🔯বঙাইগাঁৱত দুৰ্যোগ ব্যৱস্থাপনাৰ বহু ৰাজ্যিক কৃত্ৰিম অনুশীলন🔯

🔯বঙাইগাঁৱত দুৰ্যোগ ব্যৱস্থাপনাৰ বহু ৰাজ্যিক কৃত্ৰিম অনুশীলন🔯

📝বঙাইগাঁওঃ ১৭  নবেম্বৰঃ বঙাইগাঁও জিলা দুৰ্যোগ ব্যৱস্থাপনা বিভাগৰ দ্বাৰা বৃহস্পতিবাৰে স্থানীয় বীৰঝৰা উচ্চতৰ মাধ্যমিক বিদ্যালয় খেলপথাৰত এক  ভূমিকম্প সন্দৰ্ভত বহু ৰাজ্যিক কৃত্ৰিম অনুশীলনৰ আয়োজন কৰা হয় । এই অনুশীলনত ভূমিকম্প হ'লে কেনেদৰে মানুহক উদ্ধাৰ কৰিব পাৰি, কেনেদৰে চিকিৎসা দলে কাম কৰিব লগতে আৰক্ষীয়ে কেনেদৰে পৰিস্থিতি নিয়ন্ত্ৰণ কৰিব তাৰ বিষয়ে ব্যৱহাৰিক অনুশীলন কৰা হয়। দিল্লীত থকা ৰাষ্ট্ৰীয় দুৰ্যোগ ব্যৱস্থাপনা প্ৰাধিকৰণৰ নিৰ্দেশনামৰ্মে ৰাজ্যখনৰ ৯ খন জিলাৰ ভিতৰত বঙাইগাঁও জিলাতো এই অনুশীলন কৰা হয়।উপায়ুক্ত নবদ্বীপ পাঠকে জৰুৰীকালীন ব্যৱস্থাপনা কেন্দ্ৰত উপস্থিত থাকি অনুশীলনৰ কাম-কাজ সুশৃংখলভাৱে চলাই নিয়ে। অতিৰিক্ত উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ মুখ্য কাৰ্যবাহী বিষয়া পাৰ্থ সাৰথি জহৰী, জিলা প্ৰকল্প বিষয়া অনন্ত সামন্ত আৰু ক্ষেত্ৰ বিষয়াসকল,এন ডি আৰ এফ, আৰক্ষী আদি বিভাগে উক্ত কৃত্ৰিম অনুশীলন চলাই নিয়ে। 

উল্লেখ্য যে অনুশীলনৰ অংশ হিচাপে পুৱা ৯ বজাত এটা ভূমিকম্প হোৱা বাবে বঙাইগাঁও জিলা উপায়ুক্ত কাৰ্যালয় ,সংগ্ৰাম নিলয় আৰু বীৰঝৰা কন্যা মহাবিদ্যালয়ত ক্ষয় - ক্ষতি হোৱাৰ লগতে বড়ো বজাৰত অগ্নিকাণ্ড হোৱা বুলি জৰুৰীকালীন ব্যৱস্থাপনা কেন্দ্ৰত খবৰ আহে ৷ লগে লগে  এই ঘটনাত আঘাতপ্ৰাপ্ত লোকক উদ্ধাৰৰ বাবে আটাইকেইটা স্থানলৈ উদ্ধাৰকাৰী দল আৰু অগ্নিকাণ্ড হোৱা ঠাইলৈ অগ্নি নিৰ্বাপক বাহিনী আৰু আপাতকালীন সেৱা বিভাগৰ লোক, অসামৰিক প্ৰতিৰক্ষা,আপদা মিত্ৰ আৰু চিকিৎসকৰ দল দুৰ্যোগ ব্যৱস্থাপনা বিভাগৰ পৰা পঠোৱা হয়। ইয়াৰে ভিতৰত বীৰঝৰা কন্যা মহাবিদ্যালয়ত ৯ জন গুৰুতৰভাৱে আঘাতপ্ৰাপ্ত লোক পোৱা যায় আৰু এজন লোক নিহত হোৱা বুলি সন্দেহ কৰি বঙাইগাঁও অসামৰিক চিকিৎসালয়লৈ পঠোৱা হয়। আনহাতে উপায়ুক্ত কাৰ্যালয়ত ৫ জন লোক আহত হয় আৰু এজন লোক নিহত হোৱা বুলি সন্দেহ কৰি বঙাইগাঁও অসামৰিক চিকিৎসালয়লৈ পঠোৱা হয়। সেইদৰে বড়ো বজাৰত কোনো লোক আহত হোৱা নাই বুলি খবৰ লাভ কৰে।

ইপিনে সংগ্ৰাম নিলয়ত ৪ জন লোক আহত হোৱা বুলি খবৰ লাভ কৰে।উপৰোক্ত নিহত বুলি সন্দেহ কৰা লোক দুজন পিছত চিকিৎসালয়ত ঢুকায়। পৰৱৰ্তী পৰ্যায়ত দুৰ্যোগত পতিত লোকসকলক আশ্ৰয় শিবিৰত ৰখা হয় আৰু তাত ৰিলিফকে আদিকৰি সকলো ধৰণৰ সা-সুবিধাৰ ব্যৱস্থা কৰা হয়।অৱশেষত পৰিস্থিতি নিয়ন্ত্ৰণাধীন হয়। এই অনুশীলনত বীৰঝৰা কন্যা মহাবিদ্যালয় কৰ্তৃপক্ষ, সংগ্ৰাম নিলয় এপাৰ্টমেন্টৰ বাসিন্দাসকলেও সহযোগ আগবঢ়ায়। ইয়াৰ লগত জড়িত আন আন বিভাগবোৰ আছিল খাদ্য, অসামৰিক যোগান আৰু গ্ৰাহক পৰিক্ৰমা বিভাগ, জনস্বাস্থ্য কাৰিকৰী, লোকনিৰ্মাণ পথ আৰু গৃহ বিভাগ, এপি ডি চি এল, স্বাস্থ্য বিভাগ,পৰিবহন বিভাগ, অগ্নি নিৰ্বাপক আৰু আপাতকালীন সেৱা বিভাগ আদি ৷ এই সকলো বিভাগে সহযোগ কৰে।এই অনুশীলনত পৰ্যবেক্ষক হিচাপে এন ডি আৰ এফৰ গুৱাহাটীস্থিি প্ৰথম বেটেলিয়ান কাৰ্যালয়ৰ পৰিদৰ্শক শ্ৰাৱন কুমাৰ আৰু উপ-পৰিদৰ্শক মুকেশ কুমাৰ। উল্লেখ্য যে কৃত্ৰিম অনুশীলনত লোৱা ব্যৱস্থাৱলী ভিডিঅ কনফাৰেন্সত অসম ৰাজ্যিক দুৰ্যোগ ব্যৱস্থাপনা বিভাগ তথা ৰাষ্ট্ৰীয় দুৰ্যোগ ব্যৱস্থাপনা বিভাগৰ সন্মুখত দাঙি ধৰা হয়।🔯