🔯বঙাইগাঁৱত ৰে'লৱে বিভাগৰ মইমতালিৰ বিৰুদ্ধে চিপিআই(এম) ৰ অৱস্থান ধৰ্মঘটঃ কেন্দ্ৰীয় ৰে’ল মন্ত্ৰীলৈ স্মাৰকপত্ৰ প্ৰেৰণ🔯

🔯বঙাইগাঁৱত ৰে'লৱে বিভাগৰ মইমতালিৰ বিৰুদ্ধে চিপিআই(এম) ৰ অৱস্থান ধৰ্মঘটঃ কেন্দ্ৰীয় ৰে’ল মন্ত্ৰীলৈ স্মাৰকপত্ৰ প্ৰেৰণ🔯

📝বঙাইগাঁওঃ ১ জুলাইঃ বঙাইগাঁৱত ৰে'লৱে বিভাগৰ মইমতালিৰ বিৰুদ্ধে চিপিআই (এম) ৰ বঙাইগাঁও আঞ্চলিক কমিটিৰ উদ্যোগত শুকুৰবাৰে এক প্ৰতিবাদী 'অৱস্থান ধর্মঘট' কাৰ্যসূচী ৰূপায়ণ কৰে ৷ উল্লেখ্য যে ৰে'লৱে বিভাগে বঙাইগাঁও ৰে'লৱে ষ্টেচনৰ যাত্ৰী পৰিসেৱা ব্যাপক কৰ্তন কৰাত ক্ষুদ্ধ হৈ পৰিছে চিপিআই ( এম ) দল ৷ সেয়ে দলটোৱে ৰে'লৱে বিভাগে কৰ্তন কৰা যাত্ৰী পৰিসেৱাসমূহ পুনৰ প্ৰৱৰ্তন কৰাৰ দাবী উত্থাপন কৰিছে ৷ বঙাইগাঁও চহৰৰ গান্ধীময়দানত ৰূপায়ণ কৰা অৱস্থান ধৰ্মঘট কাৰ্যসূচীৰ জৰিয়তে দলটোৰ বঙাইগাঁও আঞ্চলিক কমিটিয়ে বিশেষকৈ বঙাইগাঁও ৰে’লৱে ষ্টেচনৰ ফুট ওভাৰব্ৰীজসহ সকলো যাত্রী পৰিসেৱাসমূহ সম্পূৰ্ণৰূপে বাহাল ৰখা, পালপাৰা - বাগান ৰোড (তৰুণৰাম ফুকন ৰোড) সংযোগী উপপথ নিৰ্মাণ কৰা, বঙাইগাঁও ষ্টেচনত অৱধ আসাম এক্সপ্ৰেছ আৰু কাঞ্চনজংঘা এক্সপ্ৰেছ ৰখোৱা আৰু বঙাইগাঁৱৰ পাগলাস্থান – ডাংতল সংযোগী মূল পথটো পুনঃনির্মাণৰ কাম ক্ষিপ্ৰতাৰে সম্পন্ন কৰাৰ দাবী উত্থাপন কৰে ৷ 

অৱস্থান ধৰ্মঘট কাৰ্যসূচীত অংশগ্ৰহণ কৰাসকলে দাবীৰ সমৰ্থনত বিভিন্ন শ্লোগানো দিয়ে ৷ প্ৰতিবাদী কাৰ্যসূচীৰ অন্ত বঙাইগাঁও জিলাৰ উপায়ুক্তৰ জৰিয়তে কেন্দ্ৰীয় ৰে’লৱে মন্ত্ৰীলৈ ওপৰোক্ত দাবীত বামপন্থী দলটোৰ বঙাইগাঁও আঞ্চলিক কমিটিৰ সম্পাদক সঞ্জীৱ দেৱ স্বাক্ষৰিত এখন স্মাৰকপত্ৰ প্ৰেৰণ কৰি দাবীসমূহ শীঘ্ৰে সমাধান কৰাৰ আহ্বান জনায়৷🔯