🔯দক্ষিণ অভয়াপুৰী বিধান সভা সমষ্টিৰ প্ৰাক্তন অগপ বিধায়কৰ পুত্ৰসহ বিভিন্ন অঞ্চলৰ শতাধিক লোকৰ বিজেপিত যোগদান🔯

🔯দক্ষিণ অভয়াপুৰী বিধান সভা সমষ্টিৰ প্ৰাক্তন অগপ বিধায়কৰ পুত্ৰসহ বিভিন্ন অঞ্চলৰ শতাধিক লোকৰ বিজেপিত যোগদান🔯

🔯বিজেপিৰ কেৱল লোক সভা নিৰ্বাচনেই লক্ষ্য নহয়, বৰং স্থানীয় পঞ্চায়ত নিৰ্বাচনকে ধৰি সকলো নিৰ্বাচনতে বিজেপিয়ে জয়লাভ কৰিব লাগিব - ভৱেশ কলিতা🔯

🔯অখিল গগৈৰ ৰাজনৈতিক পৰিপক্কতা নাই , কেৱল সংগ্ৰাম কৰিব জানে🔯

🔯বঙাইগাঁওঃ ২০ জুলাইঃ বঙাইগাঁও জিলাৰ দক্ষিণ অভয়াপুৰী বিধান সভা সমষ্টিৰ প্ৰাক্তন অগপ বিধায়ক ৰবিন বণিক্যৰ পুত্ৰ  ধৃতিমান বণিক্যই বুধবাৰে  অগপ দল ত্যাগ কৰি বিজেপি দলত যোগদান কৰে ৷ অগপৰ দক্ষিণ অভয়াপুৰী বিধান সভা সমষ্টি কমিটিৰ সাধাৰণ সম্পাদক ধৃতিমান বণিক্যই বঙাইগাঁও জিলা বিজেপি কাৰ্যালয়ত বিয়লিৰ ভাগত অনুষ্ঠিত এক যোগদান কাৰ্যসূচীত দলটোৰ ৰাজ্যিক সমিতিৰ সভাপতি ভৱেশ কলিতাৰ উপস্থিতিত আনুষ্ঠানিকভাৱে বিজেপি দলত যোগদান কৰে ৷ উল্লেখ্য যে অগপৰ ধৃতিমান বণিক্যৰ লগতে দক্ষিণ অভয়াপুৰী বিধান সভা সমষ্টিৰ অগপ দলৰ আন একাংশ বিষয়ববীয়া আৰু কৰ্মীৰ উপৰিও জিলাখনৰ বিভিন্ন অঞ্চলৰ আন দল- সংগঠনৰ লোককে ধৰি মুঠ শতাধিক লোকে বিজেপি দলৰ প্ৰতি আকৃষ্ট হৈ আনুষ্ঠানিকভাৱে দলটোত যোগদান কৰে ৷ দলত যোগদান কৰাসকলক অনুষ্ঠানত উপস্থিত থকা ৰাজ্যিক বিজেপিৰ সভাপতি ভৱেশ কলিতা, জিলা বিজেপিৰ সভানেত্ৰী হিমানী অধিকাৰী, বিজনী বিধান সভা সমষ্টিৰ বিধায়ক অজয় ৰায় আদিয়ে দললৈ আদৰণি জনায় ৷ উল্লেখ্য যে জিলা বিজেপিৰ সাধাৰণ সম্পাদক শংকৰ বিশ্বাসে আত ধৰা যোগদান কাৰ্যসূচীত আদৰণি ভাষণ ৰাখে জিলা বিজেপিৰ সভানেত্ৰী হিমানী অধিকাৰীয়ে ৷ 

ইপিনে যোগদান কাৰ্যসূচীত উপস্থিত থকা ৰাজ্যিক বিজেপিৰ সভাপতি ভৱেশ কলিতাই নিজৰ বক্তব্যত দলটোত নতুনকৈ যোগদান কৰাসকলৰ জৰিয়তে জিলাখনত আগন্তুক দিনত বিজেপি দলটো আৰু অধিক শক্তিশালী ৰূপত আত্মপ্ৰকাশ কৰিব আৰু সাংগঠনিকভাৱে সংগঠনটো বিস্তাৰ হ'ব বুলি আশা প্ৰকাশ কৰে ৷ ৰাজ্যিক সভাপতিগৰাকীয়ে লগতে কয় যে বঙাইগাঁও জিলাত তিনিটা বিধান সভা সমষ্টি আছে যদিও এটাও বিজেপিৰ দখলত নাই ৷ সেয়ে আমাক তিনিওটা সমষ্টিয়ে লাগে ৷ গতিকে আমি কষ্ট কৰিব লাগিব ৷ ৰাজ্যিক সভাপতিগৰাকীয়ে নিজৰ বক্তব্যত বিৰোধী দল কংগ্ৰেছক নানা সমালোচনাও কৰে ৷ ইপিনে বিধায়ক অখিল গগৈয়ে এনডিএৰ ৰাষ্ট্ৰপতি প্ৰাৰ্থীগৰাকীৰ বিৰুদ্ধে কৰা মন্তব্য সন্দৰ্ভত প্ৰতিক্ৰিয়া জানিব বিচৰাত ৰাজ্যিক বিজেপিৰ সভাপতি গৰাকীয়ে কয় যে তেওঁ মাজে মাজে কৈয়ে থাকে ৷ তেওঁ কি কয় নিজেই নাজানে আৰু পিচদিনা ক্ষমাও খোজে ৷ এজন ৰাইজৰ প্ৰতিনিধিৰ কিছুমান দায়িত্ব থাকে ৷ এজন সাধাৰণ ব্যক্তি আৰু ৰাইজৰ প্ৰতিনিধি একে নহয় ৷ অকল সেয়ায়ে নহয়, বহুবাৰ তেওঁ তুচ্ছ তাচিল্য কৰে ৷ তেওঁ ব্যৱহাৰ নাজানে ৷ শিকিবলগীয়া বহু আছে ৷ ৰাজনৈতিক পৰিপক্কতা নাই ৷ কেৱল সংগ্ৰাম কৰিব জানে ৷ সংগ্ৰাম আৰু এজন বিধায়ক হোৱাৰ মাজত বহু পাৰ্থক্য আছে ৷ তেওঁ হ'ল আন্দোলন কৰা নেতা ৷ সেয়ে তেওঁ তেনেকুৱা মন্তব্যও কৰে আৰু ক্ষমাও বিচাৰে ৷ আমি তেনেকুৱা কামক গৰ্হিত কৰো ৷ তেওঁ মন্তব্যটো উঠাই লৈছে আৰু ক্ষমাও বিচাৰিছে যেতিয়া বিষয়টো আমি ইমানতে সামৰণি মাৰিছো ৷ 

সভাপতিগৰাকীয়ে কয় যে এগৰাকী জনগোষ্ঠীয় মহিলাই দেশৰ সাংবিধানিক সৰ্বোচ্চ পদত অধিস্থিত হ'বলৈ গৈ আছে আৰু এয়া দেশৰ কাৰণে গৌৰৱ ৷ সেয়ে দলে বৃহস্পতিবাৰে ৰাষ্ট্ৰপতি গৰাকীক আদৰণি জনাই সমদল উলিয়াব ৷ তেওঁ কয় যে এয়া সমগ্ৰ জনগোষ্ঠীয় বা আদিবাসীসকলৰ কাৰণে নহয় বৰং এয়া সমগ্ৰ ভাৰতবৰ্ষৰ কাৰণে গৌৰৱ ৷ আনহাতে বিজেপিয়ে লোক সভা নিৰ্বাচনক লক্ষ্য হিচাপে লৈ বিকাশ যোজনা আৰম্ভ কৰা বুলিও কয় ৷ তেওঁ বিজেপিয়ে আগন্তুক ২৫ বছৰৰ কাৰণে এক ৰোড মেপ তৈয়াৰ কৰি সংগঠনৰ কাম চলি থকা বুলি জানিব দি লগতে কয় যে বিজেপিৰ কেৱল লোক সভা নিৰ্বাচনেই লক্ষ্য নহয়, বৰং স্থানীয় পঞ্চায়ত নিৰ্বাচনকে ধৰি সকলো নিৰ্বাচনতে বিজেপিয়ে জয়লাভ কৰিব লাগিব ৷ অসমৰ লগতে ভাৰতবৰ্ষৰ জনগণে বুজি উঠিছে যে দেশৰ যদি উন্নয়ন কৰিব লাগে তেতিয়াহলে একমাত্ৰ দল হৈছে বিজেপি আৰু একমাত্ৰ নেতা হৈছে নৰেন্দ্ৰ মোদী ৷ একেদৰে বিজেপি দলে স্বাধীনতা দিৱসৰ লগত সংগতি ৰাখি ৰূপায়ণ কৰিবলগীয়া প্ৰচাৰ অভিযান, ঘৰে ঘৰে তিৰংগা যাত্ৰা কাৰ্যসূচী সন্দৰ্ভটো উল্লেখ কৰে ৷ যোগদান কাৰ্যসূচীত জিলা বিজেপিৰ সাধাৰণ সম্পাদক জ্যোতিৰ্ময় সৰকাৰ, বঙাইগাঁও পৌৰ সভাৰ সভাপতি, অভয়াপুৰী পৌৰ সভাৰ সভাপতি, ৱাৰ্ড কমিচনাৰসকল, যুৱ মৰ্চা আদিৰ বিষয়ববীয়াসকল উপস্থিত আছিল ৷🔯