🔯জৈৱ বৈচিত্র্য আৰু প্রাকৃতিক ভাৰসাম্য ৰক্ষাৰ স্বার্থত উচ্চতম ন্যায়ালয়লৈ যাব আন্তঃৰাষ্ট্ৰীয় কোচ-ৰাজবংশী সংস্থা (ইকৰা)🔯

🔯জৈৱ বৈচিত্র্য আৰু প্রাকৃতিক ভাৰসাম্য ৰক্ষাৰ স্বার্থত উচ্চতম ন্যায়ালয়লৈ যাব আন্তঃৰাষ্ট্ৰীয় কোচ-ৰাজবংশী সংস্থা (ইকৰা)🔯

🔯"যাক সৃষ্টি কৰিব নোৱাৰি তাক ধ্বংস কৰাৰ অধিকাৰো নাই"🔯

📝News4Bongaigaon:  ১৬ ডিচেম্বৰঃ প্ৰকৃতিৰ অনুপম সৃষ্টি তথা জীৱকুলৰ ভাৰসাম্যস্থলী পাহাৰ, টিলা, জলাশয় আদিত চৰকাৰে কেৱল ৰাজহ সংগ্ৰহৰ বাবে খনন কৰাৰ বাবে অনুমতি দিয়া কাৰ্য্যত ক্ষোভ প্রকাশ কৰিছে আন্তঃৰাষ্ট্রীয় কোচ-ৰাজবংশী সংস্থা ( ইকৰা) ৰ সভাপতি ভদ্রেশ্বৰ বৰ্মনে ৷ এই সন্দৰ্ভত এক প্ৰেছ বিবৃতিত সংস্থাৰ সভাপতিগৰাকীয়ে অসমৰ বিভিন্ন জিলাত থকা প্ৰকৃতিৰ অনুপম সৃষ্টি তথা জীৱকুলৰ ভাৰসাম্যস্থলী আৰু ঐতিহাসিক স্থান, পাহাৰ, টিলা, জলাশয় আদিত চৰকাৰে খনন কৰাৰ অনুমতি দিয়া পৰিলক্ষিত হৈছে বুলি উল্লেখ কৰি কয় যে বঙাইগাঁও জিলাৰ ভৈৰৱ পাহাৰত ৰত্নপীঠ ভৈৰৱ মন্দিৰ (শিৱ মন্দিৰ) অৱস্থিত আৰু দুষ্প্রাপ্য সোণালী বান্দৰৰ আৱাসস্থলী। সেইদৰে জিলাখনৰ যোগীঘোপাৰ কৰেয়া পাহাৰ যাৰ অনাবিল আনন্দই হাত বাউলি মাতে প্রকৃতিপ্রেমী আৰু পর্যটকক  একেদৰে কামৰূপ মহানগৰ জিলাৰ দিছপুৰৰ সমীপত আমচাং বনাঞ্চলৰ পাঁচ কি.মি. ভিতৰলৈ গৈ হাজাৰ-হাজাৰ বিঘা বনাঞ্চলৰ মাটি দখল কৰি এক্সেভেটৰ, ডাম্পাৰ আদিৰে দিনে-নিশাই চৰকাৰৰ পৃষ্ঠপোষকতাত বন বিভাগ আৰু জিলা প্রশাসনৰ সন্মুখতে পুঁজিপতি বনিয়াই নির্মাণ কৰিছে ৰাষ্টা আৰু বিলাসী ৰিজৰ্ট। লক্ষীমপুৰ জিলাৰ দুলুং বনাঞ্চলৰ দুষ্প্রাপ্য চিয়া-নাহৰ গছ আৰু ধেমাজি জিলাৰ সোৱণশিৰি বনাঞ্চলৰ ৰঙা খয়েৰ গছ কাটি জৈৱ বৈচিত্ৰ্যৰ প্ৰতি ভাবুকি কঢ়িয়াই আনিছে। সেইদৰে অসমৰ গোৱালপাৰা, ধুবুৰী, কাৰ্বি আংলং, উত্তৰ কাছাৰ, নগাঁও, গোলাঘাট আদি জিলাত বিভিন্ন পাহাৰ বা টিলাত খনন কাৰ্য্য চলোৱা বুলি বাতৰি কাকতত