🔯ৰাষ্ট্ৰীয় ঘাইপথত ই-ৰিক্সা চলোৱাৰ ক্ষেত্ৰত বঙাইগাওঁ জিলা দণ্ডাধীশৰ বাধা আৰোপ🔯

🔯ৰাষ্ট্ৰীয় ঘাইপথত ই-ৰিক্সা চলোৱাৰ ক্ষেত্ৰত বঙাইগাওঁ জিলা  দণ্ডাধীশৰ বাধা আৰোপ🔯

🔯নিয়ম উলংঘা কৰিলে গ্ৰহণ কৰা হ'ব বিহিত ব্যৱস্থা🔯

📝News4Bongaigaon:  ২৩ ডিচেম্বৰ: বঙাইগাঁও জিলাৰ জিলা দণ্ডাধীশ তথা জিলা পথ সুৰক্ষা সমিতিৰ অধ্যক্ষ নৱদ্বীপ পাঠকৰ  এক নিৰ্দেশনামৰ্মে জিলাখনৰ পৰিধিৰ মাজত থকা ৰাষ্ট্ৰীয় ঘাইপথত ই-ৰিক্সা চলোৱাটো সম্পূৰ্ণৰূপে বন্ধ কৰিবলৈ কঠোৰ নিৰ্দেশনা দিছে। ই-ৰিক্সাসমূহে সাধাৰণতে গ্ৰাম্য পথৰ পৰা ৰাষ্ট্ৰীয় ঘাইপথ সংযোগস্থললৈকেহে চলোৱাৰ বাবে অনুজ্ঞাপত্ৰ লাভ কৰে,কিন্তু ই-ৰিক্সাচালকসকলে এই অনুজ্ঞাপত্ৰ লৈও বিধিবহিৰ্ভূতভাৱে ৰাষ্ট্ৰীয় ঘাইপথত যাত্ৰী লৈ ই-ৰিক্সাসমূহ চলায়।ইয়াৰ ফলত লঘু যান-বাহন বা আন ডাঙৰ বাহন চলোৱাৰ ক্ষেত্ৰত আহুকালৰ সৃষ্টি কৰে। ৰাষ্ট্ৰীয় ঘাইপথেৰে লঘু যান-বাহন বা ডাঙৰ যান-বাহনে যাত্ৰী লৈ নিৰ্দিষ্ট গতিত বাধাহীনভাৱে গাড়ী চলাই গন্তব্য স্থান পাব লাগে। আনহাতে বৰ্তমান শীতকালত কুৱলীৰ বাবে আবেলি সোনকালে আৰু পুৱাৰ ভাগত ৰাস্তাত পোহৰ কম হোৱাৰ বাবে দুৰ্ঘটনাৰ সম্ভাৱনা থাকে। বহুক্ষেত্ৰত দেখা যায় ই-ৰিক্সাৰ পৰা যাত্ৰী উঠা-নমা কৰাৰ সময়ত বহু দুৰ্ঘটনা সংঘটিত হয়। গতিকে এতিয়াৰ পৰা কোনো ই-ৰিক্সা ৰাষ্ট্ৰীয় ঘাইপথ ত চলাবলৈ অনুমতি দিয়া নহ'ব বুলি নিৰ্দেশনা জাৰি কৰিছে জিলা দণ্ডাধীশে।ই-ৰিক্সাসমূহ গ্ৰাম্য পথৰ পৰা ৰাষ্ট্ৰীয় ঘাইপথ সংযোগ স্থানলৈকেহে চলাব পাৰিব।জিলা পৰিবহন বিষয়া আৰু আৰক্ষীয়ে এই নিয়ম বলবৎ কৰিব আৰু নিয়ম উলংঘা কৰিলে বিহিত ব্যৱস্থা গ্ৰহণ কৰা হ'ব বুলি নিৰ্দেশনাটোত কোৱা হৈছে।ৰাষ্ট্ৰীয় ঘাইপথত বিধিবহিৰ্ভূতভাৱে ই-ৰিক্সা চলোৱাৰ ফলত যদি কোনো দুৰ্ঘটনা সংঘটিত হয় তেতিয়াহ'লে সংশ্লিষ্ট থানাত ই-ৰিক্সাৰ মালিকক দুৰ্ঘটনাটোৰ বাবে জবাবদিহি কৰি কেচ পঞ্জীয়ন কৰা হ'ব ।এই নিৰ্দেশনা বলবৎ কৰাৰ ক্ষেত্ৰত ৰাষ্ট্ৰীয় ঘাইপথ আন্তঃগাঁঠনি উন্নয়ন নিগম লিমিটেডৰ মহাপ্ৰবন্ধক আৰু ৰাষ্ট্ৰীয় ঘাইপথ প্ৰাধিকৰণৰ প্ৰকল্প সঞ্চালকে জিলা আৰক্ষী আৰু জিলা পৰিবহন বিষয়াৰ লগত সহযোগ কৰিব।