🔯বঙাইগাঁৱত বিধায়ক প্ৰদীপ সৰকাৰ আৰু আব্দুল বাতিন খণ্ডকাৰৰ উপস্থিতিত বানত হোৱা ক্ষয়-ক্ষতিৰ পৰ্যালোচনা সভা🔯

🔯বঙাইগাঁৱত বিধায়ক প্ৰদীপ সৰকাৰ আৰু আব্দুল বাতিন খণ্ডকাৰৰ উপস্থিতিত বানত হোৱা ক্ষয়-ক্ষতিৰ পৰ্যালোচনা সভা🔯

📝বঙাইগাঁওঃ ৮ জুলাইঃ  বঙাইগাঁও জিলাত চলিত বৰ্ষৰ প্ৰথমটো বানপানীত হোৱা বিভিন্ন ক্ষয়-ক্ষতি সম্পৰ্কত শুকুৰবাৰে জিলা উপায়ুক্ত কাৰ্যালয়ৰ সভাকক্ষত উপায়ুক্ত নবদ্বীপ পাঠকৰ সভাপতিত্বত এখনি পৰ্যালোচনা সভা অনুষ্ঠিত কৰা হয়  ৷  অভয়াপুৰী উত্তৰ বিধানসভা সমষ্টিৰ বিধায়ক আব্দুল বাতিন খণ্ডকাৰ আৰু অভয়াপুৰী দক্ষিণ(অনু:জা:)বিধানসভা সমষ্টিৰ বিধায়ক প্ৰদীপ সৰকাৰৰ উপস্থিতিত জিলাখনত বিভিন্ন বিভাগৰ ক্ষয়-ক্ষতিৰ পৰিমাণ অনুমোদন দিয়া সম্পৰ্কত সভাত আলোচনা কৰা হয়। এইক্ষেত্ৰত বিধায়কদ্বয়ে তেওঁলোকৰ সমষ্টিৰ অন্তৰ্গত কেবাটাও ক্ষয়-ক্ষতি আঙুলিয়াই দিয়ে। সভাত বঙাইগাঁও জিলা দুৰ্যোগ ব্যৱস্থাপনা প্ৰাধিকৰণৰ প্ৰকল্প বিষয়া অনন্ত সামন্তই লোকনিৰ্মাণ পথ বিভাগ, পঞ্চায়ত আৰু  গ্ৰামোন্নয়ন, জলসম্পদ, সমাজ কল্যাণ, শিক্ষা, কৃষি, এপিডিচিএল,স্বাস্থ্য, জনস্বাস্থ্য কাৰিকৰী, মীন, ভূমি সংৰক্ষণ আদি বিভাগৰ পথ,পঞ্চায়ত আৰু গ্ৰামোন্নয়ন বিভাগৰ অধীনৰ গাঁও-পঞ্চায়ত কাৰ্যালয় বা প্ৰধানমন্ত্ৰী আৱাস যোজনাৰ ঘৰ, মথাউৰি, কৃষিবান্ধ, খেতিপথাৰ,  ইলেক্ট্ৰিক পোষ্ট বা ট্ৰেন্সফৰ্মাৰ , জনস্বাস্থ্য কাৰিকৰী বিভাগৰ পানী যোগান আঁচনি, বিদ্যালয়, মীনমহল, নদীৰ খহনীয়া আদিৰ যি যি ক্ষয়-ক্ষতিৰ খতিয়ান বিভাগীয় বিষয়াই দাখিল কৰিছে সেই সম্পৰ্কত পৰ্যালোচনা কৰা হয়।

সভাত উপায়ুক্ত নবদ্বীপ পাঠকে বিভাগীয় বিষয়াসকলক কয় যে যাতে কোনো ক্ষয়-ক্ষতিৰ হিচাপ বাদ পৰি নাযায় তাৰ বাবে তেওঁলোকে খতিয়ান দিওঁতে গুৰুত্ব সহকাৰে দিয়া প্ৰয়োজন আৰু খতিয়ানখিনি চক্ৰ বিষয়া পৰ্যায়ৰ টাস্কফোৰ্চৰ সভাৰ জৰিয়তে অনুমোদিত হৈ আহিলেহে  এছ ডি আৰ এফৰ নিয়ম অনুসৰি ক্ষয়-ক্ষতিৰ ক্ষতিপূৰণ পোৱা যাব৷ সভাত জিলা পৰিষদৰ মুখ্য কাৰ্যবাহী বিষয়া নাদীৰা জেচমিন, জিলা উন্নয়ন আয়ুক্ত ভাস্কৰ দাস, অতিৰিক্ত উপায়ুক্ত জেনিফাৰ ইয়াছমিন চৌধুৰী, অতিৰিক্ত উপায়ুক্ত তথা উত্তৰ শালমাৰা মহকুমাৰ মহকুমাধিপতি (ভাৰপ্ৰাপ্ত) পাৰ্থ সাৰথি জহৰী, চক্ৰ বিষয়াসকল, বিভাগীয় জিলা পৰ্যায়ৰ মুৰব্বী বিষয়াসকল, খণ্ড উন্নয়ন বিষয়াসকল, বঙাইগাঁও আৰু অভয়াপুৰী পৌৰসভাৰ কাৰ্যবাহী বিষয়া আৰু ক্ষেত্ৰ বিষয়াসকল উপস্থিত থাকে।🔯