🔯বঙাইগাঁৱত বিকশিত ভাৰত সংকল্প যাত্ৰাৰ অনুষ্ঠানত মন্ত্ৰী ৰণজিৎ দাস🔯

🔯বঙাইগাঁৱত বিকশিত ভাৰত সংকল্প যাত্ৰাৰ অনুষ্ঠানত মন্ত্ৰী ৰণজিৎ দাস🔯 

📝News4Bongaigaon:  ১৬ ডিচেম্বৰঃ বঙাইগাঁও জিলাৰ গাঁও-পঞ্চায়তসমূহত চলি থকা ভাৰত চৰকাৰৰ "বিকশিত ভাৰত সংকল্প যাত্ৰা"কাৰ্যসূচী শনিবাৰে জিলাখনৰ টাপাট্টাৰী উন্নয়ন খণ্ডৰ অন্তৰ্গত মালেগড় গাঁও-পঞ্চায়তৰ বাসন্তী মন্দিৰ প্ৰাংগণ আৰু বৰজানা গাঁও-পঞ্চায়তৰ বৰজানা হাইস্কুলত অনুষ্ঠিত হয়। এই কাৰ্যসূচীত অসম চৰকাৰৰ পঞ্চায়ত আৰু গ্ৰামোন্নয়ন মন্ত্ৰী ৰণজিৎ কুমাৰ দাস উপস্থিত থাকে। মন্ত্ৰীগৰাকীয়ে ৰাইজক উদ্দেশ্য কৰি দিয়া ভাষণত কয় যে ভাৰত চৰকাৰৰ আঁচনিসমূহ দুখীয়া ৰাইজৰ মাজৰ প্ৰতিজন লোকৰ সুবিধা হোৱাকৈ ৰূপায়িত কৰি আছে। প্ৰধানমন্ত্ৰী নৰেন্দ্ৰ মোদীয়ে দুখীয়া গৃহহীন লোকৰ বাবে গৃহ নিৰ্মাণ কৰি দিছে, বিশুদ্ধ খোৱাপানীৰ ব্যৱস্থা কৰিছে নিজ নিজ গৃহতে, অনাময় শৌচাগাৰ দিছে, বিনামূলীয়া এল পি জি গেছ দিছে, বিনামূলীয়া বিদ্যুৎ সংযোগ দিছে, আয়ুষ্মান কাৰ্ড দি পাঁচ লাখ পৰ্যন্ত টকাৰ বিনামূলীয়া চিকিৎসাৰ সুবিধা দিছে। এই সুবিধাসমূহ প্ৰতিখন গাঁৱৰ লোকে যাতে গম পায় তাৰ বাবে "বিকশিত ভাৰত সংকল্প যাত্ৰা"ৰ অনুষ্ঠানৰ জৰিয়তে ব্যৱস্থা কৰিছে ।

এই অনুষ্ঠানৰ জৰিয়তে প্ৰতিটো চৰকাৰী বিভাগৰ বিষয়াই একেবাৰে ভিতৰুৱা গাঁওলৈ আহিছে আৰু উপকৃত হোৱা হিতাধিকাৰীৰ কাহিনী শুনিছে। ভাৰত চৰকাৰৰ আই ই চি ভেনৰ জৰিয়তে প্ৰধানমন্ত্ৰী নৰেন্দ্ৰ মোদীৰ ভাষণ শুনোৱা হৈছে সাধাৰণ ৰাইজক। মুঠতে ভাৰত চৰকাৰ তথা অসম চৰকাৰে যে সাধাৰণ ৰাইজৰ সুবিধা কৰি দিছে সেই বিষয়ে মন্ত্ৰীগৰাকীয়ে নিজৰ বক্তব্যত উল্লেখ কৰে। বাসন্তী মন্দিৰ প্ৰাংগণত অনুষ্ঠিত "বিকশিত ভাৰত সংকল্প যাত্ৰা"ৰ অনুষ্ঠানৰ অংশ হিচাপে কুশান নৃত্য, বিহু নৃত্য আদি পৰিৱেশন কৰা হয়। তদুপৰি মালেগড় গাঁও-পঞ্চায়তৰ অন্তৰ্গত স্বাস্থ্যৱান শিশুক প্ৰমাণপত্ৰ প্ৰদান, কৃতী ছাত্ৰ-ছাত্ৰীক উপহাৰ, অসম খেল মহাৰণৰ পাৰদৰ্শি খেলুৱৈ আৰু "অসম সাংস্কৃতিক মহাসংগ্ৰাম"ৰ পাৰদৰ্শি শিল্পীক অসমৰ মুখ্যমন্ত্ৰীৰ স্বাক্ষৰ সম্বলিত প্ৰমাণপত্ৰও প্ৰদান কৰে মন্ত্ৰী দাসে। অনুষ্ঠানত কৃষি বিভাগৰ ড্ৰোনৰ দ্বাৰা খেতিত কেনেদৰে ঔষধ, সাৰ,পানী আদি দিব পাৰি তাৰ এটা আভাস দিয়ে বিভাগীয় বিষয়াই। 

এই অনুষ্ঠানত বঙাইগাঁও জিলাৰ জিলা আয়ুক্ত নৱদ্বীপ পাঠক, জিলা উন্নয়ন আয়ুক্ত ধ্ৰুৱজ্যোতি দাস, জিলা পৰিষদৰ মুখ্য কাৰ্যবাহী বিষয়া অনুপম ডেকা, উত্তৰ শালমাৰা মহকুমাৰ মহকুমাধিপতি মানস শইকীয়া আৰু স্বাস্থ্য, কৃষি, মহিলা আৰু শিশু উন্নয়ন ,জনস্বাস্থ্য কাৰিকৰী, বেংক, জলসিঞ্চন, পশুপালন, উদ্যোগ আৰু বাণিজ্য, পঞ্চায়ত আৰু গ্ৰামোন্নয়ন, মীন উন্নয়ন আদি বিভাগৰ বিষয়াসকল উপস্থিত থাকে। সকলো বিভাগৰে একোখনকৈ ষ্টল থাকে বাসন্তী মন্দিৰ প্ৰাংগণত। উল্লেখ্য যে বৰজানা গাঁও-পঞ্চায়তৰ বৰজানা হাইস্কুলতো অনুৰূপ অনুষ্ঠান অনুষ্ঠিত কৰা হয়।