🔯ৰূপসী বিমানবন্দৰৰ নাম সলনিৰ বাবে ৰাজ্য চৰকাৰৰ কেবিনেটত গ্ৰহণ কৰা সিদ্ধান্তকলৈ ক্ষুদ্ধ আক্ৰাছু🔯

🔯ৰূপসী বিমানবন্দৰৰ নাম সলনিৰ বাবে ৰাজ্য চৰকাৰৰ কেবিনেটত গ্ৰহণ কৰা সিদ্ধান্তকলৈ ক্ষুদ্ধ আক্ৰাছু🔯

চৰকাৰৰ সিদ্ধান্তৰ তীব্ৰ বিৰোধিতাঃ সিদ্ধান্ত সলনিৰ আহ্বান

আগন্তুক এসপ্তাহৰ ভিতৰত ৰাইজমেল পাতি বহুধা বিভক্ত আক্ৰাছুক একত্ৰিতকৰণৰ বাবে পদক্ষেপ গ্ৰহণৰ ঘোষণা 

📝বঙাইগাঁওঃ ২ আগষ্টঃ অসম মন্ত্ৰীসভাৰ কেবিনেট বৈঠকত ৰূপসী বিমানবন্দৰৰ নাম সলনি কৰি গুৰু কালীচৰণ ব্ৰহ্ম নামেৰে নামকৰণ কৰাৰ বাবে গ্ৰহণ কৰা সিদ্ধান্তত ক্ষুদ্ধ হৈ পৰিছে আক্ৰাছু ৷ শুকুৰবাৰে এই সন্দৰ্ভত বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদ মেলত আক্ৰাছুৰ সভাপতি ক্ষীতিশ বৰ্মনে ৰাজ্য চৰকাৰৰ এই সিদ্ধান্তৰ বিৰোধিতা কৰি পূৰ্বৰ নাম অক্ষুন্ন ৰখাৰ বাবে দাবী জনায় ৷ লগতে যদি নাম সলনি কৰে তেতিয়াহলে কোচ ৰাজবংশীৰ বীৰৰ নামত নামাকৰণ কৰিবলৈ চৰকাৰক আহ্বান জনায় ৷ আক্ৰাছুৰ সভাপতি বৰ্মনে সংবাদ মেলত কয় যে ৩১ জুলাইত ৰূপসী বিমান বন্দৰকলৈ ৰাজ্য চৰকাৰৰ কেবিনেটে যি সিদ্ধান্ত লৈছে তাত আমি দুখিত ৷ চৰকাৰৰ এই কাৰ্যক তীব্ৰ ভাষাৰে গৰিহণা দিয়াৰ লগতে ধিক্কাৰ জনায় ৷ সভাপতিগৰাকীয়ে কোচ ৰাজবংশী ৰজাৰ আমোলৰ পৰা ইতিহাস সাঙোৰ খাই থকা এই বিমান বন্দৰটোৰ নাম সলনি কৰাৰ কেবিনেট সিদ্ধান্ত লোৱাৰ পূৰ্বে মুখ্যমন্ত্ৰীয়ে জনগোষ্ঠীটোৰ লোকৰ লগত আলোচনা কৰাৰ প্ৰয়োজন আছিল বুলি কৈ তাকে নকৰি একপক্ষীয়ভাৱে চৰকাৰে লোৱা কেবিনেট সিদ্ধান্তক আমি কোনোপধ্যে মানি ল'ব পৰা নাই  বুলি কয়  ৷ লগতে কয়,  ইয়াত আমি দেখিবলৈ পাইছো যে কোচ ৰাজবংশীসকলৰ ইতিহাস আজি সংকটাপন্ন ৷ ইতিহাসকেই আজি মচি দিব ওলাইছে ৷ এটা জনগোষ্ঠীক নিঃ শেষ কৰিব ওলাইছে ৷ এই কৰ্যক আমি ধিক্কাৰ দিছো ৷ মুখ্যমন্ত্ৰীক উদ্দেশ্যি আক্ৰাছুৰ সভাপতিৰ মন্তব্য - কোনোবা এটা জনগোষ্ঠীক আগুৱাই নিবলৈ কিবা পৰিকল্পনা ৰচাৰ বিপৰীতে আন কোনোবা এটা জনগোষ্ঠীক ধ্বংস কৰাৰ পৰিকল্পনা ৰচিছে নেকি ? আমি স্পষ্টভাবে দেখিছো যে মুখ্যমন্ত্ৰীয়ে কোচ ৰাজবংশী জনগোষ্ঠীক নিঃশেষ কৰাৰ লগতে জনগোষ্ঠীটোৰ ইতিহাসক নিঃ শেষ কৰাৰ ষড়যন্ত্ৰ ৰচিছে ৷ সেয়ে এই ষড়যন্ত্ৰ বন্ধ কৰক ৷ অন্যথা কোচ ৰাজবংশী জনগোষ্ঠীয়ে হাত সাৱতি বহি নেথাকে ৷ ইতিহাস প্ৰসিদ্ধ নাম বিলাকক কেতিয়াও নিঃশেষ কৰাৰ ষড়যন্ত্ৰ নকৰিবলৈকো সকিয়াই দি চৰকাৰৰ এই কাৰ্যৰ আক্ৰাছুৱে স্পষ্টভাবে বিৰোধিতা কৰা বুলিও কয় ৷ আক্ৰাছুৰ সভাপতিগৰাকীয়ে কয় যে আমি গুৰু কালীচৰন ব্ৰহ্মক অপমান কৰিব বিচৰা নাই আৰু তেওঁৰ নামত কালিমা সানিব বিচৰা নাই ৷ কিন্তু ইয়াৰ লগে লগে কোচ ৰাজবংশীসকলৰ ইতিহাস প্ৰসিদ্ধ ৰূপসী বিমান বন্দৰকলৈও কালিমা সানিব নোৱাৰিব আৰু বৰ্তমানৰ নামটো মচি দিব নোৱাৰিব ৷ আমি কাৰো স্বাভিমানত আঘাট হানিব দিব বিচৰা নাই ৷ প্ৰত্যেকৰে স্বাভিমানক আমি সন্মান কৰো ৷ কিন্তু যেতিয়া আমাৰ স্বাভিমানত কোনোবাই আঘাট হানিব বিচাৰিব তেতিয়া আমি বহি নাথাকো ৷ এয়া স্পষ্ট কথা ৷ সেই বিমান বন্দৰৰ বাবে ৩৫০০ বিঘা মাটি জমিদাৰে দান কৰিছিল ৷ এই ঐতিহাসিক বিমানবন্দৰৰ যি ভূমি সেয়া এটা সময়ত বীৰ চিলাৰায়ৰ নাতি তথা ৰজা ৰঘুদেৱ নাৰায়ণৰ পুত্ৰ ৰজা পৰীক্ষিত নাৰায়ণৰ ৰাজ হাউলি আছিল ৷ ৰাজবংশৰ জমিদাৰ জগদিন্দ্ৰ নাৰায়ণ চৌধুৰীয়ে বৃটিছক বিমান বন্দৰ নিৰ্মাণৰ বাবে দান দিয়া মাটিখিনিত নিৰ্মাণ কৰা বিমান বন্দৰটোৰ নাম জমিদাৰৰ পত্নীৰ নামেৰে ৰূপসী নামাংকিত কৰিছিল ৷ গতিকে এই নাম সলনি কৰিব বিচৰাটো অতি দুৰ্ভাগ্যজনক কথা ৷ যিখন চৰকাৰে খিলঞ্জীয়া জনগোষ্ঠী সুৰক্ষিত থাকিব লাগে বুলি কৈ আহিছে সেইখন চৰকাৰে যদি খিলঞ্জীয়াক নিঃ শেষ কৰিবলৈ ষড়যন্ত্ৰ কৰে, খিলঞ্জীয়াৰ মাজতে যদি সংঘাত লগাই দিয়াৰ পৰিকল্পনা কৰে তেতিয়াহলে চৰকাৰ তথা মুখ্যমন্ত্ৰীগৰাকীৰ পৰা আমি কি ভাল আশা কৰিম বুলিও প্ৰশ্ন উত্থাপন কৰে ৷ 