সদায় প্রকাশ পাই আহিছে ৷ সেয়ে এই বিষয়টোত গভীৰভাৱে ক্ষোভ প্রকাশ কৰি সভাপতি বৰ্মনে লগতে বিবৃতিটোত উল্লেখ কৰে যে সৰু-বৰ বিভিন্ন পাহাৰ, টিলা, জলাশয় আদিৰ বাবে অসম ভাৰতৰ ভিতৰতে অনুপম সৌন্দর্য্যস্থলী আৰু এনেবোৰ স্থানতেই বহু দুষ্প্রাপ্য প্রাণীৰ আৱাসস্থলী। অনাবিল সৌন্দৰ্য্যৰ আকৰ পাহাৰ, টিলা, জলাশয়সমূহেই প্রকৃতিৰ অনবদ্য অৱদান। এনেবোৰ স্থানৰ বাবেই জীৱকুলৰ ভাৰসাম্য বক্ষা হৈ আহিছে। কিন্তু পাহাৰ, টিলা, জলাশয়সমূহ নিৰন্তৰভাৱে ধ্বংস হৈ অহাৰ ফলত অৰণ্যসমূহ সংকুচিত হৈ আহিছে। এনেবোৰ কাৰণতেই সংঘটিত হৈছে মানুহ আৰু আন জীৱকুলৰ মাজত সংঘাত। এই সংঘাতৰ ফলত নিতৌ হস্তীকুলৰ আক্ৰমণ সংঘটিত হৈছে সৰ্ব্বশ্রেষ্ঠ বুদ্ধিমান বুলি পৰিচয় দিয়া মানৱকূলৰ ওপৰত। ৰাজ্য চৰকাৰে বাট-পথৰ উন্নয়ন, মানুহৰ বাসস্থানৰ পৰিসৰ বৃদ্ধিৰ বাবে লিজত দি আহিছে জীৱকুলৰ আবাসস্থলী পাহাৰ, টিলা, জলাশয় আদি। বিকল্প ব্যবস্থা থকা স্বত্বেও ৰাজহ আদায়ৰ বাবে প্ৰকৃতিৰ অনুপম সৃষ্টিৰ ওপৰত বিনা দ্বিধাই খনন কার্য চলাৰ অনুমতি দিছে। ইয়াৰ ফলতেই নিৰ্মাণকাৰী সংস্থাবোৰে অহর্ণিশে শ-শ ডাম্পাৰ, ট্রেক্টৰ আদি ব্যৱহাৰ কৰি পাহাৰসমূহ খনন কৰাত শব্দ প্রদূষণ, বায়ু প্রদূষণকে ধৰি বিভিন্ন ক্ষেত্ৰত পৰিৱেশ বিঘ্নিত হৈ আহিছে। পাহাৰসমূহত আদিম কালৰ পৰাই আৱাসস্থলী হিচাবে থিতাপি লোবা প্রাণীকূলেই ত্রাহী মধুসুদন সুঁৱৰিব লগা হৈছে। আনপিনে পক্ষীকূল বিভঙ্গ দিছে। বর্মনে বিবৃতিত আৰু উল্লেখ কৰে যে পাহাৰ, টিলা, জলাশয় আদি অঞ্চলসমূহ কোনো কালেই মানৱ সৃষ্টি নহয় ৷ গতিকে মানুহৰ ধ্বংস কৰাৰ অধিকাৰো নাই। এনে অৱস্থাত প্রকৃত প্ৰদত্ত এনেবোৰ স্থান সংৰক্ষণ কৰাৰ বাবে চৰকাৰলৈ আহ্বান জনায়  সভাপতি বর্মনে । অন্যথা আন্তঃৰাষ্ট্ৰীয় কোচ ৰাজবংশী সংস্থাই  চৰকাৰৰ এই কাৰ্য্যৰ বিৰুদ্ধে দেশৰ মহামান্য উচ্চতম  ন্যায়ালয়ৰ কাষ চাপিবলৈ বাধ্য হ'ব বুলিও বিবৃতিটোত উল্লেখ কৰিছে ৷