🔯শিক্ষানুষ্ঠানৰ এশ গজ পৰিসীমাৰ ভিতৰত ধঁপাত জাতীয় সামগ্ৰী বিক্ৰী🔯

🔯শিক্ষানুষ্ঠানৰ এশ গজ পৰিসীমাৰ ভিতৰত ধঁপাত জাতীয় সামগ্ৰী বিক্ৰী🔯 

🔯বঙাইগাঁও জিলা ধঁপাত নিয়ন্ত্ৰণ কোষৰ অভিযানঃ বৃহৎ পৰিমাণৰ ধঁপাত জাতীয় সামগ্ৰী জব্দ🔯

🔯আইন উলংঘাকাৰীক বিহিলে জৰিমনা🔯

📝বঙাইগাঁওঃ ৪ জুলাইঃ বঙাইগাঁও জিলা স্বাস্থ্য বিভাগৰ অধীনৰ জিলা ধঁপাত নিয়ন্ত্ৰণ কোষৰ তৰফৰ পৰা আজি বঙাইগাঁও চহৰৰ বিভিন্ন শিক্ষানুষ্ঠানৰ এশ গজ পৰিসীমাৰ ভিতৰত থকা ব্যৱসায়ীক প্ৰতিষ্ঠানত ধঁপাত জাতীয় সামগ্ৰী বিক্ৰী কৰাৰ বিৰুদ্ধে অভিযান চলায় ৷ জিলা ধঁপাত নিয়ন্ত্ৰণ কোষৰ ন'ডেল বিষষা ডাঃ পুলিন চন্দ্ৰ নাথৰ নেতৃত্বত তথা বঙাইগাঁও জিলা আইন সেৱা প্ৰাধিকৰণৰ সদস্য, অধিবক্তা আৰু আৰক্ষীৰ সহযোগত চলোৱা ধঁপাত বিৰোধী অভিযানত বৃহৎ পৰিমাণৰ ধঁপাত জাতীয় সামগ্ৰী জব্দ কৰাৰ লগতে আইন উলংঘা কাৰীসকলক জৰিমনা বিহে ৷ অভিযানকাৰী দলটোৱে বঙাইগাঁও চহৰৰ বীৰঝৰা উচ্চতৰ মাধ্যমিক বিদ্যালয় আৰু বীৰঝৰা কন্যা মহাবিদ্যালয়ৰ পৰা এশ গজ পৰিসীমাৰ ভিতৰত পৰা চিলাৰায় দৈনিক বজাৰৰ ভিতৰৰ কেইবাখনো দোকানৰ লগতে ৬ নম্বৰ ৱাৰ্ডৰ বিদ্যা মন্দিৰ এম ই স্কুল, বঙাইগাঁও হিন্দী উচ্চতৰ মাধ্যমিক স্কুল আৰু বঙাইগাঁও মহাবিদ্যালয়ৰ এশ গজ পৰিসীমাৰ ভিতৰত থকা ব্যৱসায়ীক প্ৰতিষ্ঠানসমূহত চলায় এই অভিযান ৷ 

উল্লেখ্য যে বঙাইগাঁও হিন্দী উচ্চতৰ মাধ্যমিক বিদ্যালয়ৰ ওচৰত অভিযানকাৰী দলক দেখা পাই এগৰাকী দোকানীয়ে দুই হাতত দুখন ধঁপাত জাতীয় সামগ্ৰীভৰ্তি বেগ লৈ দৌৰি পলায়াণ কৰে যদিও আৰক্ষীয়ে পিচে পিচে খেদি গৈ ধৰে ৷ অভিযান কালত দলটোৱে বৃহৎ পৰিমাণৰ গুটখা, চাধা, চিগাৰেট, শিখৰ আদিকে ধৰি ধঁপাত জাতীয় সামগ্ৰী জব্দ কৰে ৷ লগতে আইন উলংঘাকাৰীৰ বিৰুদ্ধে জৰিমনা বিহে ৷ ইপিনে এই অভিযান সন্দৰ্ভত জিলা ধঁপাত নিয়ন্ত্ৰণ কোষৰ ন'ডেল বিষয়া ডাঃ পুলিন চন্দ্ৰ নাথে জানিবলৈ দিয়া মতে ৰাষ্ট্ৰীয় ধঁপাত নিয়ন্ত্ৰণ আইন ২০০৩ অনুসৰি শিক্ষানুষ্ঠানৰ এশ গজ পৰিসীমাৰ ভিতৰত যিকোনো ধৰণৰ ধঁপাত জাতীয় সামগ্ৰী বিক্ৰী কৰাটো নিষেধ কৰা হৈছে ৷ এই নিৰ্দেশা বঙাইগাঁৱতো প্ৰযোজ্য কৰা হৈছিল ৷ সেই অনুসৰি বঙাইগাঁৱৰ শিক্ষানুষ্ঠানসমূহৰো এশ গজ পৰিসীমাৰ ভিতৰত থকা ব্যৱসায়ীক  প্ৰতিষ্ঠানসমূহত ধঁপাত জাতীয় সামগ্ৰীৰ বিক্ৰী  নিষেধ কৰা হৈছিল আৰু ব্যৱসায়ীক প্ৰতিষ্ঠানৰ গৰাকীসকলক এই বিষয়টো অৱগত কৰি জাননীও জাৰি কৰা হৈছিল ৷ কিন্তু এই জাননীক গুৰুত্ব নিদি চৰকাৰী আইন উলংঘা কৰি ব্যৱসায়ীক প্ৰতিষ্ঠানসমূহে গুটখা, শিখৰ, চিগাৰেট, চাধা, বিড়ি, জৰ্দা আদিৰ দৰে ধঁপাত জাতীয় সামগ্ৰী বিক্ৰী কৰি আহাত ইয়াৰ বিৰুদ্ধে অভিযান চলোৱা হয় বুলি জানিবলৈ দিয়ে ৷ উদ্ধাৰ কৰা ধঁপাত জাতীয় সামগ্ৰীসমূহ জব্দ কৰাৰ লগতে আইন উলংঘাকাৰী বিক্ৰেটাৰ বিৰুদ্ধে জৰিমনা বিহে ৷ এই ধঁপাত বিৰোধী অভিযান চলি থাকিব বুলিও জনায় ৷🔯