🔯অসম ক্ষুদ্ৰ ঋণ উদগনি আৰু সকাহ আঁচনি🔯

🔯অসম ক্ষুদ্ৰ ঋণ উদগনি আৰু সকাহ আঁচনি🔯 

🔯বঙাইগাঁৱত হিতাধিকাৰীক মন্ত্ৰী ৰণজিৎ দাসৰ চেক বিতৰণ🔯 

📝বঙাইগাঁওঃ ৩০  অক্টোবৰঃ যিসকলে ঋণ লৈ ঋণ ঘূৰাই দিব নোৱাৰে তেওঁলোকক যদি আল্লা আৰু ভগৱানে কয় যে আৰু ঋণ লওক , তাৰ পিচতো যাতে ঋণ নলয় ৷ কাৰণ দ্বিতীয়বাৰ আপোনালোকে ফচিব ৷ ঋণ লৈ পৰিশোধ কৰিব নোৱাৰিলে বেংকৰ মানুহে চোঁচৰাই লৈ যাব ৷ ভাগ্য ভাল এইবাৰ আমি আছো কাৰণে বেংকৰ মানুহখিনিক বুজালো আৰু নিৰ্বাচনত দিয়া প্ৰতিশ্ৰুতি অনুসৰি মুখ্যমন্ত্ৰীয়ে সকাহ দিলে ৷ কিন্তু পৰৱৰ্তী সময়তো যদি ঋণ লৈ থাকে আৰু ঋণ পৰিশোধ নকৰে তেতিয়াহলে নিজে নিজৰ ভৰিত কুঠাৰ মৰা হ'ব ৷ এই মন্তব্য খাদ্য, অসামৰিক যোগান আৰু গ্ৰাহক পৰিক্ৰমা,পঞ্চায়ত আৰু গ্ৰামোন্নয়ন তথা সাধাৰণ প্ৰশাসন আদি বিভাগৰ মন্ত্ৰী ৰণজিৎ কুমাৰ দাসৰ ৷ দেওবাৰে অসম ক্ষুদ্ৰ ঋণ উদগনি আৰু সকাহ আঁচনিৰ অধীনত দ্বিতীয় পৰ্যায়ত বঙাইগাঁও জিলাৰ পাঁচ শতাধিক হিতাধিকাৰীক ক্ষুদ্ৰ ঋণ সকাহ হিচাপে আনুষ্ঠানিকভাৱে চেক প্ৰদানৰ শুভাৰম্ভ কৰি মন্ত্ৰীগৰাকীয়ে এইদৰে কয় ৷ উল্লেখ্য যে বৰ্তমানৰ অসমৰ মুখ্যমন্ত্ৰী আৰু পূৰ্বৰ বিত্ত মন্ত্ৰী হিমন্ত বিশ্ব শৰ্মাই দুখীয়া মহিলাক বিগত বিধানসভা নিৰ্বাচনত প্ৰতিশ্ৰুতি দিছিল যে তেওঁলোকৰ ক্ষুদ্ৰ ঋণৰ ক্ষেত্ৰত সকাহ দিয়া হ'ব। সেই নিৰ্বাচনী প্ৰতিশ্ৰুতি পূৰণৰ চিন স্বৰূপে কেইমাহমান আগতে প্ৰথম পৰ্যায়ত মুখ্যমন্ত্ৰীৰ অসম ক্ষুদ্ৰ ঋণ উদগনি আৰু সকাহ আঁচনিৰ অধীনত ২৫  হেজাৰকৈ টকাৰ চেক দিয়া হৈছিল আৰু দ্বিতীয় পৰ্যায়ত  ২৮ অক্টোবৰৰ পৰা ৩১ অক্টোবৰলৈ ৰাজ্যখনৰ দুখীয়া মহিলাসকলক ক্ষুদ্ৰ ঋণ উদগনি আৰু সকাহ হিচাপে ২০ হেজাৰকৈ টকাৰ চেক বিতৰণ কৰাৰ ব্যৱস্থা কৰা হৈছে। বঙাইগাঁও জিলাৰ মুঠ ১,৭৩৬ (এহেজাৰ সাত শ ছয়ত্ৰিশ)গৰাকী হিতাধিকাৰীৰ ভিতৰত দেওবাৰে এই ক্ষুদ্ৰ ঋণ সকাহ হিচাপে ৫০০ হিতাধিকাৰীক আনুষ্ঠানিকভাৱে চেক প্ৰদানৰ মন্ত্ৰী ৰণজিৎ কুমাৰ দাসে শুভাৰম্ভ কৰে ৷ এই উপলক্ষে বঙাইগাঁও জিলা পুথিভঁৰাল প্ৰেক্ষাগৃহত আয়োজিত চেক প্ৰদান অনুষ্ঠানত ভাষণ প্ৰদান কৰি মন্ত্ৰী ৰণজিৎ কুমাৰ দাসে লগতে কয় যে অসমৰ মুখ্যমন্ত্ৰীৰ দুখীয়া মহিলাসকলৰ প্ৰতি থকা সদিচ্ছাৰ বাবেই তেওঁ এইদৰে ক্ষুদ্ৰ ঋণ সকাহ দিয়াৰ ব্যৱস্থা কৰিছে। আজি এইদৰে মহিলাসকলে বেংকৰ জৰিয়তে আঁচনিৰ ধন লাভ কৰি উপকৃত হ'ব পাৰিছে ভাৰতৰ প্ৰধানমন্ত্ৰী নৰেন্দ্ৰ মোডীৰ আহ্বানত খোলা জন-ধন একাউন্টৰ বাবে। নগদ ধনবিহীনভাৱে খোলা এই একাউন্টৰ অধীনত আজি দুখীয়া মহিলাসকলে বিভিন্ন আঁচনিৰ ধন লাভ কৰিছে। মন্ত্ৰীগৰাকীয়ে কয় যে ভগৱান বা আল্লাৰ পিছতে স্থান দিব পৰা যদি কোনোবা আছে তেনেহ'লে সেইজনেই ভাৰতৰ প্ৰধানমন্ত্ৰী নৰেন্দ্ৰ মোডী।তেওঁ দুখীয়া মহিলাসকলক বিনামূলীয়া চাউল,শৌচাগাৰ,গেছ সংযোগ আৰু বিদ্যুৎ,খোৱা পানী,আৱাস গৃহ(প্ৰধানমন্ত্ৰী আৱাস গৃহ যোজনাৰ অধীনত) আদি দি এখন ঘৰত প্ৰয়োজনীয় সকলো সুবিধা প্ৰদান কৰিছে।দুখীয়া লোকক চিকিৎসাৰ সুব্যৱস্থা কৰি দিছে আয়ুষ্মান ভাৰত আঁচনিৰ জৰিয়তে। আজি দেশখনৰ কৃষকসকলক পিএম কিষাণ সম্মান নিধি আঁচনিৰ অধীনত কৃষকক ২০০০ (দুহেজাৰ)টকাকৈ ৩  টা কিস্তিত মুঠ ৬০০০ (ছয় হেজাৰ) টকাকৈ প্ৰদান কৰিছে কৃষি কৰ্মত সহায় হোৱাকৈ। আনহাতে তেওঁৰ পদাংক অনুসৰণ কৰিয়েই অসমৰ মুখ্যমন্ত্ৰী হিমন্ত বিশ্ব শৰ্মাই দুখীয়া মহিলাসকলক এনেদৰে ক্ষুদ্ৰ ঋণ উদগনি আৰু সকাহ দিয়াৰ ব্যৱস্থা কৰিছে।

