🔯বঙাইগাঁৱত অসম সাহিত্য সভাৰ সভাপতি ড॰ কুলধৰ শইকীয়া🔯

🔯বঙাইগাঁৱত অসম সাহিত্য সভাৰ সভাপতি ড॰ কুলধৰ শইকীয়া🔯

🔯অকল সভা-সমিতি পাতি থকাটোৱেই অসম সাহিত্য সভাৰ কাম নহয়🔯 

🔯সমালোচনা বেয়া পাব নালাগে, সঁচা কথাবোৰ মানি ল’ব লাগে আৰু মিছা কথাবোৰ শুধৰাই সত্যটো দাঙি ধৰিব লাগে🔯

🔯অসমৰ শ্ৰীৰামপুৰেই অসমীয়া ভাষাৰ সীমাৰেখা নহৈ ভাষাটোক দেশ-বিদেশলৈ লৈ যোৱাৰ পোষকতা🔯 

🔯শিক্ষানুষ্ঠানত পঢ়িলেই ভাষা ৰক্ষা নহয়, ঘৰত মাতৃভাষাৰ অধিক চৰ্চা হোৱাত গুৰুত্বাৰোপ🔯 

📝বঙাইগাঁওঃ ১ ছেপ্টেম্বৰঃ অসম সাহিত্য সভাৰ সভাপতি ড॰ কুলধৰ শইকীয়াই বৃহস্পতিবাৰে বিয়লি বঙাইগাঁও জিলা৷ উপায়ুক্ত কাৰ্যালয়ৰ সভাকক্ষত বঙাইগাঁও জিলা সাহিত্য সভা তথা জিলাখনৰ বিভিন্ন শাখা সাহিত্য সভাৰ বিষয়ববীয়া আৰু আমন্ত্ৰিত বিশিষ্ট ব্যক্তিৰ সৈতে মত-বিনিময় কৰে ৷ অনুষ্ঠানত নিজৰ বক্তব্য দাঙি ধৰি অসম সাহিত্য সভাৰ বৰ্তমানৰ সভাপতিগৰাকীয়ে কয় যে অকল সভা-সমিতি পাতি থকাটোৱেই অসম সাহিত্য সভাৰ কাম নহয়৷ তেওঁ সাহিত্য সভাই কৰা বিভিন্ন কামৰ বিষয়েও কয়৷ অসমৰ বাহিৰত তথা দেশৰ বাহিৰতো অসমীয়া ভাষাৰ বিষয়ে চৰ্চা হোৱা বুলি উল্লেখ কৰি তেওঁ এইক্ষেত্ৰত সভাই কৰি থকা কামৰ বিষয়েও কয়৷ নতুন চামক আগুৱাই অনাৰ লক্ষ্যৰে কাম কৰি যাবলৈ তেওঁ সভাৰ জিলা আৰু শাখা সাহিত্য সভাৰ কৰ্মকৰ্তালৈ আহ্বান জনায়৷ পদবীৰ লোভ ত্যাগ কৰি নতুনৰ বাবে বাট মুকলি কৰি দিব লাগে বুলিও তেওঁ মন্তব্য কৰে৷ অসমৰ শ্ৰীৰামপুৰেই অসমীয়া ভাষাৰ সীমাৰেখা নহয় বুলি উল্লেখ কৰি তেওঁ ভাষাটোক দেশ-বিদেশলৈ লৈ যোৱাৰ পোষকতা কৰে৷ কেৱল শিক্ষানুষ্ঠানত পঢ়িলেই ভাষা ৰক্ষা নহয় বুলি উল্লেখ কৰি ড॰ কুলধৰ শইকীয়াই ঘৰত মাতৃভাষাৰ অধিক চৰ্চা হোৱাত গুৰুত্ব দিয়ে৷ প্ৰতিগৰাকী পিতৃ-মাতৃক এইবিষয়ে সচেতন হ’বলৈ আহ্বান জনাই সভাপতি ড॰ শইকীয়াই কয় আমিয়েই আমাৰ ভাষাক জীয়াই ৰাখিব লাগিব৷ তেওঁ এইবুলিও কয় যে আত্মসমালোচনা নকৰিলে ভাল কাম কৰিব নোৱাৰি৷ অসম সাহিত্য সভা অসমৰ জাতীয় অনুষ্ঠান৷ গতিকে অসমৰ প্ৰতিগৰাকী লোকৰে অনুষ্ঠানটোৰ প্ৰতি মাত মতাৰ, ভাল-বেয়া কোৱাৰ অধিকাৰ আছে বুলিও মন্তব্য কৰি তেওঁ কয় যে সমালোচনা বেয়া পাব নালাগে, সঁচা কথাবোৰ মানি ল’ব লাগে আৰু মিছা কথাবোৰ শুধৰাই সত্যটো দাঙি ধৰিব লাগে৷ তেওঁ লগতে কয় যে সঁচা কথাক যিমানেই ৰং দিয়া নহওক কিয় সঁচায়েই হৈ থাকে আৰু মিছা কথা হাজাৰবাৰ ক’লেও সঁচা হ’ব নোৱাৰে৷ উল্লেখ্য যে মত - বিনিময় অনুষ্ঠানৰ পূৰ্বে অসম সাহিত্য সভাৰ সভাপতি ড॰ কুলধৰ শইকীয়াক বঙাইগাঁও জিলা সাহিত্য সভা, বিভিন্ন শাখা সভা, কাব্যকানন বহুভাষিক কবি সন্মিলনকে আদি কৰি বিভিন্ন অনুষ্ঠানৰ উপৰি কেইবাগৰাকী বিশিষ্ট ব্যক্তিয়ে ফুলাম গামোচা, কোচ ৰাজবংশীৰ গামোচা আৰু কিতাপ আদিৰে সম্বৰ্ধনা জনায়৷ 

