🔯তিনিদিনীয়া ভ্ৰমণসূচী সামৰি গুৱাহাটীলৈ ৰাওনা কেন্দ্ৰীয় মন্ত্ৰী কিৰেণ ৰিজিজু 🔯

🔯তিনিদিনীয়া ভ্ৰমণসূচী সামৰি গুৱাহাটীলৈ ৰাওনা কেন্দ্ৰীয় মন্ত্ৰী কিৰেণ ৰিজিজু 🔯

🔯আমি মাজে মাজে মন্দিৰ দৰ্শন কৰি থাকিব লাগিব ,আশীৰ্বাদ নাপালে কাম কৰিবলৈ শক্তি নাপাম🔯 

 

🔯ভৱিষ্যতে গোটেই বৰপেটা লোকসভা সমষ্টিটো বিজেপিৰ কাৰণে বহুত ভাল হ'🔯ব  

🔯২০২৪ ৰ  ভিতৰত সীমা সমস্যা সমাধান কৰাৰ বাবে চৰকাৰে যথা সম্ভৱ চেষ্টা চলাই আছে

📝বঙাইগাঁওঃ ২১ অক্টোৱৰঃ আমি মাজে মাজে মন্দিৰ দৰ্শন কৰি থাকিব লাগিব ৷ আশীৰ্বাদ নাপালে কাম কৰিবলৈ শক্তি নাপাম ৷ সেই কাৰণে আমি ইয়াত আজি দলৰ স্থানীয় নেতাসকলৰ সৈতে মন্দিৰলৈ আহিছো আৰু ইয়াৰ পৰাই আজিৰ দিনটোৰ কাৰ্যসূচীৰ শুভাৰম্ভ কৰিম ৷ এই মন্তব্য কেন্দ্ৰীয় আইন আৰু ন্যায় মন্ত্ৰী তথা বৰপেটা লোকসভা সমষ্টিৰ তত্বাৱধায়ক কিৰেণ ৰিজিজুৰ ৷ কেন্দ্ৰীয় মন্ত্ৰীগৰাকীয়ে আজি পুৱা জিলাৰ অভিভাৱক মন্ত্ৰী ৰণজিৎ কুমাৰ দাস,  সাংসদ ভূৱনেশ্বৰ কলিতা, নলবাৰীৰ প্ৰাক্তন বিধায়ক অশোক শৰ্মা, জিলা বিজেপিৰ সভানেত্ৰী হিমানী অধিকাৰীসহ দলৰ নেতা - কৰ্মীৰ সৈতে বাঘেশ্বৰী মন্দিৰত উপস্থিত হৈ পূজা - অৰ্চনা কৰি দেৱীক সেৱা আগবঢ়াই সংবাদ মাধ্যমৰ আগত এই মন্তব্য কৰে ৷  উল্লেখ্য যে বৰ্তমান কংগ্ৰেছৰ দখলত থকা বৰপেটা , কলিয়াবৰ আৰু নগাঁও লোকসভা সমষ্টি দখলৰ বাবে উঠিপৰি লাগিছে বিজেপি দলে ৷ এই সমষ্টি তিনিটা দখলৰ বাবে দলৰ কেন্দ্ৰীয় সমিতিয়ে দায়িত্ব অৰ্পণ কৰিছে কেন্দ্ৰীয় আইন আৰু ন্যায় দপ্তৰৰ মন্ত্ৰী কিৰেণ ৰিজিজুক ৷ যাৰ বাবে তিনিদিন ধৰি বঙাইগাঁৱত বাহৰ পাতি আছিল কেন্দ্ৰীয় মন্ত্ৰী গৰাকীয়ে ৷ যোৱা ১৯ অক্টোৱৰত বঙাইগাঁৱত উপস্থিত হৈ জিলা খনৰ বিভিন্ন স্থানত দলীয় কৰ্মকৰ্তা সকলৰ লগত আলোচনাত মিলিতহৈ দলীয় স্থিতিৰ বুজ লয় ৷ ইপিনে তিনিদিনীয়া সাংগঠনিক ভ্ৰমণসূচীৰ আজি অন্তিম দিনা বাঘেশ্বৰী মন্দিৰত পূজা আগবঢ়াই কাৰ্যসূচীৰ শুভাৰম্ভ কৰা কেন্দ্ৰীয় মন্ত্ৰীগৰাকীয়ে বৰপেটা লোকসভা সমষ্টি দখলৰ আশা সন্দৰ্ভত কয় যে  যিমানে কাম কৰিম সিমানে আশাটো বাঢ়িব ৷ কাম নকৰিলে একো নাপায় ৷ যিমানে কষ্ট কৰিম আৰু যিমান ৰাইজক সেৱা আগবঢ়াম সিমানে আমাৰ ৰাজনৈতিক দিশ ভাল হ'ব ৷ ৰাজনীতিটো ক'বলৈ গ'লে সেৱাহে ৷ সেৱা কৰাটোৱে ৰাজনীতি হয় ৷ ৰাজনীতি বুলি কলে একো লাভ নাই, যেতিয়ালৈকে ৰাইজক সেৱা আগনবঢ়াব ৷ ইপিনে বঙাইগাঁৱত বিজেপিৰ সাংগঠনিক দিশ সম্পৰ্কত কয় যে বঙাইগাঁৱত বিজেপিৰ কাৰণে এনে ভাল ৷ কিন্তু আমি নিজে সক্ৰিয় হ'ব লাগে ৷ সেই কাৰণে আহিছো আৰু ভৱিষ্যতে গোটেই বৰপেটা লোকসভা সমষ্টিটো বিজেপিৰ কাৰণে বহুত ভাল হ'ব ৷ মই তেনেকুৱাই দেখিবলৈ পাইছো ৷ বঙাইগাঁওলৈ আহিছে যেতিয়া মিত্ৰতাৰ কথালৈ অগপৰ বিধায়ক ফনীভূষণ চৌধুৰীৰে কিবা আলোচনা কৰিছে নেকি বুলি সাংবাদিকৰ প্ৰশ্নোত্তৰত কেন্দ্ৰীয় মন্ত্ৰীগৰাকীয়ে কয় যে মই ইয়ালৈ মিত্ৰতাৰ কথা আলোচনা কৰিবলৈ অহা নাই ৷ মই ৰাইজে লাভ কৰা সেৱাৰ বুজ ল'বলৈ আহিছো ৷ বিজেপিৰ অংগীকাৰ হ'ল ৰাইজক সেৱা কৰা ৷ সেয়ে যেতিয়া সময় আহিব তেতিয়া মিত্ৰতা, কোনে নিৰ্বাচন খেলিব সকলো হ'ব ৷ এতিয়াতো এই বিষয়ে কবলৈ সময়ো হোৱা নাই ৷

