🔯বঙাইগাঁৱত নিচামুক্ত ভাৰত অভিযানৰ অংশ হিচাপে সজাগতা সমদল- সভা

🔯বঙাইগাঁৱত নিচামুক্ত ভাৰত অভিযানৰ অংশ হিচাপে সজাগতা সমদল- সভা 

📝News4Bongaigaon: ১৫ জুলাইঃ বঙাইগাঁও জিলা স্বাস্থ্য সমিতিৰ ধঁপাত নিয়ন্ত্ৰণ কোষৰ উদ্যোগত 'নিচামুক্ত ভাৰত অভিযান'ৰ সফল প্ৰচাৰৰ বাবে শনিবাৰে নিউ বঙাইগাঁওস্থিত কেন্দ্ৰীয় বিদ্যালয়ত এক সজাগতামূলক সমদল আৰু সজাগতা সভা অনুষ্ঠিত কৰা হয় ৷ এই সজাগতামূলক সমদলৰ শুভা উদ্বোধন কৰে বিদ্যালয়খনৰ অধ্যক্ষ  পি চি শ্ৰীবাস্তৱে ৷ সজাগতা সমদলত বিদ্যালয়খনৰ ছাত্ৰ - ছাত্ৰী, শিক্ষক- শিক্ষয়িত্ৰীসকলৰ লগতে ধঁপাত নিযন্ত্ৰণ কোষৰ ন'ডেল বিষয়া ডাঃ ভাস্কৰভূষণ মেধি, ডাঃ পুলিন চন্দ্ৰ নাথ, অধিবক্তা জ্যোতিষ চন্দ্ৰ শৰ্মা, ৰাষ্ট্ৰীয় বাল সুৰক্ষা কাৰ্য্যক্ৰমৰ বঙাইগাঁও খণ্ড প্ৰাথমিক স্বাস্থ্য কেন্দ্ৰৰ এটা দলে অংশ গ্ৰহণ কৰে ৷ সজাগতা সমদলটো বিদ্যালয়খনৰ পৰা নিউ বঙাইগাঁও ৰে'লৱে জংচনলৈ পৰিভ্ৰমণ কৰে ৷ সমদলত অংশ গ্ৰহণ কৰা ছাত্ৰ - ছাত্ৰীসকলে হাতে হাতে ধঁপাত বিৰোধী বিভিন্ন প্লে কাৰ্ড লৈ ইয়াৰ ভয়াৱহতা সন্দৰ্ভত ৰাইজৰ মাজত সজাগতা অনাৰ প্ৰয়াস কৰে ৷ 

ইপিনে সজাগতা সমদলৰ পাছত বিদ্যালয়খনৰ প্ৰেক্ষাগৃহত 'ধঁপাত ব্যৱহাৰৰ অপকাৰিতা আৰু নিচামুক্ত ভাৰত' বিষয়ক এখন সজাগতামূলক সভা অনুষ্ঠিত হয় ৷ সভাত বক্তাসকলে বিষয়টো সন্দৰ্ভত বহলভাবে ব্যাখ্যা আগবঢ়ায় ৷ সভাত ছাত্ৰ - ছাত্ৰীসকলৰ মাজৰ পৰাও ধঁপাতৰ অপকাৰিতাৰ বিষয়ে কেইবাজনেও বক্তৃতা আগবঢ়ায় ৷ সভাৰ অন্তত ডাঃ ভাস্কৰ ভূষণ মেধিয়ে শলাগৰ শৰাই আগবঢ়ায় ৷🔯