🔯বঙাইগাঁৱত অংগনবাড়ী কৰ্মী আৰু

🔯বঙাইগাঁৱত অংগনবাড়ী কৰ্মী আৰু সহায়িকা সন্থাৰ বিক্ষোভ🔯

🔯তিনিদফীয়া দাবী সমাধানৰ দাবীত অসম চৰকাৰৰ সমাজ কল্যাণ বিভাগৰ সঞ্চালকলৈ স্মাৰকপত্ৰ🔯

 📝বঙাইগাঁওঃ ১০ নবেম্বৰঃ অসম ৰাজ্যিক অংগনবাড়ী কৰ্মী আৰু সহায়িকা সন্থাৰ বঙাইগাঁও জিলা সমিতিয়ে তিনিদফীয়া দাবীৰ সমৰ্থনত বঙাইগাঁৱত বিক্ষোভ প্ৰদৰ্শন কৰে৷ বঙাইগাঁও জিলা সমাজ কল্যাণ বিষয়া কাৰ্যালয়ৰ সন্মুখত ৰূপায়ণ কৰা বিক্ষোভ কাৰ্যসূচীত অসম ৰাজ্যিক অংগনাবাড়ী কৰ্মী আৰু সহায়িকা সন্থাৰ বঙাইগাঁও জিলাৰ সভানেত্ৰী পদ্মী সিংহ আৰু জিলা সম্পাদিকা জামেলা খাতুন, প্ৰাক্তন জিলা সম্পাদিকা ৰঞ্জা ব্ৰহ্ম, চিআইটিইউৰ বঙাইগাঁও জিলাৰ সভাপতি হৰেশ্বৰ দাস আদিয়ে বক্তব্য প্ৰদান কৰে৷ লগতে বিক্ষোভৰ অন্তত তেওঁলোকে অসম চৰকাৰৰ সমাজ কল্যাণ বিভাগৰ সঞ্চালকলৈ স্মাৰকপত্ৰ প্ৰেৰণ কৰে৷ বঙাইগাঁও জিলা সমাজ কল্যাণ বিষয়াৰ জৰিয়তে প্ৰদান কৰা স্মাৰকপত্ৰত অসমৰ বিজেপি চৰকাৰখনে কোনো আলোচনা বিলোচনা নকৰাকৈ টোলকী কায়দাৰে অসমৰ অঞ্চনবাড়ী কেন্দ্রবোৰ একত্ৰিকৰণৰ কাম আৰম্ভ কৰিছে ৷ এই ক্ষেত্ৰত অঙ্গনবাড়ী কর্মী আৰু সহায়িকা সন্থাই ক্ষোভ প্ৰকাশ কৰাৰ কথা উল্লেখ কৰিছে।লগতে চৰকাৰৰ এই হঠকাৰী কাৰ্য শীঘ্ৰে বন্ধ কৰাৰ দাবী উত্থাপন কৰিছে। উল্লেখ্য যে অসমত ৬২,১৫৩ টা কেন্দ্রৰ মাধ্যমত আই টি ডি এছৰ কাম যোৱা ৪৭ বছৰ ধৰি চলাই থকা হৈছে। শেহতীয়াভাৱে চৰকাৰখনে এক চমক সৃষ্টি কৰাৰ মাজেৰে বিভিন্ন জিলাত প্রায় ২০ লাখ টকীয়া কেইটামান অগনবাড়ী কেন্দ্র স্থাপন কৰিছে। কিন্তু অতি পৰিতাপৰ কথা যে চৰকাৰখনে দীর্ঘদিন ধৰি পৰিত্যক্ত হৈ থকা অংগবাড়ী কেন্দ্ৰবোৰ মেৰামতি কৰা নাই। অসম ৰাজ্যিক অংগনবাড়ী কর্মী আৰু সহায়িকা সন্থাই দীৰ্ঘদিন ধৰি দাবী কৰি আহিছে যে চৰকাৰখনে সকলো কেন্দ্রৰ আন্ত:গাঁথনি বিজ্ঞান সম্মতভাৱে বনাই দিয়াৰ ব্যৱস্থা কৰিব লাগে আৰু তাৰ পৰিচালনা কৰাৰ বাবে সকলো ধৰণৰ ব্যৱস্থা কৰিব লাগে। কিন্তু তাকে নকৰি চৰকাৰখনে অংগনবাড়ী কেন্দ্রবোৰ একত্ৰিত কৰিবলৈ লৈছে। 

এই একত্ৰিত কৰাৰ নামত ৩-৪ টা কেন্দ্র বন্ধ কৰাৰ ফলত সেই কেন্দ্ৰৰ কণ কণ শিশু সকল কেইবা কিলোমিটাৰ অতিক্রম কৰি নির্দিষ্ট কেন্দ্ৰত যাব লাগিব। তেনে কৰিলে শিশুসকলৰ যোৱাত নিশ্চিতভাবে অসুবিধা হ’ব আৰু আইছিডি এছৰ পৰা তেওঁলোক বঞ্চিত হ’ব। আনহাতে কর্মী-সহায়িকা সকলৰ বহু আন্দোলনৰ ফলত যোৱা বছৰৰ ২৪ ডিচেম্বৰত অসম চৰকাৰে অৱসৰপ্ৰাপ্ত কর্মী-সহায়িকাসকলত এককালীন সহায্য প্রদান কৰাৰ কথা ঘোষণা কৰিছিল। এই ঘোষণাৰ আজি ১১ মাহ উকলি যোৱাৰ পিছতো চৰকাৰে কৰ্মী-সহায়িকাসকলক এই সাহায্য প্ৰদান কৰা নাই। সন্থাৰ প্ৰতিনিধিসকলে এই ক্ষেত্ৰত বিভাগীয় কার্যালয়ত বাৰে বাৰে খবৰ লোৱাত কর্তৃপক্ষই নানান অজুহাত দেখুৱাই আছে। ইপিনে অবসৰপ্রাপ্ত কর্মী-সহায়িকাসকলে হতাশ হ’বলৈ ধৰিছে। তেনে অৱস্থাত কৰ্মী সহায়িকাসকলৰ মাজত আন্দোলনৰ বাহিৰে কোনো পথ নোহোৱা হৈ পৰিছে। সংগঠনটোৱে চৰকাৰৰ ঘোষণা অনুসৰি অৱসৰ প্ৰাপ্ত কর্মী-সহায়িকাৰ এককালীন সহায্য শীঘ্ৰে প্ৰদান কৰা,অংগনবাড়ী কেন্দ্ৰ একত্ৰিকৰাৰ কাম বন্ধ ৰখা আৰু সকলো অংগনবাড়ী কেন্দ্ৰৰ আন্তঃগাঁথনি উন্নত কৰাৰ দাবী উত্থাপন কৰিছে ৷🔯