🔯ডেংগু প্ৰতিৰোধৰ বাবে বঙাইগাঁও স্বাস্থ্য বিভাগৰ তৎপৰতা🔯

 

🔯ডেংগু প্ৰতিৰোধৰ বাবে বঙাইগাঁও স্বাস্থ্য বিভাগৰ তৎপৰতা🔯 

🔯বঙাইগাঁওঃ ৯ নবেম্বৰঃ ডেংগুৰ প্ৰাদুৰ্ভাৱে কাৰ্বি আংলং জিলাত মানুহৰ সাধাৰণ জীৱন ব্যাহত কৰিছে। সেয়েহে ৰাজ্যখনৰ আন আন জিলাৰ লগতে বঙাইগাঁও জিলাতো ডেংগু জ্বৰ প্ৰতিৰোধ কৰিবলৈ জিলা স্বাস্থ্য সমিতিয়ে ঘোষণা দিয়া, নগৰ এলেকাত ধোঁৱা দিয়া, গাঁও-চহৰ সকলো অঞ্চলৰে লোকৰ জ্বৰ হ'লে নিৰীক্ষণ কৰি থকা, চিকিৎসালয়ত পৰ্য্যাপ্ত ঔষধ মজুত ৰখা আদি বিভিন্ন উপায় অবলম্বন কৰিবলৈ জিলা উপায়ুক্ত নবদ্বীপ পাঠকে জিলাখনৰ যুটীয়া স্বাস্থ্য সেৱা সঞ্চালকৰ লগতে আন আন স্বাস্থ্য বিষয়াসকলক আহ্বান জনাইছে ৷ বুধবাৰে জিলা উপায়ুক্ত নবদ্বীপ পাঠকৰ সভাপতিত্বত তেওঁৰ চৰকাৰী বাসভৱনত এই সন্দৰ্ভত যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়, জিলা নিৰীক্ষণ বিষয়া, জিলা মেলেৰীয়া বিষয়া, বঙাইগাঁও খণ্ড প্ৰাথমিক স্বাস্থ্য কেন্দ্ৰৰ মহকুমা চিকিৎসা তথা স্বাস্থ্য বিষয়া আৰু ভাওলাগুৰি নগৰ প্ৰাথমিক স্বাস্থ্য কেন্দ্ৰৰ খণ্ড চিকিৎসা বিষয়াৰ সৈতে এক জৰুৰী বৈঠক আহ্বান কৰা হয়। বৈঠকত ডেংগু প্ৰতিৰোধৰ বাবে প্ৰস্তুতি আৰু হাতত ল'বলগীয়া ব্যৱস্থা সম্পৰ্কত বিতং পৰ্যালোচনা কৰা হয়। জিলা উপায়ুক্তগৰাকীয়ে জিলাখনত কোনো স্থানত কোনো লোক ডেংগু আক্ৰান্ত হৈছে নেকি বিচাৰি উলিয়াবলৈ অহৰহ নিৰীক্ষণ কৰি থাকিবলৈ স্বাস্থ্য বিভাগৰ বিষয়াসকলক আহ্বান জনায়।বৈঠকত যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়ে কয় যে ছেপ্টেম্বৰ মাহৰ পৰা ডিচেম্বৰ মাহলৈ-এই সময়ছোৱাতেই  ডেংগু আক্ৰান্ত হোৱা দেখা যায়। এইক্ষেত্ৰত সংশ্লিষ্ট স্বাস্থ্য বিষয়াই নিৰীক্ষণ কৰি থাকিব। ডেংগু আক্ৰান্ত হোৱা ঠাই ভ্ৰমণ কৰি জিলাখনলৈ কোনো লোক আহিছে নেকি আৰু ডেংগুৰ লক্ষণ থকা জ্বৰত ভোগা কোনো লোক আছে নেকি সেয়া নজৰত ৰাখিবলৈ উপায়ুক্ত পাঠকে স্বাস্থ্য বিষয়াসকলক আহ্বান জনায়। তদুপৰি ডেংগু সম্পৰ্কত সাধাৰণ লোকৰ মাজত পত্ৰিকা বিতৰণ কৰিবলৈ আৰু সকলো চিকিৎসালয়ৰ চৌহদত বেনাৰ লগাই ৰাইজক ডেংগু জ্বৰ সম্পৰ্কত সজাগ কৰিবলৈ উপায়ুক্তগৰাকীয়ে নিৰ্দেশ দিয়ে। যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়ে কয় যে তেওঁ ইতিমধ্যে বঙাইগাঁও জিলাত চলি থকা এ এন চি অভিযান আৰু বিশেষ টিকাকৰণ অভিযানৰ লগতে জ্বৰ হোৱা লোকৰো এক নিয়মীয়া পৰ্যবেক্ষণ কৰি থাকিবলৈ জিলাখনৰ চিকিৎসালয়সমূহৰ ভাৰপ্ৰাপ্ত বিষয়াক নিৰ্দেশনা দিছে। আনহাতে উপায়ুক্তগৰাকীয়ে ড্ৰাগছ পৰিদৰ্শকসকলক কয় যে তেওঁলোকে যাতে সকলো ফাৰ্মাচীৰ মালিকক জ্বৰ আক্ৰান্ত ৰোগীৰ বাবে ঔষধ কিনিবলৈ অহা লোকৰ পৰা আক্ৰান্ত ৰোগীজনৰ নাম সন্নিৱিষ্ট কৰি এখন ৰেজিষ্টাৰ ৰাখে আৰু ৰোগীজনৰ বিষয়ে ওচৰৰ চিকিৎসা বিষয়াক জনাবলৈ পৰামৰ্শ দিয়ে। লগতে বঙাইগাঁও অসামৰিক চিকিৎসালয়ত অতি সোনকালে এটা ডেংগু ৱাৰ্ড মুকলি কৰিবলৈও উপায়ুক্তগৰাকীয়ে যুটীয়া স্বাস্থ্য সঞ্চালকক পৰামৰ্শ দিয়ে।🔯