বঙাইগাঁও জিলা সাহিত্য সভাৰ সম্পাদক বিনোদ কুমাৰ বৰ্মনে আঁত ধৰা অনুষ্ঠানত বঙাইগাঁও জিলা সাহিত্য সভাৰ সভাপতি ৰমলা ৰায় সৰকাৰ, একাংশ প্ৰাক্তন সভাপতি, জিলা আৰু শাখা সভাৰ বিষয়ববীয়া, কেন্দ্ৰীয় বিষয়ববীয়া অমৰেন্দ্ৰ বৰুৱা, কেইবাগৰাকী লেখক-কবি আদিৰ উপস্থিতিত অনুষ্ঠিত অনুষ্ঠানত অসম সাহিত্য সভাৰ সভাপতি ড॰ কুলধৰ শইকীয়াই চাৰিখন গ্ৰন্থ ক্ৰমে ৰমলা ৰায় সৰকাৰৰ ‘ডাণ্টে আলি ঘিয়েৰিৰ দি ডিভাইন কমেডি হোমাৰৰ ইলিয়াড আৰু অন্যান্য’, বাণী বৰুৱাৰ ‘আবেগ ও অনুভূতিৰ ৰোমন্থন’, ৰাণী দেৱীৰ ‘স্মৃতিৰ ঢৌ’ আৰু ‘কদমফুলীয়া সপোন’ উন্মোচন কৰে৷ ইপিনে সংবাদ মাধ্যমেৰে হোৱা বাৰ্তালাপত মাধ্যম বিতৰ্ক সম্পৰ্কত সভাপতিগৰাকীয়ে কয় যে চৰকাৰৰ মাধ্যম সম্পৰ্কত যিটো সিদ্ধান্ত সেইটো অসমৰ বিভিন্ন সংগঠন, অসম সাহিত্য সভা আৰু অসমৰ ৰাইজে বিৰোধিতা কৰিছে আৰু আমি স্পষ্টভাৱে এই সম্পৰ্কত জনাইছো ৷ চৰকাৰৰ লগত সভাও হৈছে ৷ এতিয়া আমি চাইছো তেওঁলোকে আগলৈ ৰাইজৰ মতামত শুনি কিদৰে কামটো কৰে ৷ অসমৰ মাধ্যম সম্পৰ্কে যিটো কথা এইক্ষেত্ৰত মই ভাবো যে অসমীয়া বা বড়ো মাধ্যম বা অন্যান্য মাধ্যম আছে আটাইৰে যাতে কোনো অনিষ্ট নহয় আৰু এই সম্পৰ্কত এটা সুচিন্তিত সিদ্ধান্ত হ'ব ৷ ইপিনে সাহিত্য সভাৰ নিৰ্বাচন সম্পৰ্কত সাংবাদিকে সোধাত সভাপতিগৰাকীয়ে কয় যে সাহিত্য সভাৰ সাংবিধানিক নীতি- নিময়মতে নিকা আৰু স্বচ্ছ নিৰ্বাচন যাতে হয় তাৰ কাৰণে আমি প্ৰয়াস কৰিছো আৰু মই ভাবো যে আমাৰ যিসকল ভোটাধিকাৰ পোৱা জিলা আৰু শাখা সমিতি আছে আটাইবোৰে সুচিন্তিতভাৱে, নিকা আৰু স্বচ্ছতাৰে ভোট প্ৰদান কৰিব পাৰিব ৷ 🔯