🔯বঙাইগাঁৱত কে এ চিৰ উন্নয়ন পুঁজিৰে তিনিটাকৈ পথ নিৰ্মাণৰ আধাৰ শিলা স্থাপন🔯

🔯বঙাইগাঁৱত কে এ চিৰ উন্নয়ন পুঁজিৰে তিনিটাকৈ পথ নিৰ্মাণৰ আধাৰ শিলা স্থাপন🔯

🔯মাৰ্চ মাহৰ ভিতৰত কমতাপুৰ স্বায়ত্বশাসিত পৰিষদৰ নিৰ্বাচন অনুষ্ঠিত কৰিব পৰা যাব -- গোকুল বৰ্মন🔯

📝বঙাইগাঁওঃ ১৭ নবেম্বৰঃ অহা বছৰৰ মাৰ্চ মাহৰ ভিতৰত কমতাপুৰ স্বায়ত্বশাসিত পৰিষদৰ নিৰ্বাচন অনুষ্ঠিত কৰিব পৰা যাব বুলি মন্তব্য কৰিছে পৰিষদখনৰ মুখ্য কাৰ্বাহী পাৰিষদ গোকুল বৰ্মনে ৷ বৃহস্পতিবাৰে বঙাইগাঁৱৰ পুৰণি বঙাইগাঁৱৰ বেতবাৰীত কে এ চিৰ উন্নয়ন পুঁজিৰ দ্বাৰা বেতবাৰীৰ পৰা চৰাপাৰালৈ সংযোগী পথৰ আধাৰশিলা স্থাপন কৰি সংবাদ মাধ্যমৰ আগত এই মন্তব্য কৰে ৷ কে এ চিৰ মুখ্য কাৰ্যবাহী পাৰিষদগৰাকীক পৰিষদৰ নিৰ্বাচন সন্দৰ্ভত সাংবাদিকে সোধাত কয় যে কে এ চিখন গঠন হোৱাৰ এবছৰ সম্পূৰ্ণ হ'ল আৰু সেই অনুসৰি আমি এতিয়া কমতাপুৰ স্বায়ত্বশাসিত পৰিষদখনত গাঁও অন্তৰ্ভূক্তিৰ অধিসূচনা জাৰি কৰি কাম আৰম্ভ কৰিছো ৷ লগতে জনসংখ্যাৰ গাঁথনিৰ তথ্য আহৰণৰ কাম আৰম্ভ কৰিছো আৰু মানচিত্ৰ প্ৰস্তুত কৰা হৈছে ৷ সেইদৰে সমষ্টি নিৰ্ধাৰণৰ বাবেও যাৱতীয় প্ৰস্তুতি সম্পূৰ্ণ কৰি তুলিছো ৷ মই ভাবো যে ডিচেম্বৰৰ শেষৰ ফালে এই সমষ্টি নিৰ্ধাৰণৰ কাম সম্পূৰ্ণ হোৱাৰ পিচত মাৰ্চ মাহ মানৰ ভিতৰত আমি কে এ চিৰ নিৰ্বাচন অনুষ্ঠিত কৰিব পাৰিম ৷ 

উল্লেখ্য যে মুখ্য কাৰ্যবাহী পাৰিষদগৰাকীয়ে কে এ চিৰ ২০২১ - ২২ বিত্তীয় বৰ্ষৰ উন্নয়ন পঁজিৰ  পৰা আৱণ্টন দিয়া দহ লাখ টকাৰে বঙাইগাঁও বিধান সভা সমষ্টিৰ অন্তৰ্গত উলুৱাৰী বেতবাৰী পিএমজিএচৱাই পথটো নিৰ্মাণৰ আধাৰশিলা কৰে ৷ আধাৰশিলা অনুষ্ঠানত নিৰ্মাণ সমিতিৰ লগতে গাঁৱৰ লোক উপস্থিত থাকে ৷ মুখ্য কাৰ্যবাহী পাৰিষদগৰাকীয়ে কয় যে কমতাপুৰ স্বায়ত্বশাসিত পৰিষদ গঠন হোৱাৰ পিচত  অসম চৰকাৰে পৰিষদক আৱণ্টন দিয়া এঘাৰ কোটি টকাৰে পৰিষদৰ অন্তৰ্গত অঞ্চলৰ ৰাস্তা- ঘাটকে আদি কৰি বিভিন্ন উন্নয়নমূলক কাম- কাজৰ আঁচনি প্ৰস্তুত কৰি আঁচনিসমূহ ৰূপায়ণৰ বাবে আধাৰশিলা স্থাপন কৰা হৈছে ৷ বৃহস্পতিবাৰৰ এই পথ নিৰ্মাণৰ আধাৰশিলাও তাৰেই অংশ ৷ তেওঁ কয় যে অনাগত দিনত পথটো পকীকৰণৰ বাবেও চেষ্টা কৰা হ'ব ৷ 

কমতাপুৰ স্বায়ত্বশাসিত পৰিষদৰ অন্তৰ্গত বহু অঞ্চলত ঘুৰি ফুৰি দেখিছো যে এতিয়ালৈকে বহু অঞ্চলৰ ৰাস্তা -ঘাটকে ধৰি বিভিন্ন উন্নয়নমূলক কামৰ পৰা ৰাইজ সম্পূৰ্ণভাৱে বিচ্ছিন্ন হৈ আছে ৷ গতিকে কে এ চি গঠনৰ পিচত ৰাইজে কিছু আশাৰ ৰেঙণি দেখিছে ৷ সেয়ে আমি অসমৰ মুখ্যমন্ত্ৰীক পৰিষদখনলৈ পাঁচশ কোটি টকাৰ অনুদান আগবঢ়াবলৈ দাবী জনোৱা বুলি কৈ অতি কম সময়ৰ ভিতৰতে মুখ্যমন্ত্ৰীগৰাকীক সাক্ষাৎ কৰিব বুলিও কয় ৷ উল্লেখ্য যে মুখ্য কাৰ্যবাহী পাৰিষদগৰাকীয়ে ইয়াৰ পিচত কে এ চিৰ উন্নয় পুঁজিৰ সাত লাখ টকাৰে সমষ্টিটোৰ অন্তৰ্গত ৫২ নং মাজগাঁও প্ৰাথমিক বিদ্যালয়ৰ সন্মখৰ পৰা মাজগাঁও দ্বিতীয় খণ্ডৰ দীনেশ ৰায়ৰ গৃহ পৰ্যন্ত যোৱা পথটো নিৰ্মাণৰ আধাৰশিলা স্থাপন কৰে ৷ সেইদৰে মাজগাঁও প্ৰথম খণ্ডৰ নৃপেন ৰায়ৰ গৃহৰ পৰা টেঙেনা ৰায়ৰ গৃহলৈ যোৱা পথটো নিৰ্মাণৰো আধাৰ শিলা স্থাপন কৰে ৷ পথটো নিৰ্মাণৰ বাবে কে এ চিৰ উন্নয়ন পুঁজিৰ পৰা আঠ লাখ টকা আৱণ্টন দিয়া হৈছে ৷ আধাৰ শিলা স্থাপন কাৰ্যসূচীত নিৰ্মাণ সমিতিৰ বিষয়ববীয়াসকলৰ লগতে স্থীনীয় লোক উপস্থিত থাকে ৷🔯