🔯বঙাইগাঁও মহাবিদ্যালয়ৰ ৫৮ সংখ্যক প্ৰতিষ্ঠা দিৱস উদযাপন🔯

🔯বঙাইগাঁও মহাবিদ্যালয়ৰ ৫৮ সংখ্যক প্ৰতিষ্ঠা দিৱস উদযাপন🔯

📝বঙাইগাঁওঃ ৮ জুলাইঃ বঙাইগাঁও জিলাৰ লগতে নামনি অসমৰ এখন অন্যতম উচ্চ শিক্ষানুষ্ঠান বঙাইগাঁও মহাবিদ্যালয়ৰ ৫৮ সংখ্যক প্ৰতিষ্ঠা দিৱস আজি মহাবিদ্যালয়খনত উদযাপন কৰা হয় ৷ প্ৰতিষ্ঠা দিৱস উপলক্ষে পুৱা পতাকা উত্তোলনেৰে কাৰ্যসূচীৰ শুভাৰম্ভ কৰে মহাবিদ্যালয়খনৰ অধ্যক্ষ ডঃ দীনেশ দাসে ৷ ইয়াৰ পিচতে মহাবিদ্যালয়খনৰ প্ৰতিষ্ঠাৰ সৈতে জড়িত প্ৰয়াত বিশিষ্ট ব্যক্তি সীতানাথ ব্ৰহ্ম চৌধুৰী, হৰিপ্ৰসাদ গোস্বামী, দামোদৰ মহন্ত আৰু ভৱেশ্বৰ চৌধুৰীক স্মৰণ কৰি শ্ৰদ্ধাজ্ঞলি জ্ঞাপন কৰা হয় ৷ শ্ৰদ্ধাঞ্জলি জ্ঞাপন কৰে বঙাইগাঁও মহাবিদ্যালয় পৰিচালনা সমিতিৰ সভাপতি তথা মহাবিদ্যালয়খনৰ অৱসৰপ্ৰাপ্ত অধ্যাপক তালুকদাৰ, অৱসৰপ্ৰাপ্ত উপাধ্যক্ষা ৰেণুকা দাস, অৱসৰপ্ৰাপ্ত মুৰব্বী অধ্যাপক ডঃ প্ৰণৱ কুমাৰ ধৰ আৰু শিক্ষাবিদ তৰণীকান্ত ৰায়ে ৷ 

ইয়াৰ পিচতে স্মৃতি তৰ্পণ অনুষ্ঠান মুকলি কৰে মহাবিদ্যালয়খনৰ বাণিজ্য শাখাৰ অৱসৰপ্ৰাপ্ত মুৰব্বী অধ্যাপক ওম প্ৰকাশ আগৰৱালাই ৷ আনহাতে মহাবিদ্যালয় প্ৰাংগণত থকা প্ৰয়াত সীতানাথ ব্ৰক্ষ চৌধুৰী, সাহিত্যৰথী লক্ষ্মীনাথ বেজবৰুৱা আৰু ডঃ সৰ্বেপল্লী ৰাধা কৃষ্ণণৰ আৱক্ষ মূৰ্তিত বন্তি প্ৰজ্বলন কৰি শ্ৰদ্ধাঞ্জলি জ্ঞাপন কৰে অৱসৰপ্ৰাপ্ত মৰব্বী অধ্যাপক বীৰেন পাটগিৰী, বয়োজ্যেষ্ঠ সমাজকৰ্মী গজেন্দ্ৰ নাৰায়ণ চৌধুৰী আৰু সমাজকৰ্মী বসন্ত চৌধুৰীয়ে ৷ সেইদৰে শ্বহীদ বেদীত বন্তি প্ৰজ্বলন কৰি দেশ আৰু জাতিৰ বাবে প্ৰাণাহুতি দিয়া শ্বহীদসকললৈ শ্ৰদ্ধাঞ্জলি জ্ঞাপন কৰে সমাজকৰ্মী নীৰেন দাস আৰু অৱসৰপ্ৰাপ্ত মুৰব্বী অধ্যাপক নৃৰ জামালে ৷ প্ৰতিষ্ঠা দিৱসৰ লগত সংগতি ৰাখি এখন সভাও অনুষ্ঠিত হয় ৷ মহাবিদ্যালয় পৰিচালনা সমিতিৰ সভাপতি গোপেশ্বৰ তালুকদাৰে বন্তি প্ৰজ্বলনেৰে শুভাৰম্ভ কৰা সভাখনত সভাপতিত্ব কৰে মহাবিদ্যালয়খনৰ অধ্যক্ষ ডঃ দীনেশ দাসে ৷ সভাত স্মৃতি ৰমন্থন শীৰ্ষক এক অনুষ্ঠান ৰখা হয় ৷ এই অনুষ্ঠানত ইতিমধ্যে মহাবিদ্যালয়খনৰ পৰা অৱসৰ গ্ৰহণ কৰা অধ্যক্ষ, উপাধ্যক্ষ, অধ্যাপক আৰু কৰ্মচাৰীসকলক আমন্ত্ৰণ কৰি অনা হয় আৰু তেওঁলোকে মহাবিদ্যালয়খনৰ স্মৃতি ৰমন্থ কৰি বক্তব্য ৰাখে ৷

উল্লেখ্য যে বিগত ১৯৬৪ চনৰ ৮ জুলাইৰ দিনটোতে বঙাইগাঁও মহাবিদ্যালয়খন প্ৰতিষ্ঠা হৈছিল ৷ ইপিনে মহাবিদ্যালয়খনৰ অধ্যক্ষ ডঃ দীনেশ দাসে কয় যে আজি আমাৰ লগতে বঙাইগাঁওবাসী ৰাইজৰ কাৰণে এটা গৌৰৱৰ দিন যে ১৯৬৪ চনৰ ৮ জুলাইৰ এই দিনটোতে ঐতিহাসিক বঙাইগাঁও মহাবিদ্যালয় প্ৰতিষ্ঠা হৈছিল ৷ আজি বঙাইগাঁও মহাবিদ্যালয়ৰ ৫৮ সংখ্যক প্ৰতিষ্ঠা দিৱস ৷ এই প্ৰতিষ্ঠা দিৱসটো অনুষ্ঠুপীয়াভাৱে উদযাপন কৰিছো ৷ কাৰণ এটা বছৰ পিচতে আমি এই মহাবিদ্যালয়খনৰ হীৰক জয়ন্তীৰ শুভাৰম্ভ কৰিম ৷ ২০২৩ বৰ্ষৰ ৮ জুলাইৰ পৰা ২০২৪ বৰ্ষৰ ৮ জুলাইলৈকে আমি হীৰক জয়ন্তী পালন কৰাৰ বাবে মনসা কৰি আছো ৷গতিকে সকলো ৰাইজৰে যাতে আশা - আকংক্ষা পূৰণ হয় তাৰ কাৰণে আমি যৎপৰোনাস্তি চেষ্টা কৰিম ৷ প্ৰতিষ্ঠা দিৱসৰ অনুষ্ঠানত মহাবিদ্যালয়খনৰ উপাধ্যক্ষ, অধ্যাপক, কৰ্চাৰী আৰু ছাত্ৰ- ছাত্ৰী উপস্থিত থাকে ৷🔯