🔯বঙাইগাঁও জিলা উন্নয়ন সমিতিৰ সভা সম্পন্ন🔯

🔯বঙাইগাঁও জিলা উন্নয়ন সমিতিৰ সভা সম্পন্ন🔯 

📝বঙাইগাঁওঃ ৮  ছেপ্টেম্বৰঃ বঙাইগাঁও জিলা উন্নয়ন সমিতিৰ ছেপ্টেম্বৰ মাহৰ সভাখন বৃহস্পতিবাৰে জিলা উপায়ুক্ত কাৰ্যালয়ৰ সভাকক্ষত অনুষ্ঠিত হৈ যায়। উপায়ুক্ত নবদ্বীপ পাঠকৰ সভাপতিত্বত অনুষ্ঠিত সভাখনত জিলা পৰিষদৰ মুখ্য কাৰ্যবাহী বিষয়া নাদীৰা জেচমিন, জিলা উন্নয়ন আয়ুক্ত ভাস্কৰ দাস, বঙাইগাঁও আৰু অভয়াপুৰী পৌৰসভাৰ কাৰ্যবাহী বিষয়াদ্বয়, সহকাৰী আয়ুক্ত তথা বিভাগীয় মুৰব্বী বিষয়াসকল উপস্থিত থাকে।সভাত  মীন উন্নয়ন, জনস্বাস্থ্য কাৰিকৰী, স্বাস্থ্য, নগৰ আৰু গাঁও পৰিকল্পনা,পয় প্ৰণালী আৰু নগৰ পানী যোগান, ৰেচম, কৃষি, পশুপালন, লোকনিৰ্মাণ পথ, লোকনিৰ্মাণ গৃহ, সমাজ কল্যাণ, জলসিঞ্চন, ভূমি সংৰক্ষণ, হস্ততাঁত আৰু বস্ত্ৰশিল্প, সমবায়, খাদ্য-অসামৰিক যোগান আৰু গ্ৰাহক পৰিক্ৰমা, শিক্ষা, আবকাৰী আদি বিভিন্ন বিভাগৰ উন্নয়নমূলক কাম-কাজৰ পৰ্যালোচনা কৰা হয়।সভাত পঞ্চায়ত আৰু গ্ৰামোন্নয়ন বিভাগৰ লগত জনস্বাস্থ্য কাৰিকৰী বা ৰেচম বিভাগ বা কৃষি বিভাগ আৰু খাদ্য-অসামৰিক যোগান তথা গ্ৰাহক পৰিক্ৰমা বিভাগৰ যিবিলাক সন্মিলিতভাৱে কৰিবলগীয়া কাম আছে তেনেক্ষেত্ৰত বিভাগসমূহক সহযোগিতাৰে কাম কৰিবলৈ উপায়ুক্ত নবদ্বীপ পাঠকে আহ্বান জনায়। 

ৰেচম বিভাগৰ চোম গছ ৰোপণৰ ক্ষেত্ৰত শ্ৰমিকসকলৰ মজুৰি বা চাৰিওফালে লোৰ বেৰ দিয়াৰ ক্ষেত্ৰত পঞ্চায়ত আৰু গ্ৰামোন্নয়ন বিভাগক সহায় কৰিবলৈ জিলা পৰিষদৰ মুখ্য কাৰ্যবাহী বিষয়াক আহ্বান জনায় উপায়ুক্তগৰাকীয়ে। সেইদৰে জনস্বাস্থ্য কাৰিকৰী বিভাগৰ যিবিলাক কামত পঞ্চায়ত আৰু গ্ৰামোন্নয়ন বিভাগৰ সহায় লাগে সেইবিলাক ক্ষেত্ৰত সহায়-সহযোগিতা কৰিবলৈ আহ্বান জনায় উপায়ুক্ত পাঠকে। উপায়ুক্তগৰাকীয়ে বঙাইগাঁও চহৰখন পৰিস্কাৰ আৰু পৰিচ্ছন্ন কৰি ৰাখিবলৈ বঙাইগাঁও পৌৰসভাৰ কাৰ্যবাহী বিষয়াক পৰামৰ্শ দিয়ে। চহৰখনৰ মাজেৰে যোৱা পথৰ মধ্যভাগ (মেডিয়ান) পৰিস্কাৰ কৰি ৰখাৰ ক্ষেত্ৰত লোকনিৰ্মাণ পথ বিভাগক নজৰ দিবলৈ কাৰ্যবাহী অভিযন্তাক পৰামৰ্শ দিয়ে। আনহাতে বঙাইগাঁও পৰিৱেশ উদ্যানখনৰ কাম অতি সোনকালে সমাপ্ত কৰিবলৈ লোকনিৰ্মাণ গৃহ বিভাগক পৰামৰ্শ দিয়ে।তদুপৰি জনস্বাস্থ্য কাৰিকৰী বিভাগৰ জলজীৱন মিছনৰ কামসমূহ যথাসম্ভৱ সোনকালে সম্পূৰ্ণ কৰিবলৈও পৰামৰ্শ দিয়ে উপায়ুক্তগৰাকীয়ে। সভাত বিভাগীয় মুৰব্বী বিষয়াসকল উপস্থিত থাকে।🔯