🔯উত্তৰ পূৱ সীমান্ত ৰে’লৱে মজদুৰ ইউনিয়নৰ বঙাইগাঁও শাখাৰ অধিবেশন সম্পন্ন🔯

🔯উত্তৰ পূৱ সীমান্ত ৰে’লৱে মজদুৰ ইউনিয়নৰ বঙাইগাঁও শাখাৰ অধিবেশন সম্পন্ন🔯

🔯এন এফ ৰে'লৱে মজদুৰ ইউনিয়ন কোনো ৰাজনৈতিক দলৰ দ্বাৰা পৰিচালিত নহয়-- কেন্দ্ৰীয় সভাপতি দিলীপ কুমাৰ চক্ৰৱৰ্তী🔯 

🔯নতুন কমিটি গঠন🔯

📝বঙাইগাঁওঃ ২১ অক্টোবৰঃ উত্তৰ পূৱ সীমান্ত ৰে’লৱে মজদুৰ ইউনিয়নৰ বঙাইগাঁও শাখাৰ ৬০ সংখ্যক অধিবেশন শুকুৰবাৰে বঙাইগাঁৱৰ প্ৰিয়গুপ্তা মেম'ৰিয়েল হলত অনুষ্ঠিত হৈ যায় । বঙাইগাঁও শাখা এনএফ ৰে’লৱে মজদুৰ ইউনিয়নৰ সভাপতি দীপেন বৰাই পুৱা ইউনিয়নৰ পতাকা উত্তোলন কৰাৰ বিপৰীতে ছহিদ বেদীত শ্ৰদ্ধা তৰ্পন কৰে সংগঠটোৰ কাৰ্যকৰী সভাপতি জগদীশ ভট্টাচাৰ্যই । ইয়াৰ পিছতে পুৱা দহ বজাৰ পৰা অনুষ্ঠিত হয় প্ৰতিনিধি সভা ৷ বঙাইগাওঁ শাখা ৰে’লৱে মজদুৰ ইউনিয়নৰ সভাপতি দীপেন বৰাৰ সভাপতিত্বত অনুষ্ঠিত প্ৰতিনিধি সভাত সম্পাদকীয় প্ৰতিবেদন পাঠ কৰে শাখাৰ সম্পাদক শম্ভু প্ৰসাদ দাসে আৰু ইউনিয়নৰ হিচাপ দাখিল কৰে কোষাধ্যক্ষ ৰূপক দেৱে। এন এফ ৰে'লৱে মজদুৰ ইউনিয়নৰ কেন্দ্ৰীয় সভাপতি দিলীপ কুমাৰ চক্ৰৱৰ্তীয়ে প্ৰতিনিধি সভা মুকলি কৰি ট্ৰেড ইউনিয়নৰ ইতিহাস ডাঙি ধৰি কয় যে, ' বিশ্বৰ ট্ৰেড ইউনিয়নৰ ইতিহাস কবলৈ গলে সংগ্ৰামৰ ইতিহাস ক'ব লাগিব । গ্ৰেটবৃটেইন, আমেৰিকা, জাৰ্মান আদি উন্নতশীল দেশতো ট্ৰেড ইউনিয়নসমূহে ইয়াৰ জন্ম লগ্নৰে পৰা শ্ৰমিকৰ হৈ সংগ্ৰাম কৰি অহাৰ বহুতো উদাহৰণ আছে । কিন্তু তেনে সংগ্ৰামৰ বাবে শ্ৰমিকৰ একতাৰ প্ৰয়োজন । ৰাছিয়াত নব্বৈ শতাংশৰো অধিক উদ্যোগিক শ্ৰমিক একেটা ইউনিয়নৰ সদস্যভুক্ত হোৱা হেতুকে তেওঁলোকৰ দাবীৰ প্ৰতি কৰ্তৃপক্ষৰ দৃষ্টি সদায় নিৱদ্ধ থাকিবলৈ বাধ্য হয় ।' তেওঁ লগতে কয় যে, ভাৰতবৰ্ষত শ্ৰমিক সকল বহুধা বিভক্ত হোৱা বাবে আমি বহুধৰণৰ সমস্যাত পৰিছো । প্ৰায় বিলাক শ্ৰমিক সংগঠনেই কোনো নহয় কোনো ৰাজনৈতিক দলৰ দ্বাৰা পৰিচালিত হোৱা বাবে বহুক্ষেত্ৰত শ্ৰমিক আন্দোলন দুৰ্বল হোৱা দেখা গৈছে । ভাৰতীয় ৰে'লৱেত অকল মাত্ৰ অল ইণ্ডিয়া ৰে'লৱে মেনচ ফেডাৰেচন (এ আই আৰ এফ)  আৰু এন এফ ৰে'লৱে মজদুৰ ইউনিয়নেই একমাত্ৰ শ্ৰমিক সংগঠন, যিটো সংগঠন কোনো ৰাজনৈতিক দলৰ দ্বাৰা পৰিচালিত নহয় । সেই কাৰণেই এ আই আৰ এফ আৰু এন এফ ৰে'লৱে মজদুৰ ইউনিয়নে যি কোনো ৰাজনৈতিক দলৰ চৰকাৰৰ কাৰ্যকালত ৰে'ল শ্ৰমিকৰ স্বাৰ্থ জড়িত দাবীসমূহ সমাধানৰ বাবে আন্দোলন কৰি আহিছে । ইউনিয়নৰ সদস্য সকলৰ প্ৰতি আহ্বান জনাই সভাপতি চক্ৰৱৰ্তীয়ে কয় যে, 'এটা অৰাজনৈতিক শ্ৰমিক সংগঠন হিচাপে আমি আমাৰ সাংগঠনিক শক্তি অধিক মজবুত আৰু সম্প্ৰসাৰিত কৰিব লাগিব যাতে শ্ৰমিকৰ সমস্যা সমূহ সমাধান কৰিবলৈ চৰকাৰক বাধ্য কৰাব পাৰো ।' তেওঁ নতুন পেঞ্চন নীতিৰো তীব্ৰ বিৰোধিতা কৰে । 