মন্ত্ৰী দাসে আৰু কয় যে দুখীয়া মহিলাসকলে ঋণ ল'লে উৎপাদনমূলক কামৰ বাবেহে ল'ব লাগে যাৰ দ্বাৰা তেওঁ ঋণখিনি বেংকক পৰিশোধ কৰিব পাৰে।ঋণ প্ৰদানৰ প্ৰধান উদ্দেশ্যই হৈছে আয় সৃষ্টি। আয় সৃষ্টিৰ জৰিয়তে নিজে স্বাৱলম্বী হোৱাৰ লগতে ৰাজ্যখনৰ অৰ্থনীতিত অৰিহনা যোগাব পাৰে। আজি আত্ম-সহায়ক গোটক পূঁজি দিয়া হয় যাৰ জৰিয়তে আয় সৃষ্টি হয়।আজি মধ্যভোগী নোহোৱাকৈ চৰকাৰে প্ৰত্যক্ষভাৱে বেংক একাউন্টত হিতাধিকাৰীসকলক বিভিন্ন আঁচনিৰ ধন দিছে বুলিও ভাষণ প্ৰসংগত মন্ত্ৰী দাসে কয়। মন্ত্ৰীগৰাকীয়ে অৱশ্যে যিসকল মহিলাই ঋণ লৈ ঋণ ঘূৰাই দিব পাৰে তেওঁলোকক আৰু ঋণ লৈ উৎপাদনমূলক কামৰ জৰিয়তে নিজকে স্বাৱলম্বী হোৱাা বাবেও আহ্বান জনায় ৷ ইপিনে অনুষ্ঠানত বঙাইগাঁও বিধানসভা সমষ্টিৰ বিধায়ক ফণীভূষণ চৌধুৰীয়ে উপস্থিত থাকি ভাষণ প্ৰসংগত কয় যে হিতাধিকাৰীসকলে যদি বেংকৰ পৰা ঋণ লয় তেনেহ'লে সেয়া মটৰ চাইকেল নিকিনি উৎপাদনৰ কামত ব্যৱহাৰ কৰিব লাগে।অন্যথা ঋণ দিয়াৰ উদ্দেশ্য সফল নহয় আৰু ৰাজ্যৰ উন্নয়ন নহয়।আজি আমি নতুন নতুন দিশত আগবাঢ়ি যাব লাগিব।তাৰ বাবে ৰাইজৰ সহযোগিতা লাগিবই।গতিকে ৰাইজ সজাগ হ'ব লাগিব ৷ জিলা উপায়ুক্ত নবদ্বীপ পাঠকে আদৰণি ভাষণ আৰু উদ্দেশ্য ব্যাখ্যা কৰা অনুষ্ঠানত জিলা উন্নয়ন আয়ুক্ত ভাস্কৰ দাস, ভাৰতীয় ষ্টেট বেংকৰ বঙাইগাঁৱৰ মহাপ্ৰবন্ধক ডলী দাস, বঙাইগাঁও পৌৰসভাৰ পৌৰপতি সুবোধ চন্দ্ৰ দাস, অভয়াপুৰী পৌৰসভাৰ পৌৰপতি ৰমেন্দ্ৰ নাথ বনিক্য , সমাজকৰ্মী হিমানী অধিকাৰী আৰু কমতাপুৰ স্বায়ত্ব শাসিত পৰিষদৰ অধ্যক্ষ হিতেশ্বৰ বৰ্মনৰ লগতে হিতাধিকাৰীসকল উপস্থিত থাকে। আনহাতে মন্ত্ৰীগৰাকীয়ে বঙাইগাঁও বিধানসভা সমষ্টিৰ ৪০ নং বুথত ভাৰতীয় জনতা পাৰ্টিৰ কাৰ্যকৰ্তাসকলৰ উপস্থিতিত দেশৰ প্ৰধানমন্ত্ৰী নৰেন্দ্ৰ মোদীৰ জনপ্ৰিয় অনুষ্ঠান "মন কী বাত" শুনাৰ লগতে দোলাইগাঁৱত কমতাপুৰ উন্নয়ন সমিতিয়ে আয়োজন কৰা প্ৰাচীন ভাৰতীয় বৈদিক উৎসৱ "শ্ৰীশ্ৰী ছট পূজা মহোৎসৱ" স্থলীৰ শুভ উদ্বোধনো কৰে ৷🔯