🔯বঙাইগাঁৱত আন্তঃৰাষ্ট্ৰীয় কোচ ৰাজবংশী সংস্থাৰ সংবাদ মেল🔯

🔯বঙাইগাঁৱত আন্তঃৰাষ্ট্ৰীয় কোচ ৰাজবংশী সংস্থাৰ সংবাদ মেল🔯

🔯কেন্দ্ৰীয় চৰকাৰে বংগ-ভংগৰে গঠনৰ পৰিকল্পনা কৰা নতুন কেন্দ্রীয় শাসিত ৰাজ্যত অবিভক্ত গোৱালপাৰা জিলাক চামিলকৰণৰ দাবী🔯

🔯বিধায়ক ফনীভূষণ চৌধুৰী ঘৰ শত্ৰু বিভীষণ🔯

📝বঙাইগাঁওঃ ১০ নবেম্বৰঃ বর্তমানৰ কেন্দ্ৰীয় চৰকাৰে বংগ-ভংগৰে যি নতুন কেন্দ্রীয় শাসিত ৰাজ্য গঠনৰ পৰিকল্পনা কৰিছে এই কেন্দ্ৰীয় শাসিত ৰাজ্যত অবিভক্ত গোৱালপাৰা জিলাক চামিল কৰাৰ বাবে আমি আন্তঃৰাষ্ট্ৰীয় কোচ ৰাজবংশী সংস্থা ( ইক্ৰা) ই কেন্দ্ৰীয় চৰকাৰক দাবী জনাইছো। কিয়নো অবিভক্ত গোৱালপাৰা জিলাৰ ভাষা - সংস্কৃতিৰ লগত কেন্দ্ৰীয় শাসিত অঞ্চল বিচৰা কোচ বিহাৰ আৰু বিহাৰৰ ভাষা - সংস্কৃতিৰ মিল আছে আৰু তাৰ ভিত্তিতে আমি অবিভক্ত গোৱালপাৰা জিলাক অন্তৰ্ভূক্তিৰ দাবী জনাইছো ৷ তাৰোপৰি পূৰ্বৰ পৰাই অবিভক্ত গোৱালপাৰা জিলাখন কোচ বিহাৰ ৰাজ্যৰ অন্তৰ্ভূক্ত আছিল ৷ এই মন্তব্য আন্তঃৰাষ্ট্ৰীয় কোচ ৰাজবংশী সংস্থা ( ইক্ৰা) ৰ সভাপতি ভদ্ৰেশ্বৰ বৰ্মনৰ ৷ বৃহস্পতিবাৰে বঙাইগাঁও চহৰৰ দোলাইস্থিত কমতাপুৰী উন্নয়ন সমিতিৰ কাৰ্যালয়ত আয়োজিত এখন সংবাদ মেলত সভাপতি বৰ্মনে এই দাবী উত্থাপন কৰে ৷ সংবাদ মেলত সংস্থাটোৰ সভাপতিগৰাকীয়ে কয় যে প্ৰতিটো জাতি জনগোষ্ঠীয়ে নিজৰ পৰিচয়ৰ বাবে নিজৰ ৰাজ্য দাবী কৰি আহিছে। কোচ ৰাজবংশীসকলো এইক্ষেত্ৰত পিচ পৰি থকা নাই। কোচ ৰাজবংশীসকলে দীর্ঘ দিনৰ পৰাই নিজৰ পৰিচয়ৰ বাবে ঐতিহাসিক কমতাপুৰ ৰাজ্য (কোচবিহাৰ ৰাজ্য) দাবী কৰি আহিছে। সেয়ে বর্তমান কেন্দ্ৰীয় চৰকাৰে বংগ-ভংগৰে যি নতুন কেন্দ্রীয় শাসিত ৰাজ্য গঠনৰ পৰিকল্পনা কৰিছে এই কেন্দ্ৰীয় শাসিত ৰাজ্যত অবিভক্ত গোৱালপাৰা জিলাক চামিল কৰাৰ বাবে আমি চৰকাৰক দাবী জনাইছো ৷ সংবাদ মেলত