🔯বঙাইগাঁৱত অভিভাৱক মন্ত্ৰী ৰণজিৎ দাস🔯

🔯বঙাইগাঁৱত অভিভাৱক মন্ত্ৰী ৰণজিৎ দাস🔯

🔯বানপানীত নষ্ট হোৱা গৃহৰ পুনৰীক্ষণ সম্পৰ্কীয় সভাত দায়িত্বপ্ৰাপ্ত বিষয়ববীয়াক নিৰপেক্ষভাৱে প্ৰতিবেদন দাখিল কৰিবলৈ আহ্বান🔯 

📝বঙাইগাঁওঃ ২২ জুলাই: চলিত বৰ্ষত হোৱা বানপানীৰ ফলত বঙাইগাঁও জিলাৰ যিসকল লোকৰ গৃহ (পকীয়েই হওক বা কেচাঘৰেই হওক) সম্পূৰ্ণভাৱে বা আংশিকভাৱে নষ্ট হৈছে সেই গৃহসমূহৰ প্ৰতিবেদন ইতিমধ্যে এছ ডি আৰ এফ-ৰ নিয়ম অনুসৰি জিলা উপায়ুক্তৰ ফালৰ পৰা দাখিল কৰা হৈছে। উক্ত প্ৰতিবেদন নিৰপেক্ষ পুনৰীক্ষণৰ বাবে শুকুৰবাৰে বঙাইগাঁও জিলা উপায়ুক্তৰ সভাকক্ষত পঞ্চায়ত আৰু গ্ৰামোন্নয়ন মন্ত্ৰী ৰণজিৎ কুমাৰ দাসৰ উপস্থিতিত পুনৰীক্ষণৰ দায়িত্বপ্ৰাপ্ত বিষয়ববীয়া সকলৰ বাবে এখন সভা অনুষ্ঠিত কৰা হয়। 

উপায়ুক্ত নবদ্বীপ পাঠকৰ সভাপতিত্বত অনুষ্ঠিত এই সভাত পুনৰীক্ষণৰ বাবে বৰপেটা জিলাত কৰ্মৰত জিলা পৰিষদৰ অধীনৰ বিষয়ববীয়াসকলক পুনৰীক্ষণৰ বাবে প্ৰয়োজনীয় দিহা-পৰামৰ্শ দিয়া হয়। জিলাখনৰ সৃজনগ্ৰাম, মাণিকপুৰ, বইটামাৰী আৰু ডাংতল ৰাজহ চক্ৰৰ অধীনৰ ৫০৪ টা গৃহ(পকীঘৰ আৰু কেচাঘৰ দুয়োটা মিলি)এইবছৰ হোৱা বানত নষ্ট হৈছে। তাৰে ভিতৰত ডাংতল ৰাজহ চক্ৰত মাত্ৰ এটা গৃহহে নষ্ট হৈছে। এই ৫০৪  টা নষ্ট হোৱা গৃহৰ নিৰপেক্ষ পুনৰীক্ষণ কৰাৰ বাবে বৰপেটাৰ পঞ্চায়ত বিভাগৰ যিসকল বিষয়ববীয়া নিযুক্ত কৰা হৈছে তেওঁলোকৰ পৰা এজন বা দুজন, বা য'ত একেলগে বেছি গৃহ নষ্ট হৈছে তাৰ বাবে তিনিজন বা চাৰিজন ব্যক্তি লৈ একোটা সৰু সৰু দল গঠন কৰি দিয়া হৈছে।

তেওঁলোকে নিজৰ নিজৰ এলেকাখিনিৰ নষ্ট হোৱা গৃহৰ ২০ শতাংশ পুনৰীক্ষণ কৰি সংশ্লিষ্ট চক্ৰ বিষয়াক দুদিনৰ ভিতৰত প্ৰতিবেদন দাখিল কৰিব। যদি কোনোবা অন্তৰ্ভুক্ত হ'বলগীয়া গৃহ বাদ পৰি গৈছে সেইখিনি তেওঁলোকৰ প্ৰতিবেদনত অন্তৰ্ভুক্ত কৰি প্ৰতিবেদন দাখিল কৰিব। সভাত পঞ্চায়ত আৰু গ্ৰামোন্নয়ন মন্ত্ৰী ৰণজিৎ কুমাৰ দাসে বিষয়ববীয়াসকলক সম্পূৰ্ণ নিৰপেক্ষভাৱে প্ৰতিবেদন দাখিল কৰিবলৈ আহ্বান জনায়। তেওঁ কয় যে এয়া মুখ্যমন্ত্ৰীৰ নতুন পৰিকল্পনা আৰু মুখ্যমন্ত্ৰীগৰাকীয়ে বিচাৰিছে যে অতি শীঘ্ৰে ক্ষতিগ্ৰস্ত লোকসকলে ক্ষতিপুৰণ লাভ কৰক৷ মন্ত্ৰীগৰাকীয়ে আৰু কয় যে দায়িত্বপ্ৰাপ্ত পঞ্চায়ত বিভাগৰ বিষয়ববীয়াসকলে এই কামৰ জৰিয়তে এক নতুন অভিজ্ঞতা লাভ কৰিব। সভাত সাধাৰণ প্ৰশাসন বিভাগৰ সচিব উমানন্দ দলেও উপস্থিত আছিল।🔯