🔯ৰে'ল বিভাগৰ মাটি অধিগ্ৰহণ🔯

🔯ৰে'ল বিভাগৰ মাটি অধিগ্ৰহণ🔯

🔯বঙাইগাঁও জিলা উপায়ুক্ত কাৰ্যালয়ৰ হেমাহিৰ বাবে মাটিৰ গৰাকীয়ে দীৰ্ঘদিন ধৰি পোৱা নাই ক্ষতি পূৰণঃ মুখ্যমন্ত্ৰীৰ হস্তক্ষেপ দাবী🔯

📝বঙাইগাঁওঃ ২ ছেপ্টেম্বৰঃ নিউ ময়নাগুৰি - যোগীঘোপা ৰে'লপথৰ বাবে প্ৰশাসনৰ সহযোগত বঙাইগাঁও জিলাত ৰে'ল বিভাগে অধিগ্ৰহণ কৰা ভূমিৰ বিপৰীতে বহু পৰিয়ালে আজিও উপযুক্ত ক্ষতি পূৰণ নোপোৱাকৈ আছে ৷ জিলাখনৰ উত্তৰ শালমাৰা মহকুমাত এনে ঘটনা সংঘটি় হৈছে ৷ চৰকাৰী প্ৰকল্পৰ বাবে মাটি দিয়াৰ পিছত আজিকোপতি সেই মাটিৰ উপযুক্ত ক্ষতি পূৰণ লাভৰ পৰা বঞ্চিত হৈ থাকিবলগীয়া বহু পৰিয়াল ৷ শুকুৰবাৰে বৃহত্তৰ বঙাইগাঁও প্ৰেছ ক্লাবত এইদৰে ক্ষতি পূৰণৰ পৰা বঞ্চিত হৈ থকা জ্যোৎস্না ৰায়ৰ স্বামী ৰবি ৰায়ে এখন সংবাদ মেল আয়োজন কৰি এই কথা সদৰি কৰে ৷ সংবাদ মেলত ৰবি ৰায়ে উল্লেখ কৰা মতে বঙাইগাঁও জিলাৰ উত্তৰ শালমাৰাৰ প্ৰথম খণ্ডত তেওঁৰ পত্নী জোৎস্না বালা ৰায়ৰ নামত থকা  (দাগ নং পুৰণি ৬১ নতুন ৭২,  পুৰণি ১১৮/২৩০ নতুন ২৬৮ নং পট্টাৰ ) ২ বিঘা মাটিৰ ৩ কঠা ১০ লেছা মাটি ৰে'ল পথৰ বাবে বঙাইগাঁও জিলা প্রশাসনে অধিগ্রহণ কৰিছে যদিও দীৰ্ঘদিন ধৰি পোৱা নাই উচিত ক্ষতিপূৰণ ৷ এই মাটিখিনি প্ৰশাসনে অধিগ্ৰহণ কৰাৰ পাছত এই মাটি ডোখৰৰ মাজেদি স্থাপন কৰা হৈছে যোগীঘোপা -নিউ ময়নাগুৰি সংযোগী  ৰে'লপথ ৷ পানী যোৱাৰ কোনো বাস্তৱসন্মত ব্যবস্থা গ্ৰহণ নকৰি ইয়াত ওখকৈ স্থাপন কৰা হ'ল ৰে'লপথ ৷ মাটি ডোখৰৰ মাজেদি ওখকৈ ৰে'ল পথ স্থাপন কৰাত এই  মাটিৰ দুয়ো কাষে থকা তেওঁৰ চাহগছ, তামোল গছ আৰু অন্যান্য গছবোৰ অতিকৈ পানী জমা হোৱাত গোটেই গছবোৰ মৰি যায় ৷ গছবোৰ নষ্ট হোৱাৰ  কাৰণ হ'ল পানীখিনি ওলাই যোৱাৰ কোনো সুব্যৱস্থা কৰা নাই। সংবাদমেলত ৰবি ৰায়ে জনোৱা মতে অধিগ্ৰহণ কৰা এই মাটিৰ ক্ষতিপূৰণ হিচাপে  বঙাইগাঁও জিলা প্ৰশাসনে ২০১৬ চনত  মাত্র এক লাখ নিৰানব্বৈ হাজাৰ টকা দিব বিচাৰিছিল  ৷ কিন্তু  প্ৰাপ্য মূল্য নোপোৱাত তেওঁলোকে এই ক্ষতিপূৰণ গ্ৰহণ কৰা নাছিল ৷ কাৰণ তাত প্রতিজোপা ফল দিয়া তামোল গছৰ বিপৰীতে ৭ টকাকৈ, প্ৰতিজোপা আমলখিৰ বিপৰীতে ৮০ টকাকৈ, নিমগছৰ বিপৰীতে ৪ টকাকৈ, মূল্যবান অগৰু গছৰ বিপৰীতে ৪২ টকাকৈ আৰু প্ৰতিজোপা চাহ গছৰ মূল্য ৫০ টকাকৈ নিৰ্ধাৰণ কৰি ক্ষতি পূৰণ দিব বিচাৰিছিল ৷ প্ৰশাসনৰ এই কাৰ্যৰ বিৰোধিতা কৰাৰ কাৰণে ২০১৭ চনৰ ফেব্ৰুৱাৰী মাহত এদিন পুৱাই আৰক্ষী বাহিনীৰ লগত উত্তৰ শালমাৰা মহকুমাধিপতি আহি পৰিয়ালসহ তেওঁলোকক অভয়াপুৰী থানালৈ নি গোটেই দিনটো আটক কৰি ৰাখে ৷ তেতিয়াৰ মহকুমাধিপতি গৰাকীয়ে ১২ লাখ টকাৰ ক্ষতিপূৰণ দিব বুলি প্ৰতিশ্ৰুতি দিছিল আৰু তেওঁৰ উচ্চ শিক্ষিত সন্তানক চাকৰি দিয়া হ’ব বুলিও প্ৰতিশ্ৰুতি দিয়া হৈছিল । কিন্তু আজিলৈকে কোনো প্রতিশ্রুতি পূৰণ নকৰিলে। প্ৰতিশ্ৰুতি প্রতিশ্রুতিয়ে হৈ থাকিল। তেওঁ লগতে জনোৱা মতে এই ৰে'ল পথ স্থাপন হোৱাৰ আগতে তেওঁৰ মাটিত থকা চাহ বাগানৰ পৰা  প্রতিমাহে প্ৰায়  ৩০-৩৫ হাজাৰ টকা উপাৰ্জন কৰিছিল । এতিয়া তেওঁ উপাৰ্জনহীন হৈ পৰিছে ৷  উপায়হীন হৈ তেওঁলোকে  আদালতৰ আশ্ৰয় লোৱা বুলি জনায় । কিন্তু ইয়াতেও তেওঁলোক সঠিক ন্যায় পোৱাৰ পৰা বঞ্চিত হৈ আছে বছৰ বছৰ ধৰি ৷ কাৰণ আদালতত জিলা প্ৰশাসনৰ পৰা যি নথি দাখিল কৰিব লাগে সেয়া কৰা নাই জিলা প্ৰশাসনে ৷  তেওঁলোকৰ অধিবক্তাই ইয়াৰ বাবে বঙাইগাঁও জিলা উপায়ুক্তৰ কাৰ্যালয়ত নথি- পত্ৰ কেতিয়াবাই প্ৰেৰণ কৰিছে ৷ কিন্তু সেইবোৰ চকুফুৰাই সাধাৰণ নোটখিনি দিবলৈ জিলা প্ৰশাসনৰ সময় নাই ৷ আজি বহুদিন ধৰি জিলা উপায়ুক্তৰ কাৰ্যালয়ৰ কোনোবা এজন নন্দন নামৰ কৰ্মচাৰীৰ টেবুলতে পৰি আছে ফাইলটো ৷  ৰহস্যজনক ভাবে লৰচৰ হোৱা নাই এই নথি পত্ৰৰ ফাইলটো ৷ যাৰবাবে এই ফাইলটো জিলা উপায়ুক্তৰ টেবুললৈ যোৱা নাই ৷  তেওঁৰ মতে হয়তো উৎকোচ দিলে এই ফাইলটো লৰচৰ কৰিলহেঁতেন। কোনো এজন কৰ্মচাৰীৰ গাফিলতিৰ বাবে দীৰ্ঘদিন ধৰি এই ফাইলটো একেখন টেবুলত পৰি আছে বুলিও জনায় তেওঁ ৷ সেয়ে এই বিষয়টোত তেওঁ মুখ্যমন্ত্ৰী ড° হিমন্ত বিশ্ব শৰ্মাৰ হস্তক্ষেপ বিচাৰিছে ৷ তেওঁ লগতে কয় যে  মুখ্যমন্ত্ৰীয়ে বহুটো কাম কৰি আছে, দুর্নীতিৰ বিৰুদ্ধে কঠোৰ হৈছে ৷ তথাপিতো তেনেহলে আমি হাৰাশাস্তি খাব লগা হৈছে কিয়? কিয় আমাক ন্যায় পোৱাৰ পৰা বঞ্চিত কৰা হৈছে বুলিও কয় ৷ সংবাদ মেলত ৰবি ৰায়ে জনোৱা মতে চৰকাৰী প্ৰকল্পৰ বাবে মাটি দিয়া বঙাইগাঁও জিলাত বহু পৰিয়ালে উপযুক্ত ক্ষতিপূৰণ পোৱা নাই। খগৰপুৰ ৪ র্থ খণ্ডৰ দাগ নং ১৭১ ৰ সুনিল ৰায় নামৰ ব্যক্তিজনৰ মাটি অধিগ্ৰহণ কৰা হ'ল ৷ কিন্তু  ঘৰ-মাটি, তামোল-পাণ, নাৰিকল, আম,কঠাল, ৰবৰ আদি বিভিন্ন ধৰণৰ মূল্যৱান গছ-গছনি আদিৰ কোনো ধৰণৰ ক্ষতিপূৰণ নাপালে পৰিয়ালটোৱে ৷ সকলোৰে যুঁজাৰ শক্তি সামর্থ নাই কাৰণেই এই প্রাপ্যৰ পৰা বঞ্চিত হ'ব লগা হ'ল বুলি দুখ প্ৰকাশ কৰে তেওঁ ৷ৰে'ল আৰু পথ প্ৰকল্পৰ নামত ভূমি অধিগ্ৰহণ আৰু ক্ষতি পূৰণৰ আদায়ৰ নামত জিলীখনত হোৱা অনিয়মৰ তদন্ত কৰিলে সকলো ওলাই পৰিব ৷ তেওঁৰ মতে এনে অনিয়মৰ বিৰুদ্ধে যদি মুখ্যমন্ত্ৰী গৰাকীয়ে বিষয়টো  হস্থক্ষেপ কৰে তেতিয়াহলে সকলো প্ৰকৃত তথ্য উন্মোচিত হ'ব ৷🔯