🔯বঙাইগাঁৱত জিলা প্ৰশাসনৰ দ্বাৰা কৃতী ছাত্ৰ-ছাত্ৰীক সম্বৰ্ধনা🔯

🔯বঙাইগাঁৱত জিলা প্ৰশাসনৰ দ্বাৰা কৃতী ছাত্ৰ-ছাত্ৰীক সম্বৰ্ধনা🔯

📝বঙাইগাঁওঃ ২১ জুলাই: চলিত বৰ্ষত বঙাইগাঁও জিলাৰ যিসকল ছাত্ৰ-ছাত্ৰীয়ে হাইস্কুল শিক্ষান্ত, অসম হাই মাদ্ৰাছা আৰু উচ্চতৰ মাধ্যমিক চূড়ান্ত পৰীক্ষাত অসমৰ ভিতৰত স্থান পাইছে আৰু যিসকলে তুলনামূলকভাৱে ভাল ফল দেখুৱাবলৈ সক্ষম হৈছে সেইসকল ছাত্ৰ- ছাত্ৰীক বৃহস্পতিবাৰে  বঙাইগাঁও জিলা প্ৰশাসনৰ তৰফৰ পৰা সম্বৰ্ধনা জনোৱা হয়। এই উদ্দেশ্যে জিলা উপায়ুক্ত নবদ্বীপ পাঠকৰ সভাপতিত্বত উপায়ুক্ত কাৰ্যালয়ৰ সভাকক্ষত বিধায়ক ফণীভূষণ চৌধুৰী,আৰক্ষী অধীক্ষক স্বপ্ননীল ডেকা,জিলা উন্নয়ন আয়ুক্ত ভাস্কৰ দাস,অতিৰিক্ত উপায়ুক্ত(শিক্ষা) শ্যামল ক্ষেত্ৰ গগৈ,জিলা প্ৰাথমিক শিক্ষা বিষয়া তথা বিদ্যালয়সমূহৰ পৰিদৰ্শক(ভাৰপ্ৰাপ্ত)জ্যোৎস্না ৰাণী বৰ্মন,যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয় আৰু কেবাগৰাকীও শিক্ষা বিষয়াৰ উপস্থিতিত জিলাখনৰ ১৪ গৰাকী কৃতী ছাত্ৰ-ছাত্ৰীক একোখন মানপত্ৰ,গামোছা আৰু কিতাপেৰে সম্বৰ্ধনা জনোৱা হয়।বঙাইগাঁও জিলা প্ৰশাসনে হাইস্কুল শিক্ষান্ত পৰীক্ষাত দশম স্থান পোৱা অনুভৱ কপিল (৯৮%) ৰ লগতে মেঘনা ৰয় (৯৩%), আৰ্চিতা ৰুদ্ৰা  (৮৮.৫%), তনভী সাহা(৮৭%),ছাইদুৰ ৰহমান (৮৬.১৬%), অনামিকা চুলতানা (৯৪.৬৭%), প্ৰেৰণা দাস (৯০.৮৩%), চুলতান আলী (৯০.৮৩%), আশিক ৰায় (৯০.৩৩%) আৰু অসম হাই মাদ্ৰাছা পৰীক্ষাত দ্বিতীয় স্থান প্ৰাপ্ত মোস্তাক আহমেদ (৯১.৬৭%) ৰ লগতে উচ্চতৰ মাধ্যমিক চড়ান্ত পৰীক্ষাত দশম স্থান পোৱা অনন্যা সূত্ৰধৰ(৯৪.৬%) তথা ৰিহা দাস (৮৫.২%),সন্ধ্যা পাল (৮৬%) আৰু লিছা সৰকাৰ (৭৯.৬%)ক সম্বৰ্ধনা জনায় ৷  

উল্লেখ্য যে এই অনুষ্ঠানতে হাইস্কুল শিক্ষান্ত পৰীক্ষাত দশম স্থানপ্ৰাপ্ত অনুভৱ কপিল , অসম হাই মাদ্ৰাছা পৰীক্ষাত দ্বিতীয় স্থানপ্ৰাপ্ত মোস্তাক আহমেদ আৰু বঙাইগাঁও উচ্চতৰ মাধ্যমিক বিদ্যালয়(ইংৰাজী মাধ্যম)ৰ অধ্যক্ষ আব্দুল মান্নান চৌধুৰীলৈ মুখ্যমন্ত্ৰীৰ পৰা পঠোৱা সম্বৰ্ধনা পত্ৰও প্ৰদান কৰা হয়। সম্বৰ্ধনা সভাত ভাষণ প্ৰদান কৰি বিধায়ক ফণীভূষণ চৌধুৰীয়ে ছাত্ৰ-ছাত্ৰীসকলক কয় যে তেওঁলোকে আজিৰ এই সন্মান লাভ কৰি নিশ্চয় অনুপ্ৰাণিত হ'ব আৰু অহংকাৰশূন্য হৈ আগবাঢ়ি যাব। উপায়ুক্ত নবদ্বীপ পাঠকে সভাপতিৰ ভাষণত কয় যে ছাত্ৰ-ছাত্ৰীসকল দেশৰ সম্পদ।তেওঁলোক আগুৱাই গ'লেহে দেশে আগুৱাই যাব পাৰিব। সভাত বিদ্যালয়সমূহৰ পৰিদৰ্শক জ্যোৎস্না ৰাণী বৰ্মন,আৰক্ষী অধীক্ষক স্বপ্ননীল ডেকা আৰু কৃতী ছাত্ৰ-ছাত্ৰী আৰু তেওঁলোকৰ দুজনমান অভিভাৱকেও বক্তব্য ৰাখে।🔯