আনহাতে মূল্যবৃদ্ধি নিয়ন্ত্ৰণাধীন বুলিও কয় ৷ আনহাতে অভিভাৱক মন্ত্ৰী ৰণজিৎ কুমাৰ দাসে কয় যে গোটেই ভাৰতবৰ্ষত আগন্তুক লোকসভা নিৰ্বাচনত নতুনকৈ এশখন আসন দখলৰ বাবে লক্ষ্য লোৱা হৈছে ৷ তাৰ ভিতৰত অসমৰ বৰপেটা, নগাঁও আৰু কলিয়াবৰ সমষ্টি তিনিটা বিজেপিৰ দখললৈ অনাটো বিচাৰিছে ৷ তাৰ বাবে তৃণমূল পৰ্যায়ত কৰিবলগীয়া কাম - কাজ কৰি থকা হৈছে ৷ কেন্দ্ৰীয় মন্ত্ৰী কিৰেণ ৰিজিজুক এই তিনিটা লোকসভা সমষ্টিৰ দায়িত্ব অৰ্পণ কৰিছে ৷ সেইমতে দলৰ নেতা হিচাপে দলৰ যি  সাংগঠনিক সুদৃঢ় কৰিবলগীয়া আছে সেইখিনি কৰাৰ লগতে দলৰ গতি বিধিসমূহ লক্ষ্য কৰিব আৰু দল আৰু চৰকাৰক পৰামৰ্শ আগবঢ়াব ৷ নিৰ্বাচন অনুষ্ঠিত নোহোৱালৈকে তেওঁ এই কাম কৰি যাব ৷ বৰপেটা সমষ্টিটোৰ কথা সকলোৱে জানেই, সেয়ে বিজেপি ওপৰত  সকলোৱে বিশ্বাস ৰাখিব বুলিও আশা ব্যক্ত কৰে ৷ আনহাতে সমষ্টিটোৰ পৰা  অগপ- বিজেপি মিত্ৰদলৰ কোনে নিৰ্বাচন খেলিব সেয়া বিজেপিৰ ৰাষ্ট্ৰীয় সমিতি আৰু অগপৰ কেন্দ্ৰীয় সমিতিয়ে সিদ্ধান্ত ল'ব বুলি কয় ৷ অভিভাৱক  মন্ত্ৰীগৰাকীয়ে ৰাজ্যিক সভাপতিয়ে লোকসভা নিৰ্বাচনত মিছন ১২ লক্ষ্য বান্ধি লৈছে যদিও ১৪ খন আসনেই মিত্ৰদলে লাভ কৰিব বুলি আশা ব্যক্ত কৰে ৷ ইপিনে বাঘেশ্বৰ মন্দিৰৰ পৰা কেন্দ্ৰীয় মন্ত্ৰীগৰাকীয়ে বঙাইগাঁৱৰ সন্যাসী পাহাৰত নিৰ্মীয়মান বঙাইগাঁও অভিযান্ত্ৰিক মহাবিদ্যালয়ৰ কাম কাজৰ অগ্ৰগতিৰ বুজ লয় ৷ ইয়াৰ পিচতে তেওঁ ছিপনছিলাৰ লক্ষ্মী মন্দিৰ প্ৰাংগণত আয়োজিত এক দলীয় কাৰ্যসূচীত ভাগ লয় ৷ ছিপনছিলাৰ পৰা ওভতি আহি কেন্দ্ৰীয় মন্ত্ৰীগৰাকীয়ে জিলা বিজেপি কাৰ্যালয়ত উপস্থিত হৈ এখন সংবাদ মেল সম্বোধন কৰে ৷ সংবাদ মেলত কেন্দ্ৰীয় মন্ত্ৰীগৰাকীয়ে কয় যে বঙাইগাঁৱত মই অহাৰ বাবে মোৰ বহুত লাভ হ'ল ৷ বহু বিষয় পৰ্যালোচনা কৰাৰ বাবে সুবিধা পাইছো ৷ এই তিনিদিনত মই যি যি স্থানত গৈছো তাতে বিভিন্ন সংগঠন, এন জি অৰ পৰা বিভিন্ন তথ্য সংগ্ৰহ তথা জানিব পাৰিছো ৷ জিলা প্ৰশাসনৰ পৰা কেন্দ্ৰীয় চৰকাৰৰ অধীনৰ চলি থকা বিভিন্ন আঁচনি ৰূপায়ণ সন্দৰ্ভত বুজ লৈছো আৰু ৰূপায়ণৰ কাম ভালদৰে চলি আছে ৷ তেওঁ কয় যে ৰাইজৰ লগত কথা পাতি বুজিব পাৰিছো যে চৰকাৰৰ কাম- কাজকলৈ ৰাইজ সুখী ৷ কিন্তু যিহেতু আমাৰ ইয়াত স্থানীয় বিধায়ক নাই, সাংসদ নাই সেয়ে এটা সুৰুঙা দেখিবলৈ পাইছো ৷ কাৰণ চৰকাৰে যেতিয়া এখন আঁচনি ঘোষণা কৰে তেতিয়া যদি কোনো হিতাধিকাৰীয়ে তাৰ সুবিধা নাপায় তেতিয়াহলে তেওঁলোকে প্ৰশ্ন কৰে যে আমি কিয় সুবিধা পোৱা নাই ৷ ইয়াৰ কাৰণে বিভাগ আৰু হিতাধিকাৰীৰ মাজত যোগসূত্ৰ স্থাপনৰ বাবে বিধায়ক, সাংসদ লাগিছিল ৷ সেয়ে অলপ কষ্ট আছে ৷ আগলৈ আমি দলৰ বিধায়ক, সাংসদৰ ব্যৱস্থা কৰিম ৷ লগতে ৰাজনৈতিক দল হোৱাৰ কাৰণে আমাৰ এটা লক্ষ্য থাকেই যে ভৱিষ্যতে আমাৰ দলৰ বিধায়ক হ'ব লাগে, সাংসদ হ'ব লাগে ৷ আমাৰ দলৰ ভৱিষ্যৎ ভাল দেখিছো বুলিও কয় ৷ 

