🔯বঙাইগাঁৱত আছুৰ উদ্যোগত শ্বহীদ দিৱস পালন🔯

🔯বঙাইগাঁৱত আছুৰ উদ্যোগত শ্বহীদ দিৱস পালন🔯 

📝News4Bongaigaon: ১০ ডিচেম্বৰঃ সমগ্ৰ ৰাজ্যৰ লগতে আজি বঙাইগাঁৱতো অসম আন্দোলনৰ ৮৬০ গৰাকী শ্বহীদক স্মৰণ কৰি আছুই শ্বহীদ দিৱস পালন কৰে ৷ বঙাইগাঁও আঞ্চলিক ছাত্ৰ সন্থাৰ উদ্যোগত চহৰখনৰ বৰপাৰাস্থিত শ্বহীদ বেদী প্ৰাংগণত পালন কৰা শ্বহীদ দিৱস উপলক্ষে সদৌ অসম ছাত্ৰ সন্থাৰ পতাকা উত্তোলন কৰে আঞ্চলিক ছাত্ৰ সন্থাৰ সভাপতি চম্পক চৌধুৰীয়ে ৷ ইয়াৰ পিচতে শ্বহীদ বেদীত ভাৰপ্ৰাপ্ত সাধাৰণ সম্পাদক ভৱেন দাসে বন্তি প্ৰজ্বলন কৰি শ্বহীদসকললৈ শ্ৰদ্ধাঞ্জলি জ্ঞাপন কৰে ৷ অনুষ্ঠানত শ্বহীদ নৱ কুমাৰ ৰায়ৰ ভাতৃ বুদ্ধদেৱ ৰায়, শ্বহীদ মণিকান্ত ৰায়ৰ ভাতৃ বিপুল ৰায় আৰু শ্বহীদ পিৰেন ৰায়ৰ ভটিজা কেশৱ ৰায়, আঞ্চলিক সমিতিৰ উপদেষ্টা কুলজিৎ ৰায় আদিও উপস্থিত থাকি শ্বহীদলৈ শ্ৰদ্ধাঞ্জলি জ্ঞাপন কৰে ৷

উল্লেখ্য যে অনুষ্ঠানৰ  লগত সংগতি ৰাখি ভাগৱত পাঠ আৰু আইসকলৰ দ্বাৰা নাম - প্ৰসংগও অনুষ্ঠিত হয় ৷ পিছলৈ অনুষ্ঠানত জিলা আছুৰ সাধাৰণ সম্পাদক কংকন বায়ন আৰু কেন্দ্ৰীয় কাৰ্য্যনিৰ্বাহক সদস্য নিলোৎপল চক্ৰৱৰ্তী আদি উপস্থিত হৈ শ্বহীদ বেদীত শ্ৰদ্ধাঞ্জলি জনায় ৷ আনহাতে সন্ধিয়া শ্বহীদ বেদীত বন্তি প্ৰজ্বলন কৰা হয় ৷ উল্লেখ্য যে জিলা ছাত্ৰ সন্থাৰ অন্তৰ্গত উত্তৰ শালমাৰা আঞ্চলিক ছাত্ৰ সন্থা, অভয়াপুৰী আঞ্চলিক ছাত্ৰ সন্থা, ধনতোলা বজাৰ আঞ্চলিক ছাত্ৰ সন্থা, মাণিকপুৰ আঞ্চলিক ছাত্ৰ সন্থাকে ধৰি বিভিন্ন আঞ্চলিক সমিতিয়েও শ্বহীদ দিৱস পালন কৰে ৷