🔯বঙাইগাঁৱত ৰাষ্ট্ৰীয় প্ৰেছ দিৱস উদযাপন🔯

🔯বঙাইগাঁৱত ৰাষ্ট্ৰীয় প্ৰেছ দিৱস উদযাপন🔯

🔯বঙাইগাঁওঃ১৬ নবেম্বৰঃ বঙাইগাঁও জিলা তথ্য আৰু জনসম্পৰ্কৰক্ষী বিষয়াৰ কাৰ্যালয়ৰ উদ্যোগত আৰু গ্ৰেটাৰ বঙাইগাঁও প্ৰেছ ক্লাব আৰু জিলা প্ৰশাসনৰ সহযোগত বুধবাৰে প্ৰেছ ক্লাব প্ৰাংগণত ৰাষ্ট্ৰীয় প্ৰেছ দিৱস উদযাপন কৰা হয়। এই উপলক্ষে পুৱা প্ৰেছ ক্লাবৰ সভাপতি ৰঞ্জিত কুমাৰ শৰ্মাই পতাকা উত্তোলন আৰু স্মৃতি তৰ্পণেৰে কাৰ্যসূচী মুকলি কৰাৰ পিচত এখন আলোচনা চক্ৰ তথা সভা অনুষ্ঠিত হয় ৷ প্ৰেছ ক্লাবৰ সভাপতি ৰঞ্জিত কুমাৰ শৰ্মাৰ সভাপতিত্বত অনুষ্ঠিত আলোচনা চক্ৰখনত জিলা উপায়ুক্ত নবদ্বীপ পাঠকে মুখ্য অতিথি, জিলা আৰক্ষী অধীক্ষক স্বপ্ননীল ডেকা আৰু অসমীয়া প্ৰতিদিনৰ বঙাইগাঁও সংস্কৰণৰ আৱাসিক সম্পাদক হেমন্ত কুমাৰ শৰ্মাই সন্মানীয় অতিথি হিচাপে উপস্থিত থাকে ৷ জিলা উপায়ুক্তগৰাকীয়ে বন্তি প্ৰজ্বলন কৰা অনুষ্ঠানত ৰাষ্ট্ৰীয় প্ৰেছ দিৱসৰ লগত সংগতি ৰাখি অনুষ্ঠিত "জাতি গঠনত সংবাদ মাধ্যমৰ ভূমিকা" শীৰ্ষক আলোচনা চক্ৰত ধুবুৰী ভোলানাথ কলেজৰ সহযোগী অধ্যাপক ড: উপেন্দ্ৰজিৎ শৰ্মাই সমল ব্যক্তি  হিচাপে উপস্থিত থাকি মূল বিষয়বস্তুৰ ওপৰত বক্তব্য ৰাখে।

মুখ্য অতিথিৰ ভাষণত উপায়ুক্ত নবদ্বীপ পাঠকে ৰাষ্ট্ৰীয় প্ৰেছ দিৱস উপলক্ষ্যে সমূহ সাংবাদিকক শুভেচ্ছা জনাই ৰাষ্ট্ৰ গঠনত সংবাদ মাধ্যমৰ ভূমিকাৰ ওপৰত বক্তব্য ৰাখে ৷ লগতে সাংবাদিকসকলে প্ৰশাসনক আগবঢ়াই অহা সহযোগিতাৰ বাবে ধন্যবাদ জনায়। আনহাতে আৰক্ষী অধীক্ষক স্বপ্ননীল ডেকাই সাংবাদিকসকলে কৰ্ম জীৱনত থকা প্ৰত্যাহ্বানকো নেওচি যি সেৱা আগবঢ়াই আহিছে সেই বিষয়ে তেওঁৰ বক্তব্যত প্ৰতিফলিত কৰে। ইপিনে আলোচনা চক্ৰৰ সমল ব্যক্তি ডঃ উপেন্দ্ৰজিৎ শৰ্মাই নিজৰ বক্তব্যত কয় যে সংবাদ মাধ্যম আৰু সাংবাদিক যদি নিশ্চুপ হৈ যায় তেতিয়াহলে জাতি শুই যায় আৰু জাতি ধ্বংসৰ গৰাহত তথা ধ্বংসৰ কৱলত পৰিব ৷ ইয়াৰ বিপৰীতে সাংবাদিক আৰু সংবাদ মাধ্যম যিমানে উতজীৱিত হৈ সজাগ কৰি থাকিব সিমানে জাতিটো উন্নতি আৰু উন্নয়নৰ পথত আগবাঢ়ি গৈ থাকিব ৷ গতিকে সেই জাতীয় জীৱনৰ অতন্দ্ৰ প্ৰহৰী হিচাপে আমাৰ অসমৰ সংবাদ মাধ্যম জীয়াই থাকক ৷ তেতিয়া সংবাদ মাধ্যমক গণতন্দ্ৰৰ যি চতুৰ্থ স্তম্ভ বুলি কোৱা হয় সেয়া সঁচা অৰ্থত চতুৰ্থ স্তম্ভ হ'ব ৷ 

কাৰণ ঘৰৰ চালি এখনৰ চাৰিটা খুঁটাৰ যদি এটা ভাগি পৰে তেতিয়াহলে তিনিটা খুঁটাৰে চালিখন বৰ্তি নাথাকে ৷ তেওঁ আৰু কয় যে সংবাদ মাধ্যম আৰু সাংবাদিকসকলেহে কেৱল সমাজৰ প্ৰতি দায়বদ্ধ হৈ থাকিব লাগিব নেকি ? চৰকাৰ , প্ৰশাসন তথা ৰাইজ কেতিয়াবা সমাজৰ অতন্ত্ৰ প্ৰহৰী বুলি কোৱা সংবাদকৰ্মীসকলৰ প্ৰতি দায়বদ্ধ হৈছে নে ? গতিকে এইবোৰ দিশ চালি জাৰি চোৱা প্ৰয়োজন হৈ পৰিছে ৷ তেওঁ লগতে কয় যে এটা সুস্থ- সবল জাতি গঠন কৰিবলৈ হলে সংবাদ মাধ্যমে এটা পৰিসীমিত ৰূপত জাতীয় জীৱনৰ সেৱা আগবঢ়াব লাগিব ৷ অনুষ্ঠানত  জ্যেষ্ঠ সাংবাদিক তেজেশ ত্ৰিপাঠীয়েও বক্তব্য ৰাখে। উল্লেখ্য যে অনুষ্ঠানৰ উদ্দেশ্য ব্যাখ্যা কৰে বঙাইগাঁও জিলা তথ্য আৰু জনসম্পৰ্কৰক্ষী বিষয়া বিনু ৰাণী ৰাজবংশীয়ে।🔯