🔯বঙাইগাঁৱত চোৰে লুট কৰি নিয়া সোণৰ গহণাসহ এজনক কৰায়ত্ত🔯

🔯বঙাইগাঁৱত চোৰে লুট কৰি নিয়া সোণৰ গহণাসহ এজনক কৰায়ত্ত🔯 

📝বঙাইগাঁওঃ ১২ নবেম্বৰঃ বঙাইগাঁও আৰক্ষীয়ে শনিবাৰে নিউ বঙাইগাঁৱৰ ভাওলাগুৰিত অভিযান চলাই চুৰি কৰি নিয়া সোণৰ গহণাসহ এজন চোৰক কৰায়ত্ত কৰে ৷ ধৃত চোৰজন তাইজুদ্দিন আলী ৷ উদ্ধাৰ হোৱা সোণৰ গহণাখিনি মনেশ্বৰ ৰায়ৰ গৃহৰ পৰা চুৰি হোৱা গহণা বুলি আৰক্ষীয়ে জানিবলৈ দিছে ৷ উল্লেখ্য যে যোৱা ৪ নবেম্বৰৰ দিন দুপৰতে বঙাইগাঁও চহৰৰ ৫ নং ৱাৰ্ডৰ মনেশ্বৰ ৰায়ৰ গৃহত এক চুৰি কাণ্ড সংঘটিত হৈছিল ৷ উক্ত দিনা গৃহস্থ ঘৰত নথকাৰ সুবিধা গ্ৰহণ কৰি পুৱা প্ৰায় ১১ঃ ২৩ বজাত চোৰে ঘৰৰ দুৱাৰৰ তলা মৰা হুকটো ভাঙি গৃহত প্ৰৱেশ কৰি আলমিৰা খুলি পাঁচটা সোণৰ আঙুঠি, দুডাল সোণৰ চেইন, দুযোৰ সোণৰ গামখাৰু, সোণৰ ৰিং, সোণৰ ঝুমকা আদি চুৰি কৰি নিছিল ৷ কিন্তু চোৰে গৃহত চুৰি কৰিবলৈ সোমোৱা দৃশ্য আৱদ্ধ হৈ ৰয় চিচিটিভি কেমেৰাত ৷ 

পিছত ঘটনা সন্দৰ্ভত মনেশ্বৰ ৰায়ে বঙাইগাঁও সদৰ থানাত এজাহাৰ দাখিল কৰাত আৰক্ষীয়ে তদন্ত অব্যাহত ৰাখে আৰু অৱশেষত চুৰি কাৰ্য সংঘটিত কৰা তাইজুদ্দিন আলীক কৰায়ত্ত কৰে ৷ লগতে তাইজুদ্দিনৰ ভাড়া ঘৰৰ পৰা চুৰি কৰি নিয়া প্ৰায় সংখ্যক সোণৰ গহণা উদ্ধাৰ কৰিবলৈ সক্ষম হয় ৷ আৰক্ষীয়ে জানিবলৈ দিয়া মতে ধৃত চোৰ তাইজুদ্দিন আলীৰ প্ৰকৃত ঘৰ মইনবড়ীত যদিও নিউ বঙাইগাঁৱৰ ভাওলাগুৰিত ভাড়া থাকি বিভিন্ন চুৰি কাৰ্য সংঘটিত কৰি আহিছে ৷ আৰক্ষীয়ে ধৃত চোৰজনৰ সৈতে আৰু কোনোবা জড়িত আছে নেকি সেয়া উদঘাটনৰ বাবে জেৰা অব্যাহত ৰাখিছে ৷🔯