🔯বঙাইগাঁৱত ২৭ নৱেম্বৰৰ পৰা তিনিদিনীয়া কাৰ্যসূচীৰে চি আই টি ইউৰ ৰাজ্যিক সন্মিলন🔯

🔯বঙাইগাঁৱত ২৭ নৱেম্বৰৰ পৰা তিনিদিনীয়া কাৰ্যসূচীৰে চি আই টি ইউৰ ৰাজ্যিক সন্মিলন🔯

📝বঙাইগাঁওঃ ২৮ আগষ্টঃ সংগ্ৰামী শ্ৰমিক সংগঠন চি আই টি ইউৰ চতুৰ্দশ অসম ৰাজ্যিক সন্মিলনখন এইবেলি অহা ২৭ নৱেম্বৰৰ পৰা তিনিদিনীয়া কাৰ্যসূচীৰে বঙাইগাঁও চহৰত অনুষ্ঠিত হ'ব। সেই উপলক্ষে দেওবাৰে বঙাইগাঁও চহৰৰ পাগলাস্থান ৰে'লৱে পেঞ্চনাৰ ভৱনত অভ্যৰ্থনা সমিতি গঠনৰ উদ্দেশ্যে এখন সাধাৰণ সভা অনুষ্ঠিত হয় । উক্ত সভাত চি আই টি ইউ ৰ ৰাজ্যিক সভাপতি আৰু সাধাৰণ সম্পাদক অসিত দত্ত আৰু তপন শৰ্মা উপস্থিত থাকে । বঙাইগাঁও জিলাৰ বিভিন্ন শ্ৰমিক - কৰ্মচাৰী সংগঠন তথা গণসংগঠন সমূহৰ ডেৰ  শতাধিক প্ৰতিনিধি উপস্থিত থকা সভাখন পৰিচালনা কৰে গণতান্ত্ৰিক আন্দোলনৰ নেতা পৰিমল চক্ৰৱৰ্তীয়ে । 

সভাত ৰাজ্যিক আৰু জিলা নেতৃত্বই বৰ্তমান সমসাময়িক, সামাজিক, অৰ্থনৈতিক আৰু ৰাজনৈতিক পৰিস্থিতিৰ বিশ্লেষণ কৰাৰ লগতে শ্ৰমিক শ্ৰেণীৰ দায়িত্ব আৰু কৰ্তব্যৰ কথা বহল ভাবে আলোচনা কৰে । শেষত সন্মিলনখন সুচাৰুৰূপে পৰিচালনা কৰিবলৈ বঙাইগাঁৱৰ জ্যেষ্ঠ চিকিৎসক ডাঃ এচ কে দাস ক সভাপতি, অধিবক্তা তথা শ্ৰমিক নেতা হৰেশ্বৰ দাসক কাৰ্য্যকৰী সভাপতি আৰু সমাজকৰ্মী তথা গণতান্ত্ৰিক আন্দোলনৰ নেতা সঞ্জীৱ দেবক সম্পাদক হিচাপে লৈ এখন ১০০ জনীয়া অভ্যৰ্থনা সমিতি আৰু উপ সমিতি সমূহ গঠন কৰে । উল্লেখ্য যে উক্ত সন্মিলনখন সৰ্বতোপ্ৰকাৰে সাফল্যমণ্ডিত কৰি তুলিবলৈ অভ্যৰ্থনা সমিতিয়ে সমগ্ৰ বঙাইগাঁও জিলাবাসী ৰাইজৰ সহায় সহযোগিতা কামনা কৰিছে ।🔯