🔯বঙাইগাঁৱত কে এ চিৰ পশুপালন বিভাগৰ উদ্যোগত নিবনুৱা যুৱক - যুৱতীক গাহৰি পালনৰ প্ৰশিক্ষণ🔯

🔯বঙাইগাঁৱত কে এ চিৰ পশুপালন বিভাগৰ উদ্যোগত নিবনুৱা যুৱক - যুৱতীক গাহৰি পালনৰ প্ৰশিক্ষণ🔯 

📝বঙাইগাঁও ১৩ নৱেম্বৰঃ কমতাপুৰ স্বায়ত্ত শাসিত পৰিষদৰ উদ্যোগত দেওবাৰৰ পৰা বঙাইগাঁও পৌৰসভাৰ কাৰ্যালয়ৰ সভা কক্ষত তিনিদিনীয়াকৈ আৰম্ভ হৈছে কমতাপুৰ স্বাৱলম্বী মিছনৰ অধীনত নিবনুৱা যুৱক- যুৱতীসকলক স্ব-নিয়োজনৰ জৰিয়তে আত্মনিৰ্ভৰশীল কৰি তোলাৰ অৰ্থে গাহৰি পালনৰ বিনামূলীয়া প্ৰশিক্ষণ ৷ পশুপালন বিভাগৰ দ্বাৰা আয়োজিত এই প্ৰশিক্ষণ কাৰ্যসূচীত বঙাইগাঁও জিলাৰ বিভিন্ন অঞ্চলৰ মুঠ ৭৭ গৰাকী যুৱক -যুৱতীয়ে অংশগ্ৰহণ কৰিছে ৷ এই উপলক্ষে উদ্বোধনী সভাত উপস্থিত থাকি প্ৰশিক্ষণ কাৰ্যসূচীৰ বন্তি প্ৰজ্বলন কৰি উদ্বোধন কৰে কমতাপুৰ স্বায়ত্ত শাসিত পৰিষদৰ উপাধ্যক্ষ তথা পশুপালন বিভাগৰ দায়িত্বত থকা সুকেন ৰয়ে ৷ তেওঁ কয় যে কমতাপুৰ স্বায়ত্ব শাসিত পৰিষৰ অধীনৰ ধুবুৰী আৰু গোৱালপাৰা জিলাত ইতিমধ্যে গাহৰি পালনৰ প্ৰশিক্ষণৰ কাৰ্যসূচী অনুষ্ঠিত কৰা হৈছে আৰু এই প্ৰশিক্ষণ কাৰ্যসূচীত  নিবনুৱা যুৱক- যুৱতীসকলৰ অংশগ্ৰহণ আশাব্যঞ্জক আছিল ৷ কাৰণ নিজকে পশু পালন বৃত্তিৰ জৰিয়তে স্বাৱলম্বী হৈ আগুৱাই যোৱাৰ বাবে তেওঁলোক আগুৱাই অহা পৰিলক্ষিত হৈছো ৷ 

যিতো সমাজৰ লগতে আমাৰ অঞ্চলটোৰ কাৰণে এটা ভাল দিশ ৷ কাৰণ চৰকাৰী চাকৰিৰ আশা পালি থাকি সময় অতিবাহিত কৰাতকৈ যদি পশুপালনেই হওক বা আন বিষয়ৰ প্ৰশিক্ষণ গ্ৰহণ কৰি সেই বৃত্তিৰ জৰিয়তে নিবনুৱা যুৱক - যুৱতীসকলে স্বাৱলম্বী হোৱাৰ বাবে হাতে কামে লাগি পৰে তেতিয়াহলে নিজৰ লগতে আনৰ বাবেও কৰ্মসংস্থাপনৰ বাট মুকলি কৰিব পাৰে ৷ তেওঁ কমতাপুৰ স্বায়ত্ত শাসিত পৰিষদ এলেকাত বহু সম্ভাৱনা ৰৈ আছে বুলি উল্লেখ কৰি প্ৰশিক্ষণ গ্ৰহণ কৰা সকলো যুৱক- যুৱতীক একাণপতীয়া কৈ কামত লাগিবলৈ আহ্বান জনোৱাৰ লগতে নিজকে স্বাৱলম্বী হোৱাৰ দিশত অগ্ৰসৰ হবলৈ আহ্বান জনায় ৷ অনুষ্ঠানত কে এ চিৰ কাৰ্যবাহী পাৰিষদ অতুল ৰায়, পূৰবী সৰকাৰ, বঙাইগাঁও পৌৰসভাৰ সভাপতি সুবোধ চন্দ্ৰ দাস আদি উপস্থিত থাকি আত্মনিৰ্ভৰ হোৱাৰ দিশত যুৱক যুৱতী সকলে কেনেদৰে প্ৰশিক্ষণ গ্ৰহণ কৰি স্বাৱলম্বী হ'ব পাৰিব তাৰ ওপৰত বক্তব্য ৰাখে ৷ অনুষ্ঠানত পৌৰসভাৰ ৱাৰ্ড কমিচনাৰ মহিলা বৰ্মন, সমাজকৰ্মী দেৱজিৎ বোস আদিও উপস্থিত থাকে ৷ প্ৰশিক্ষণ কৰ্মশালাখনি পৰিচালনা কৰে গুৱাহাটী ছমাইলস্থিত জ্ঞানজ্যোতি ফাউণ্ডেশ্যনে ৷ উল্লেখ্য যে প্ৰশিক্ষণ গ্ৰহণ কৰা যুৱক- যুৱতীসকলক একোখন প্ৰমাণ পত্ৰ প্ৰদান কৰাৰ লগতে  দহজনীয়া একোটা গোট গঠন কৰি অহা বছৰ কেএচিলৈ যি পুঁজি আহিব তাৰ জৰিয়তে গোটসমূহলৈ এককালীনভাৱে তিনি - চাৰিটাকৈ গাহৰিৰ পোৱালী প্ৰদান কৰিব বুলিও উপাধ্যক্ষ ৰয়ে উল্লেখ কৰে ৷🔯