আনহাতে সাংবাদিকে অসম - অৰুণাচলৰ সীমা সমস্যা সন্দৰ্ভত প্ৰশ্ন কৰাত কেন্দ্ৰীয় আইন আৰু ন্যায় মন্ত্ৰী কিৰেণ ৰিজিজুৱে কয় যে উত্তৰ পূৰ্বাঞ্চলৰ অসম অৰুণাচল,  অসম মেঘালয়, অসম নাগালেণ্ড আদি কৰি ৰাজ্যসমূহৰ মাজত সীমা সমস্যা আছে ৷ কিন্তু এইটো আমি সৃষ্টি কৰা নাই ৷ পূৰ্বৰ পৰাই চলি আহিছে ৷ ইয়াৰ পূৰ্বে কোনো এখন চৰকাৰে এই সীমা সমস্যাটো সমাধান কৰাৰ বাবে কোনো পদক্ষেপ গ্ৰহণ নকৰাৰ ফলত আজি এটা সমস্যা হিচাপে গা কৰি উঠিছে ৷ এসময়ত অৰুণাচল অসমৰ ভিতৰতেই আছিল ৷ কিন্তু অসমৰ পৰা অৰুণাচল পৃথক ৰাজ্য গঠন হোৱাৰ সময়ছোৱাত সীমাটো ভালকৈ চিহ্নিত কৰি সীমা নিৰ্ধাৰণ কৰা নাছিল ৷ যাৰ বাবে এই সমস্যা সমাধান কৰোতে দীৰ্ঘ সময় লগা হৈছে ৷ চৰকাৰে সীমা বিবাদ নিষ্পত্তি কৰাৰ বাবে আলোচনা চলাই গৈছে ৷ ২০২৪ ৰ  ভিতৰত যথা সম্ভৱ এই সমস্যা সমাধান কৰাৰ বাবে চৰকাৰে চেষ্টা চলাই থকা বুলি মন্ত্ৰী গৰাকীয়ে জানিবলৈ দিয়ে ৷ লগতে মন্ত্ৰী গৰাকীয়ে জনোৱা মতে তেওঁ আজি বঙাইগাঁৱত নিৰ্মীয়মান বঙাইগাঁও অভিযান্ত্ৰিক মহাবিদ্যালয়ৰ কাম কাজৰ অগ্ৰগতিৰ বুজ লয় ৷ কেন্দ্ৰীয় মন্ত্ৰী গৰাকীৰ মতে বঙাইগাঁও অভিযান্ত্ৰিক মহাবিদ্যালয়ৰ কাম কাজ সঠিক ৰূপেই অগ্ৰগতি হৈ আছে ৷ ২০২৪ চনৰ ভিতৰত এইখন অভিযান্ত্ৰিক মহাবিদ্যালয়খন  উদ্ধোধন কৰা সম্ভৱ হ'ব বুলিও আশা ব্যক্ত কৰে ৷ সংবাদ মেলত মন্ত্ৰী ৰঞ্জিত কুমাৰ দাস , সাংসদ ভূৱনেশ্বৰ কলিতা , প্ৰাক্তন বিধায়ক অশোক শৰ্মা , বঙাইগাঁও জিলা বিজেপিৰ সভানেত্ৰী হিমানী অধিকাৰীসহ দলৰ  কেবাজনো কৰ্মকৰ্তা উপস্থিত আছিল ৷ সংবাদ মেলৰ পিচত কেন্দ্ৰীয় মন্ত্ৰীগৰাকীয়ে উত্তৰ বঙাইগাঁওস্থিত প্ৰগতি ভৱনত বঙাইগাঁৱৰ ব্যবসায়ী মহলৰ সৈতে এক মত বিনিময় অনুষ্ঠানতো মিলিত হোৱাৰ লগতে জিলা পুথিভঁৰাল প্ৰেক্ষাগৃহত আয়োজিত বিভিন্ন আঁচনিৰ হিতাধিকাৰীসকলৰ সৈতে মত বিনিময় অনুষ্ঠানত অংশ লয় ৷ ইয়াৰ পিচত কেন্দ্ৰীয় মন্ত্ৰীগৰাকী বিয়লিৰ ভাগত নিজৰ তিনিদিনীয়া সাংগঠনিক ভ্ৰমণসূচী সামৰি গুৱাহাটী অভিমুখে যাত্ৰা কৰে ৷ যাত্ৰাকালত চিৰাং জিলাৰ বিজনীৰ দলীয় বিধায়কৰ আমন্ত্ৰণ ক্ৰমে বিজনীত সোমাই চলি থকা লক্ষ্মী পূজা দৰ্শন কৰি যায় ৷ 🔯