🔯অধ্যাপক গজেন্দ্ৰ চন্দ্ৰ শৰ্মা স্মাৰক গ্ৰন্থ উন্মোচন🔯

🔯অধ্যাপক গজেন্দ্ৰ চন্দ্ৰ শৰ্মা স্মাৰক গ্ৰন্থ উন্মোচন🔯

 📝বঙাইগাঁওঃ ৭ জুলাইঃ বঙাইগাঁও জিলাৰ অভয়াপুৰী তথা কাকৈজানা অঞ্চলৰ বিশিষ্ট শিক্ষাবিদ, সমাজ সেৱক তথা অভয়াপুৰী মহাবিদ্যালয়ৰ অৰ্থনীতি বিভাগৰ অৱসৰপ্ৰাপ্ত অধ্যাপক গজেন্দ্ৰ চন্দ্ৰ শৰ্মাৰ দ্বিতীয় বাৰ্ষিক মৃত্যু তিথি উপলক্ষে আয়োজিত স্মাৰক গ্ৰন্থ উন্মোচন আৰু স্মৃতিচাৰণ সভাখন বৃহস্পতিবাৰে পৰিয়ালবৰ্গৰ উদ্যোগত আৰু কাকৈজানা যুৱক সংঘ আৰু সামূহিক কেন্দ্ৰৰ সহযোগত অনুষ্ঠিত হৈ যায় ৷ প্ৰয়াত শৰ্মাৰ একমাত্ৰ পুত্ৰ মনোজ শৰ্মাৰ বাসগৃহত সমাজকৰ্মী ফণীন্দ্ৰ সিংহৰ সভাপতিত্বত অনুষ্ঠিত অনুষ্ঠানত কামাখ্যা প্ৰসাদ ৰায় সম্পাদিত স্মাৰক গ্ৰন্থ "মহীৰূহ" অভয়াপুৰী মহাবিদ্যালয়ৰ অধ্যক্ষ ডঃ সদানন্দ নাথে উন্মোচন কৰে ৷ ভাষণ প্ৰসংগত ডঃ নাথে অভয়াপুৰী মহাবিদ্যালয়ৰ শৈক্ষিক পৰিৱেশ গঢ় দিয়াত প্ৰয়াত শৰ্মাৰ অমূল্য বৰঙণিৰ কথা উল্লেখ কৰে ৷ তেখেতে মহাবিদ্যালয়খনৰ জন্মলগ্নৰে পৰা কৰ্মৰত অধ্যাপক সকলৰ অনবদ্য অৱদান সম্বলিত এখন গ্ৰন্থও প্ৰকাশ কৰাৰ আঁচনি লোৱাৰ কথা দোহাৰে ৷ অনুষ্ঠানৰ আৰম্ভণিতে অধ্যাপক শৰ্মাৰ প্ৰাক্তন ছাত্ৰ তথা প্ৰাক্তন বিধায়ক ভূপেন ৰায়ে প্ৰয়াত শৰ্মা দম্পতীৰ প্ৰতিচ্ছবিত বন্তি প্ৰজ্জ্বলন কৰি পুষ্পাঞ্জলি প্ৰদান কৰে ৷ তেখেতে ছাত্ৰাৱস্থাৰে পৰা শিক্ষাগুৰু গৰাকীৰ সান্নিধ্যৰ কথা আলোকপাত কৰে ৷ সভাত বিশিষ্ট সাহিত্যিক অমৃত ভূষণ ফৌজদাৰ আৰু বঙাইগাঁও জিলা সাহিত্য সভাৰ ভাৰপ্ৰাপ্ত সভাপতি বিক্ৰম মেধিও গজেন্দ্ৰ চন্দ্ৰ শৰ্মাৰ বহুমুখী প্ৰতিভাৰ কথা আলোচনা কৰে ৷ অনুষ্ঠানত প্ৰাক্তন ছাত্ৰনেতা পূৰণ চন্দ্ৰ ৰায়, কাকৈজানা মজলীয়া বিদ্যালয়ৰ প্ৰধান শিক্ষক দ্বীপেন ৰায়, নিখিল ৰাভা সাহিত্য সভাৰ৷বঙাইগাঁও জিলা সমিতিৰ প্ৰাক্তন সভাপতি ভৱেশ্বৰ ৰাভা, অধ্যাপক প্ৰাণজিৎ কলিতা,গুৱাহাটী উচ্চ ন্যায়ালয়ৰ জ্যেষ্ঠ অধিবক্তা অতুল চন্দ্ৰ শৰ্মা, অধিবক্তা দিলীপ চক্ৰৱৰ্তী প্ৰমুখ্যে ভালে সংখ্যক শৰ্মাদেৱৰ গুণমুগ্ধ উপস্থিত থাকে ৷ অনুষ্ঠানৰ আঁত ধৰে অসম সাহিত্য সভাৰ কেন্দ্ৰীয় কাৰ্যনিৰ্বাহক সদস্য  কামাখ্যা প্ৰসাদ ৰায়ে ৷ অনুষ্ঠানৰ আৰম্ভণিতে আদৰণি ভাষণ আগবঢ়ায় তেখেতৰ মাজু জোঁৱাই দিলীপ চক্ৰৱৰ্তীয়ে আৰু শলাগৰ শৰাই জ্ঞাপন কৰে অঞ্চলটোৰ যুৱ সমাজকৰ্মী মনোহৰি ৰায়ে ৷🔯