🔯বঙাইগাঁও জিলা পথ সুৰক্ষা সমিতিৰ সভা অনুষ্ঠিত🔯

🔯বঙাইগাঁও জিলা পথ সুৰক্ষা সমিতিৰ সভা অনুষ্ঠিত🔯

📝News4Bongaigaon: ২২ ডিচেম্বৰ: বঙাইগাঁও জিলা পথ সুৰক্ষা সমিতিৰ এখন সভা শুকুৰবাৰে জিলা আয়ুক্ত কাৰ্যালয়ৰ সভাকক্ষত অনুষ্ঠিত হয়। সভাত সভাপতিত্ব কৰে জিলা আয়ুক্ত নৱদ্বীপ পাঠকে। জিলা পথ সুৰক্ষা সমিতিৰ সদস্য ক্ৰমে আৰক্ষী অধীক্ষক স্বপ্ননীল ডেকা, জিলা পৰিষদৰ মুখ্য কাৰ্যবাহী বিষয়া অনুপম ডেকা, অতিৰিক্ত জিলা আয়ুক্ত মগেন নৰহ আৰু অপূৰ্ব কুমাৰ নাথ, অতিৰিক্ত আৰক্ষী অধীক্ষক লুনা সোণোৱাল,উত্তৰ শালমাৰা মহকুমাৰ মহকুমাধিপতি মানস শইকীয়া, মহকুমা আৰক্ষী বিষয়া, বঙাইগাঁও সদৰ মহকুমাধিপতি, সহকাৰী আয়ুক্ত, চক্ৰ বিষয়াসকল, লোকনিৰ্মাণ পথ বিভাগৰ অধীক্ষক অভিযন্তা, জিলা পৰিবহন বিষয়া, লোকনিৰ্মাণ পথ বিভাগৰ কাৰ্যবাহী অভিযন্তা,ৰাষ্ট্ৰীয় ঘাইপথ প্ৰাধিকৰণৰ অভিযন্তা,ৰাষ্ট্ৰীয় ঘাইপথ আন্তঃগাঁঠনি উন্নয়ন নিগম লিমিটেডৰ অভিযন্তা তথা প্ৰকল্প সঞ্চালক, যুটীয়া স্বাস্থ্য সেৱা সঞ্চালক, আবকাৰী অধীক্ষক, আই উপত্যকা বন সংমণ্ডল বিষয়া, ৰেলৱেৰ অভিযন্তা, শিক্ষা বিভাগৰ বিষয়া,দুৰ্যোগ ব্যৱস্থাপনা প্ৰাধিকৰণৰ প্ৰকল্প বিষয়া,থানাসমূহৰ ভাৰপ্ৰাপ্ত বিষয়াসকলৰ উপস্থিতিত অনুষ্ঠিত সভাত জিলাখনত পথ দুৰ্ঘটনা হ্ৰাস কৰাৰ লগতে দুৰ্ঘটনাত মৃত্যুৰ হাৰ হ্ৰাস কৰাৰ বাবে যি যি পদক্ষেপ লোৱাৰ প্ৰয়োজন সেয়া পুংখানুপুংখভাৱে আলোচনা কৰা হয়।

সভাত জিলা আয়ুক্ত নৱদ্বীপ পাঠকে কয় যে কয় যে ইংৰাজী বৰ্ষৰ অন্ত বুলি বা নতুন বছৰৰ আৰম্ভণি বুলি এইকেইদিনত যি উৎসৱমুখৰ পৰিৱেশ হ'ব সেই আনন্দৰ মাজত যাতে কোনো লোকে প্ৰাণ হেৰুৱাব নালাগে সেই ক্ষেত্ৰত সংশ্লিষ্ট বিষয়াসকল সস্তম হৈ কাম কৰিব লাগিব। তদুপৰি ২৬ জানুৱাৰী পৰ্যন্ত এই অভিযান অহৰহ অব্যাহত ৰাখিব লাগিব বুলিও কয় জিলা আয়ুক্ত পাঠকে। এইক্ষেত্ৰত প্ৰয়োজন সাপেক্ষে জিলা আয়ুক্তৰ ফালৰ পৰা নিষেধাজ্ঞাও জাৰি কৰিব। বৰ্তমানৰ এই পুৰণি বছৰৰ শেষ তথা নতুন বছৰৰ আৰম্ভণিৰ এই সময়ত ল'বলগীয়া পদক্ষেপসমূহৰ উচিত কাৰ্যকৰণাৰ্থে অতিৰিক্ত জিলা আয়ুক্ত (দণ্ডাধীশ শাখা), চক্ৰ বিষয়া, ভাৰপ্ৰাপ্ত আৰক্ষী বিষয়া, ৰাষ্ট্ৰীয় ঘাইপথ  পথ প্ৰাধিকৰণৰ অভিযন্তা, ৰাষ্ট্ৰীয় ঘাইপথ আন্তঃগাঁঠনি উন্নয়ন নিগম লিমিটেডৰ অভিযন্তা তথা লোকনিৰ্মাণ পথ বিভাগৰ অভিযন্তাক যৌথভাৱে দুৰ্ঘটনাপ্ৰবণ স্থান পৰিদৰ্শন কৰিবলৈ জিলা আয়ুক্ত পাঠকে নিৰ্দেশ দিয়ে ৷ 

সেইদৰে আৰক্ষী অধীক্ষক স্বপ্ননীল ডেকাই কয় যে কোনো যুৱকে যাতে জিলাখনত বাইক ষ্টান্ট নকৰে তাৰ প্ৰতি জিলা পৰিবহন বিষয়াই কঢ়া নজৰ দিব লাগে। যান-বাহন চলোৱাৰ নিয়মসমূহ মানি চলিবলৈ ৰাইজক গোহাৰি জনাই মাইকযোগে ঘোষণা দিব লাগে বুলিও তেওঁ কয় আৰু যিসকল বাইক আৰোহীয়ে হেলমেট নিপিন্ধাকৈ বাইক চলায় আৰু যান-বাহন আইন উলংঘা কৰে তেওঁলোকৰ গাড়ী চলোৱা অনুজ্ঞাপত্ৰ নিলম্বন কৰিব লাগে বুলিও তেওঁ কয়। আৰক্ষী অধীক্ষকগৰাকীয়ে আৰু কয় যে যিসকলৰ গাড়ী চালকৰ অনুজ্ঞাপত্ৰ নিলম্বন কৰা হয় সেই তালিকাখন সামাজিক মাধ্যমত প্ৰচাৰ কৰিব লাগে যাতে সেই গাড়ীচালকসকলে গাড়ী চলালে আৰক্ষীয়ে ধৰিব পাৰে।