ৩০ ছেপ্টেম্বৰলৈ বিনামূলীয়াকৈ কোভিড প্ৰতিষেধকৰ সুৰক্ষাসূচক পালি প্ৰদানৰ শুভাৰম্ভ🔯

📝বঙাইগাঁওঃ১৫ জুলাইঃ আজাদী কা অমৃত মহোৎসৱ উপলক্ষ্যে সমগ্ৰ ৰাজ্যৰ সমান্তৰালকৈ বঙাইগাঁও জিলাতো শুকুৰবাৰৰ পৰা ৩০ ছেপ্টেম্বৰলৈকে ১৮ বছৰ বয়সৰ পৰা ৫৯ বছৰ বয়সলৈকে সকলো যোগ্য লোকক বিনামূলীয়াকৈ কোভিড প্ৰতিষেধকৰ সুৰক্ষাসূচক পালি দিয়াৰ ব্যৱস্থা কৰিছে ৰাজ্য চৰকাৰে। শুকুৰবাৰে পুৱা ৯ বজাত  ৰাজ্যিক পৰ্যায়ত এই ৭৫ দিনীয়া কোভিডৰ সুৰক্ষাসূচক পালি প্ৰদানৰ শুভাৰম্ভ কৰে স্বাস্থ্য মন্ত্ৰী কেশৱ মহন্তই। তাৰ পিছত জিলা পৰ্যায়ত আন আন জিলাৰ লগতে বঙাইগাঁও জিলাতো এই কোভিড টীকা প্ৰদানৰ শুভাৰম্ভ কৰা হয়। জিলাখনত উপায়ুক্ত নবদ্বীপ পাঠকে কোভিড টীকাৰ সুৰক্ষাসূচক পালি প্ৰদানৰ শুভাৰম্ভ কৰে ৷ একেবাৰে প্ৰথমতে সুৰক্ষাসূচক পালি টীকা গ্ৰহণ কৰে অতিৰিক্ত উপায়ুক্ত(স্বাস্থ্য)শ্যামল ক্ষেত্ৰ গগৈয়ে। এই ৭৫  দিনীয়া কোভিডৰ সুৰক্ষাসূচক পালি প্ৰদানৰ শুভাৰম্ভ কৰি দিয়া ভাষণত উপায়ুক্ত  পাঠকে কয় যে কোভিড পজিটিভ লোক জিলাখনত এজন-দুজনকৈ ওলাই আছে। গতিকে আমি কোভিডৰ সাৱধানতামূলক ব্যৱস্থাসমূহ মানি চলিব লাগিব। যদিও আমি আজি কালি মাস্ক, ছেনিটাইজাৰ ব্যৱহাৰ আৰু সামাজিক দূৰত্ব মানি চলাত গুৰুত্ব দিয়া নাই ,কিন্তু আমি গুৰুত্ব দিয়া উচিত আৰু কোভিডৰ ভয়াবহতাৰ পৰা বাচি থাকিবলৈ আমি প্ৰথম, দ্বিতীয় পালিৰ লগতে সুৰক্ষাসূচক কোভিড টীকা পালিও গ্ৰহণ কৰা উচিত। বৰ্তমান চৰকাৰে বিনামূলীয়াকৈ এই টীকা দিয়াৰ ব্যৱস্থা কৰিছে। গতিকে আমি সুবিধা গ্ৰহণ কৰা উচিত।

সভাত উপস্থিত থাকি বঙাইগাঁও জিলাৰ যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়ে কয় যে পূৰ্বতে কোভিডৰ সুৰক্ষাসূচক পালি টীকা দ্বিতীয় পালি টীকা লোৱাৰ ৯  মাহৰ পিছতহে ল'ব পাৰিছিল লোকসকলে।কিন্তু এতিয়া এই তৃতীয় পালি টীকা দ্বিতীয় পালি টীকা লোৱাৰ ৬ মাহ পিছতেই ল'ব পৰা যায় ৷ পূৰ্বতে সাধাৰণ মানুহে কিনিহে সুৰক্ষাসূচক পালি টীকা ল'ব পাৰিছিল, কিন্তু এতিয়া১৮ বছৰ বয়সৰ পৰা ৫৯ বছৰ বয়সৰ সকলো লোককে বিনামূলীয়াকৈ এই তৃতীয় পালি টীকা দিয়া হ'ব ৷ জিলা টীকাকৰণ বিষয়া ডা:পুস্পেন্দু দাসে উদ্দেশ্য ব্যাখ্যা কৰা সভাত জিলাৰ অতিৰিক্ত উপায়ুক্ত(স্বাস্থ্য) শ্যামল ক্ষেত্ৰ গগৈ,  জিলা আঁচনি প্ৰবন্ধক কৰুণা ব্ৰহ্ম, ডিচি এম জ্যোতিৰ্ময় দাস, মহকুমা চিকিৎসা আৰু স্বাস্থ্য বিষয়া ডা: মহিবুল ইছলামকে ধৰি কেবাগৰাকীও জ্যেষ্ঠ নাগৰিক আৰু স্থানীয় লোক উপস্থিত থাকে। উল্লেখ্য যে জিলা স্বাস্থ্য বিভাগে জিলাখনৰ ১৫৩ টা কোভিড টীকা প্ৰদান কেন্দ্ৰৰ জৰিয়তে ৩ লাখ ৩৯ হাজাৰ যোগ্য লোকক কোভিড প্ৰতিষেধকৰ সুৰক্ষাসূচক তৃতীয় পালি টীকা প্ৰদানৰ লক্ষ্য বান্ধি লৈছে ৷🔯