সভাপতিগৰাকীয়ে লগতে কয় যে যোৱা ২০১৯ বৰ্ষৰ ৪ ডিচেম্বৰত আন্তঃৰাষ্ট্ৰীয় কোচ ৰাজবংশী সংস্থাই দেশৰ প্ৰধানমন্ত্রী নৰেন্দ্ৰ মোডী, কেন্দ্ৰীয় গৃহ মন্ত্রী অমিত শ্বাহ, লোক সভাৰ অধ্যক্ষা সুমিত্রা মহাজন, বিৰোধী দলপতি মল্লিকার্জুন খার্গেক কোচ ৰাজবংশীসকলক সুকীয়া পৰিচয়ৰ বাবে কোচবিহাৰ ৰাজ্যৰ দাবীত এখন স্মাৰক পত্ৰ দাখিল কৰিছিলোঁ। স্মাৰক পত্ৰৰ ওপৰত ভিত্তি কৰি কেন্দ্ৰীয় গৃহ মন্ত্ৰালয়ৰ সঞ্চালক ৰেণু চাৰিনে আমাক পত্ৰ নং 12012/04/2020-SR যোগে জনায় যে নতুন ৰাজ্য গঠনৰ পৰিকল্পনা কেন্দ্ৰীয় চৰকাৰৰ হাতত নাই। কিন্তু যোৱা কিছুদিনৰ পৰা কেন্দ্ৰীয় চৰকাৰে বংগ- ভংগৰে নতুন কেন্দ্ৰীয় শাসিত ৰাজ্য গঠনৰ যি পৰিকল্পনা কৰিছে, সেই প্রস্তাৱিত ৰাজ্যত অবিভক্ত গোৱালপাৰা জিলাক অন্তর্ভুক্তি কৰাৰ বাবে আমি চৰকাৰক দাবী জনাইছো ৷ অসমৰ অবিভক্ত গোৱালপাৰা জিলা, পশ্চিম বংগৰ কোচবিহাৰ আৰু বিহাৰৰ কিষানগঞ্জ আৰু পূৰ্ণিয়া জিলাৰ ভাষা-সংস্কৃতিৰ মিল থকা হেঁতুকে প্রস্তাৱিত নতুন কেন্দ্রীয় শাসিত ৰাজ্যত এই অঞ্চলসমূহ সাঙুৰি লৈ প্ৰস্তাৱিত নতুন কেন্দ্ৰীয় শাসিত ৰাজ্য গঠনৰ বাবে দাবী জনাইছো। 

ইতিহাসৰ পাত লুটিয়ালে দেখা যায় যে অবিভক্ত গোৱালপাৰা জিলাখন স্বাধীনোত্তৰ আগৰ পৰাই ষড়যন্ত্ৰৰ বলি হৈছিল। ১৭৬৫ চনত তেতিয়াৰ বংগ প্ৰায় সম্পূর্ণ ইষ্ট ইণ্ডিয়া কোম্পানীৰ অধীনলৈ যায়, তেতিয়াই গোৱালপাৰা ব্ৰিটিছৰ অধীনলৈ আহে। ইতিমধ্যে ৰংপুৰত সদৰ স্থাপন কৰা ব্ৰিটিছ কোম্পানীয়ে গোৱালপাৰাক ১৮১২ চনলৈ ৰংপুৰৰ লগত চামিল কৰে। ৰংপুৰ আৰু গোৱালপাৰা, কামৰূপ , কমতাৰ ৰঙামাটি হিচাপে এটি উল্লেখযোগ্য অঞ্চল হৈ আছিল। ১৮১৫ চনত গাৰো পাহাৰক সন্নিৱিষ্ট কৰি গোৱালপাৰা এখন পৃথক জিলালৈ ৰূপান্তৰিত কৰা হয়। ১৮২৬ চনৰ ইয়াণ্ডাবু সন্ধিৰ পাছত অসম ব্ৰিটিছৰ অধীনলৈ আহে আৰু তেতিয়াই অসমৰ নতুন মানচিত্ৰত গোৱালপাৰাক এখন জিলা হিচাপে সন্নিৱিষ্ট কৰা হয়। কিন্তু ১৮৬৭ চনত গোৱালপাৰাক কোচবিহাৰ ৰাজ্যৰ সৈতে আকৌ চামিল কৰা হয়। ১৯০৫ চনত বংগ -ভংগৰ সময়ত গোৱালপাৰাক পূৰ্ববংগৰ সৈতে চামিল কৰা হয়। ভৌগলিকভাৱে কোচ ৰাজবংশীসকলক বিভাজন কৰি কোচ ৰাজবংশীসকলৰ ভাষা, সাহিত্য-সংস্কৃতি ধ্বংস কৰাৰ পৰিকল্পনা পূর্ব পৰিকল্পিত ৷ সেয়ে প্রস্তাৱিত নতুন কেন্দ্ৰীয় শাসিত ৰাজ্যত কোচ-ৰাজবংশীসকলক স্ব-পৰিচিত তথা সাংস্কৃতিক উত্তৰণৰ বাবে সেই অঞ্চলৰ কোচ ৰাজবংশীসকলৰ বিশেষ গুৰুত্ব থকাৰ লগতে কোচ ৰাজবংশী ভাষাক সংবিধানৰ অষ্টম অনুসূচীত অন্তর্ভুক্তি কৰি কোচ-ৰাজবংশী ভাষাক স্বীকৃতি দিয়াৰ দাবী জনাইছে আন্তঃৰাষ্ট্ৰীয় কোচ ৰাজবংশী সংস্থাই। ইপিনে সংবাদ মেলত  বিধায়ক ফনীভূষণ চৌধুৰীয়ে অসমক দ্বি-খণ্ডিত হোৱাটো নিবিচাৰে বুলি কৰা মন্তব্য সন্দৰ্ভত সংগঠনটোৰ সভাপতিগৰাকীয়ে কয় যে ফনীভূষণ চৌধুৰীয়ে হয়তো সংবিধান নাজানে ৷ কাৰণ সংবিধানৰ তৃতীয় অনুচ্ছেদত স্পষ্টভাৱে লেখা আছে যে কোনো বিধায়ক নহয়, ৰাজ্য চৰকাৰেও ইয়াক বাধা দিব নোৱাৰে ৷ মুখ্যমন্ত্ৰী ডঃ হিমন্ত বিশ্ব শৰ্মাইও কৈছে যে আমি বাধা দিম ৷ কিন্তু নোৱাৰে ৷ পশ্চিমবংগৰ মুখ্যমন্ত্ৰী মমতা বেনাৰ্জীয়ে কৈছে পশ্চিমবংগক দ্বিখণ্ডিত কৰাত বাধা দিব, কিন্তু তেৱোঁ নোৱাৰে ৷ আচলতে তেওঁলোকৰ সাংবিধানিক জ্ঞান নাই কাৰণে তেওঁলোকে আবোল তাবোল বলকিছে ৷যদি  সংবিধান পঢ়িলেহেতেন তেতিয়াহলে তেওঁলোকে এইবাল কথা উচ্চৰণ নকৰিলেহেতেন বুলিও কয় ৷ 

লগতে কয় যে বিধায়ক ফনীভূষণ চৌধুৰী এগৰাকী কোচ ৰাজবংশী নেতা যদিও ঘৰ শত্ৰু বিভীষণ ৷ তেওঁলোকেতো আমাৰ আজি নহয় পূৰ্বৰ পৰাই তেওঁলোকে ৰাজবংশীসকলৰ লগত প্ৰৱঞ্চনা কৰি আহিছে আৰু ঠগিছে ৷ কেৱল বিধায়ক ফনীভূষণ চৌধুৰীয়ে নহয় বৰং যিমান ৰাজবংশীৰ নেতা আছে তেওঁলোকে সাধাৰণ কোচ ৰাজবংশী