আনহাতে সাধাৰণ সম্পাদক আশীষ বিশ্বাসে কয় যে ৰে'ল শ্ৰমিকৰ স্বাৰ্থ জড়িত দাবী সমূহলৈ এন এফ ৰে'লৱে মজদুৰ ইউনিয়নে সদায়ে মাত মাতি আহিছে । তেওঁ কয় যে আমাৰ বহুবোৰ দাবী এতিয়াও অমীমাংসিত হৈ আছে । চৰকাৰে ইচ্ছাকৃতভাবেই দাবী বোৰ মানি নলৈ শ্ৰমিক বিৰোধী স্থিতি গ্ৰহণ কৰিছে । বৰ্তমানৰ বিজেপি চৰকাৰৰ ভুল নীতিৰ ফলত সৰ্বসাধাৰণে জীয়াতু ভুগিব লগীয়া হৈছে । ৰে'ল বক্তিগতকৰণৰ ফলত যাত্ৰী ভাড়া অত্যাধিক বৃদ্ধি হোৱাৰ লগতে ৰে'ল ষ্টেচনত প্ৰৱেশৰ বাবে ল'ব লগীয়া টিকটৰ মূল্যও দুগুণ আদায় দিবলগীয়া হৈছে । ষ্টেচনত জিৰণি লবলৈও পইচা ভৰিব লগা হৈছে । অত্যাৱশ্যকীয় সামগ্ৰীৰ চৰা দামে জনসাধাৰণক জুৰুলা কৰিছে । নিবনুৱা সমস্যা সমাধান কৰা দূৰৈৰ কথা বিভাগ সমূহত পদ কৰ্তন কৰি নিবনুৱাক ভাতে মৰাৰহে ব্যৱস্থা কৰিছে । নেতা গৰাকীয়ে চৰকাৰৰ এনে জনবিৰোধী নীতি সমূহৰ বিৰোধিতা কৰি কয়, শ্ৰমিক সংগঠন হিচাপে আমি দেশবাসীৰ হৈ আন্দোলন কৰিবলৈ প্ৰস্তুত হ'ব লাগিব । সভাত কেন্দ্ৰীয় যুটীয়া সাধাৰণ সম্পাদক পৰিতোষ পাল, সহকাৰী সাধাৰণ সম্পাদক সুচেন হাজৰিকা, সাংগাঠনিক সম্পাদক কল্লোল দেৱ শৰ্মা, অৰ্থনীতিবিদ ড° প্ৰণব কুমাৰ ধৰ, এ আই আৰ ই চি আৰু পেঞ্চনাৰ এছোচিয়েচনৰ স্থানীয়  নেতা আদিয়ে সভাত বক্তব্য ৰাখে । একেখন সভাত  অভিজিৎ বিশ্বাসক সভাপতি, অনুপ কুমাৰ ৰায়ক কাৰ্যকৰী সভাপতি, উমেদ বাচফোৰক সম্পাদক, ৰূপক দেৱক কোষাধ্যক্ষ হিচাপে লৈ বঙাইগাওঁ শাখাৰ এখন নতুন কমিটি গঠন কৰা হয় । তদুপৰি এই সভাতেই সুব্ৰত দেক সভাপতি আৰু ৰাজেশ দেক সম্পাদক হিচাপে লৈ ইউনিয়নৰ বঙাইগাওঁ যুৱ কমিটিখনো গঠন কৰা হয় ।🔯