🔯বঙাইগাঁও - শালবাৰী লোকনিৰ্মান বিভাগৰ পথৰ জৰাজীৰ্ণ অৱস্থা🔯

🔯বঙাইগাঁও - শালবাৰী লোকনিৰ্মান বিভাগৰ পথৰ জৰাজীৰ্ণ অৱস্থা🔯

🔯নৰ্থ বইটামাৰীত কৃষক মুক্তিৰ উদ্যোগত পথ অৱৰোধ কৰি  ব্যাপক প্ৰতিবাদ🔯

📝বইটামাৰী, ২ নৱেম্বৰ :: বঙাইগাঁও চহৰৰ ছহিদবেদীৰ পৰা বইটামাৰীৰ শালবাৰী ৰাষ্ট্ৰীয় ঘাইপথ সংযোগী লোকনিৰ্মান পথটোৰ দুৰাৱস্থাৰ বাবে সাধাৰণ জনতাই দুৰ্ভোগ ভুগিছে । পথটো শীঘ্ৰে ভালকৈ নিৰ্মানৰ দাবীত  আজি জিলাখনৰ নৰ্থ বইটামাৰীত কৃষক মুক্তি সংগ্ৰাম সমিতিৰ উদ্যোগত ৰাইজে পথটো অৱৰোধ কৰি ব্যাপক প্ৰতিবাদ সাব্যস্ত কৰে । বঙাইগাঁও জিলা কৃষক মুক্তি সংগ্ৰাম সমিতিৰ উদ্যোগত নৰ্থ বইটামাৰী মহিলা কল্যাণ সমিতি, টেম্প' ইউনিয়ন তথা বৃহত্তৰ অঞ্চলৰ ৰাইজে আজি দিনৰ ১১:৩০ বজাৰ পৰা ১২:৩০ বজালৈ নৰ্থ বইটামাৰীৰ বাঁশবাৰী বজাৰত পথটো অৱৰোধ কৰি তীব্ৰ প্ৰতিবাদ সাব্যস্ত কৰে । লোকনিৰ্মান বিভাগৰ বিৰূদ্ধে প্ৰতিবাদকাৰী ৰাইজ সোচ্চাৰ হৈ উঠে । পিছত বঙাইগাঁৱৰ এগৰাকী দণ্ডাধীশ প্ৰতিবাদস্থলীত আহি উপস্থিত হয় । প্ৰতিবাদকাৰী ৰাইজে এই পথটো অসম মালা আঁচনিৰ অধীনত অনুমোদন হোৱা বুলি চৰকাৰীভাৱে কেইবাবাৰো জোখ-মাপ তথা জৰীপ হোৱাৰ পিছতো আজিলৈ কিয় নিৰ্মানকাৰ্য আৰম্ভ নহ'ল তাক লৈ প্ৰশ্ন কৰে । 

পিছত দণ্ডাধীশ গৰাকীয়ে  শীঘ্ৰে পথটো নিৰ্মান আৰম্ভ হ'ব বুলি আশ্বাস দিয়াতহে প্ৰতিবাদকাৰীসকলে পথ অৱৰোধ কাৰ্যসূচী উঠাই লয় ।  উল্লেখ্য যে দীৰ্ঘদিন ধৰি পথটোৰ অধিকাংশ অতি জৰাজীৰ্ণ অৱস্থাত থকাত এই পথেৰে যাতায়ত কৰাটো ৰাইজৰ বাবে বিপদসংকুল তথা কষ্টদায়ক হৈ পৰিছে । বইটামাৰী অঞ্চলৰ ৰঘুনন্দনপুৰ, কাশাৰপাৰা, সজনাভিটা, আমগুৰী, বাঁশবাৰী, ডেকলিমাৰী, ধলাগাৱঁৰ উপৰি নগৰীয়াগাঁও, মূলাগাওঁ, বৰ্ষনগাঁও আদি ঠাইত পথটো ভাগি ডাঙৰ ডাঙৰ গাত সৃষ্টি হোৱাৰ উপৰি জৰাজীৰ্ণ হৈ যাতায়তৰ অনুপযোগী হৈ পৰিছে । এই গুৰুত্বপূৰ্ণ পথটোৰে প্ৰতিদিনে হাজাৰ হাজাৰ মানুহে বঙাইগাঁও চহৰলৈ শিক্ষা-দীক্ষা, ব্যৱসায় তথা বিভিন্ন কামত প্ৰতিদিনে বিপদসংকুল ভাৱে  অহা-যোৱা কৰে । প্ৰস্তাৱিত 'অসম মালা' আঁচনিৰ অধীনত  নিৰ্মানকাৰ্য আৰম্ভ নোহোৱা বাবে অৱশেষত বাধ্য হৈ দল-সংগঠন তথা ৰাইজে এনেদৰে পথ অৱৰোধ কৰি প্ৰতিবাদ সাব্যস্ত কৰে ।🔯