ৰাইজৰ কাৰণে কোনো দিনে এক ইঞ্চিও মাত মতা নাই ৷ বৰং তেওঁলোকে কেৱল নিজৰ ৰাজনৈতিক সুবিধা আৰু নিজৰ মুনাফাৰ বাবেহে তেওঁলোকে আন্দোলন কৰিছে বা গাদী ৰক্ষা কৰিছে ৷ বিধায়কগৰাকীৰ লগতে আন বিধায়ক তথা কেএচিৰ নেতাকে ধৰি বিভিন্নজনে নিজৰ স্বাৰ্থৰ বাবে অবিভক্ত গোৱালপাৰা জিলাক কেন্দ্ৰীয় শাসিত অঞ্চলত অন্তৰ্ভক্তিৰ বিৰোধিতা কৰিব বুলিও কয় সভাপতি বৰ্মনে ৷ সভাপতি বৰ্মনে লগতে কয় যে অসম দ্বিখণ্ডিত নহয় যদিহে কেন্দ্ৰীয় শাসিত অঞ্চল হয় ৷ আমি বিচাৰিছো কোচ বিহাৰ ৰাজ্য পুনৰ গঠন হওক ৷ যদি কোচ বিহাৰ ৰাজ্য পুনৰ গঠন হয় তেন্ত অসম বিভাজনৰ কথাই নাহে ৷ কাৰণ অবিভক্ত গোৱালপাৰা জিলা পূৰ্বতেও কোচ বিহাৰৰ অন্তৰ্গত আছিল আৰু বৰ্তমানো থাকিব ৷ আমি কেন্দ্ৰীয় শাসিত অঞ্চলৰ অন্তৰ্ভূক্ত হোৱাতো বিচাৰো ৷ আহোমসকলৰ নিজা সুকীয়া পৰিচয় ,ভাষা আৰু সংস্কৃতি আছে ৷ কিন্তু তেওঁলোক বৰ অসমীয়া ৷ বড়োসকলৰ ভাষা - সংস্কৃতি আছে আৰু তেওঁলোকো অসমীয়া ৷ এক মাত্ৰ কোচ ৰাজবংশীয়ে এটা জাতি যাক কোনোবাই বঙালী বুলি কয়, কোনোবাই বিদেশী বুলি কয় ৷ গতিকে আমি বিচাৰিছো যে অবিভক্ত গোৱালপাৰা জিলাক যিহেতু পুৰ্বৰ পৰাই মাহী আইৰ দৃষ্টিৰে চাইছিল, সেয়ে আমি মাহী আইৰ দৃষ্টিত থকাতকৈ নিজৰ সুকীয়া পৰিচয়ৰ কাৰণে কেন্দ্ৰীয় শাসিত অঞ্চলৰ অন্তৰ্ভূক্ত হ'ব বিচাৰিছো ৷ কোচ ৰাজবংশীসকলক অসমীয়া বুলি নেভাৱে নেকি বুলি সাংবাদিকে প্ৰশ্ন কৰাত তেওঁ কয় যে ভাৱে কিন্তু আজি যদি আমি উজনি অসমলৈ যাও তেন্তে তেওঁলোকে আমাক অসমীয়া বুলি নেভাবেই ৷ বাংলাদেশৰ পৰা অহা বুলি কৈ আমাক ইতিকিং কৰে ৷ সেয়ে ইতিকিং সহ্য কৰি থকাতকৈ আমাৰ নিজ ৰাজ্যত সংস্থাপিত হোৱাতোৱেই কাম্য হ'ব ৷ আমাৰ ৰাজ্যত ভাষা, সংস্কৃতিকে ধৰি আমাৰ নিজস্ব পৰিচয় থাকিব ৷ সংবাদ মেলত সংস্থাটোৰ আন কেইবাগৰাকীও বিষয়ববীয়া উপস্থিত আছিল🔯