🔯কোচ ৰাজবংশী জাতীয় পৰিষদ🔯

🔯কোচ ৰাজবংশী জাতীয় পৰিষদ🔯

🔯অসমত গঠিত কে,এ,চি, আৰু পশ্চিমবংগত গঠিত হোৱা উন্নয়ন পৰিষদ সমূহ কেতিয়াও অসমৰ কোচ ৰাজবংশীৰ জনজাতিকৰণ আৰু কোচ কমতাৰ সন্মানজনক ৰাজনৈতিক সমাধানৰ বিকল্প হ'ব নোৱাৰে🔯

🔯কোচ কমতাৰ সন্মানজনক ৰাজনৈতিক সমাধান সূত্ৰ  উদ্ভাৱন কৰিবলৈ পৃথক কমতা ৰাজ্য গঠনৰ কোনো বিকল্প নাই🔯 

🔯বঙাইগাঁও ১৫ নবেম্বঃ জনজাতিকৰণ আৰু ষষ্ঠ অনুসূচীভুক্ত পৃথক কমতাপুৰ ৰাজ্য গঠনেহে  স্বাধীনতাৰ সুদীৰ্ঘ কালে বঞ্চিত- লাঞ্ছিত নিষ্পেষিত  সৰ্বসাধাৰণ কোচ ৰাজবংশীসকলৰ  আত্মনিয়ন্ত্ৰৰ অধিকাৰ সুপ্ৰতিষ্ঠিত কৰি জনগোষ্ঠীটোৰ  ৰাজনৈতিক ভেটি সুদৃঢ় কৰি জনগোষ্ঠীটোৰ  ভৱিষ্যত সুৰক্ষিত কৰিব বুলি দৃঢ় মত পোষণ কৰিছে কোচ ৰাজবংশী জাতীয় পৰিষদে ৷ সংবাদ মাধ্যমলৈ প্ৰেৰণ কৰা এক প্ৰেছ বিবৃতিত কোচ ৰাজবংশী জাতীয় পৰিষদৰ সভাপতি বিমল কুমাৰ বৰ্মন আৰু সাধাৰণ সম্পাদক বিশ্বজিৎ ৰায়ে কয় যে অসমৰ কোচ ৰাজবংশীসকলক জনজাতিকৰণ আৰু অসম- পশ্চিমবংগ দুয়োখন ৰাজ্যত স্বাধীনোত্তৰ কালত অন্তৰ্ভুক্ত হোৱা পূৰ্বৰ কোচ -কমতাৰ ভূ-ভাগত কোচ ৰাজবংশীৰ আত্মনিয়ন্ত্ৰৰ অধিকাৰ সুপ্ৰতিষ্ঠিত কৰাৰ স্বাৰ্থত পৃথক কমতাপুৰ ৰাজ্য গঠনৰ দাবীত  চলা সংগ্ৰাম কেইবা দশক পুৰণি ৷ অসমৰ কোচ ৰাজবংশী জনগোষ্ঠীৰ জনজাতিকৰণৰ সমস্যাকে ধৰি কোচ- কমতাৰ এক সন্মানজনক ৰাজনৈতিক সমাধান সূত্ৰ উদ্ভাৱন আৰু কোচ ৰাজবংশী জনগোষ্ঠীৰ আত্মনিয়ন্ত্ৰৰ অধিকাৰ সুনিশ্চিত কৰিবলৈ সুদীৰ্ঘ সংগ্ৰামৰ লগতে অসম, পশ্চিমবংগ আৰু কেন্দ্ৰীয় চৰকাৰৰ লগত দ্বিপাক্ষিক আৰু ত্ৰিপাক্ষিক একাধিক আলোচনা অনুষ্ঠিত হৈছে যদিও জনগোষ্ঠীটোৱে ইস্পিত লক্ষ্যৰ পৰা সুদীৰ্ঘ কালে বঞ্চিত হৈ আহিছে বুলি নেতাদ্বয়ে ক্ষোভেৰে দোহাৰে । উল্লেখ্য যে অসমত গঠিত কে,এ,চি, আৰু পশ্চিমবংগত গঠিত হোৱা উন্নয়ন পৰিষদসমূহ কেতিয়াও অসমৰ কোচ ৰাজবংশীৰ জনজাতিকৰণ আৰু কোচ- কমতাৰ সন্মানজনক ৰাজনৈতিক সমাধানৰ বিকল্প হ'ব নোৱাৰে বুলিও প্ৰেছ টোকাটোত উল্লেখ কৰে ৷ লগতে নেতাদ্বয়ে প্ৰেছ টোকাটোত স্পষ্ট কৰি দি কয় যে অসমৰ কোচ ৰাজবংশী সকলক জনজাতিকৰণেৰে কোচ কমতাৰ সন্মানজনক ৰাজনৈতিক সমাধান সূত্ৰ  উদ্ভাৱন কৰিবলৈ হলে পৃথক কমতা ৰাজ্য গঠনৰ বাহিৰে আন কোনো বিকল্প নাই । সাম্প্ৰতি  নগেন ৰায় ওৰফে অনন্ত মহাৰাজে ভাৰতৰ গৃহ মন্ত্ৰী অমিত শ্বাহৰ লগত সুসম্পৰ্কৰ দোহাই দি  অবিভক্ত গোৱালপাৰা জিলাৰ তদানীন্তন চিদলী আৰু বিজনীক কোচ বিহাৰ ৰাজ্যৰ লগত লগ লগাই এক নাভূত নাশ্ৰুত গ্ৰেটাৰ কোচ বিহাৰ কেন্দ্ৰীয় শাসিত ৰাজ্য গঠনৰ  খিচিৰি পকোৱাটো এক ৰাজনৈতিক  ষড়যন্ত্ৰৰ নামান্তৰ বুলি নেতাদ্বয়ে প্ৰেছ টোকাটোত কয় । অসমৰ খিলঞ্জীয়া কোচ ৰাজবংশী সকলক জনজাতিকৰণ কৰি  সাংবিধানিক ৰক্ষাকৱচসহ ৰাজ্য গঠনৰ ব্যতিৰেকে কেন্দ্ৰীয় চৰকাৰে অকল ৰাজনৈতিক উদ্দেশ্যপ্ৰণোদিত ভাৱে অনন্ত মহাৰাজে কোৱা মৰ্মে কোচ বিহাৰ কেন্দ্ৰীয় শাসিত ৰাজ্য অথবা হিমাঞ্চল কেন্দ্ৰীয়শাসিত ৰাজ্যই অসমৰেই হওক বা বংগৰেই হওক সৰ্বসাধাৰণ কোচ ৰাজবংশীৰ কোনো ৰাজনৈতিক তথা সাংবিধানিক সুৰক্ষা সুপ্ৰতিষ্ঠিত নকৰে । কেন্দ্ৰীয়শাসিত ৰাজ্যত যদি কোচ ৰাজবংশীৰ ষষ্ঠ অনুসূচীভুক্ত সাংবিধানিক সংৰক্ষণৰ ব্যৱস্থা নাথাকে, তেন্তে পূৰ্বৰ পূৰ্ব বংগৰ  লোকৰ ৰাজনৈতিক আধিপত্য  আগৰ দৰেই  বৰ্তি থাকিব।  সেয়েহে কেন্দ্ৰীয় চৰকাৰে যদি অৱহেলিত কোচ ৰাজবংশী সকলৰ সুৰক্ষিত ভৱিষ্যতৰ কথা চিন্তা আগত ৰাখি কোচ কমতাৰ ৰাজনৈতিক সমাধান সূত্ৰ উদ্ভাৱনেৰে কেন্দ্ৰীয়শাসিত ৰাজ্য গঠনৰ চিন্তা চৰ্চা কৰিছেই তেতিয়াহলে কোচ ৰাজবংশীক ষষ্ঠ অনুসূচীভুক্ত জনজাতিকৰণেৰে পৃথক কমতাপুৰ কেন্দ্ৰীয় শাসিত ৰাজ্য গঠন কৰি চিৰ নিষ্পেষিত কোচ ৰাজবংশী সকলক  ৰাজনৈতিক ভাৱে সুৰক্ষিত কৰি নিশেষ: হোৱাৰ পৰা কেন্দ্ৰীয় চৰকাৰে ৰক্ষা কৰক বুলি নেতাদ্বয়ে  প্ৰেছ  টোকাযোগে আহ্বান জনায় ।🔯