সেয়ে মুখ্যমন্ত্ৰীক কেবিনেট সিদ্ধান্তটো উঠাই ল'বলৈ আহ্বান জনাই কয় যে যদিহে নাম সলনি কৰিব বিচাৰে তেতিয়াহলে বীৰ চিলাৰায়ৰ নামত নামকৰণ কৰিব পাৰে ৷ সেইদৰে নৰনাৰায়ণ - চিলাৰায়ৰ নামত অথবা প্ৰতিমা বৰুৱা পাণ্ডেৰ নামত নামকৰণ কৰিব পাৰে ৷ কিন্তু তাকে নকৰি নাম সলনিকলৈ ৰাজনীতি নকৰিবলৈ মুখ্যমন্ত্ৰী তথা চৰকাৰক আহ্বান জনায় ৷ সংবাদ মেলত সভাপতি বৰ্মনে কয় যে বিজেপি চৰকাৰৰ পৰা কোচ ৰাজবংশী জনগোষ্ঠীটোৱে সমস্যাসমূহ সমাধান কৰিব বুলি আশাবাদী আছিল ৷ কিন্তু সেয়া হৈ নুঠিল ৷ জনগোষ্ঠীটোৰ কমতাপুৰৰ দাবীকে ধৰি কোনো এটা দাবী পূৰণ নকৰিলে ৷ যি জনজাতিকৰণৰ দাবীটো সেয়াও পূৰণ নকৰিলে ৷ আগলৈ যে জনগোষ্ঠীটোৰ জনজাতিকৰণ হ'ব তাকলৈ আজিও আমি স্পষ্ট নহয় ৷ মুখ্যমন্ত্ৰীয়ে আমাক এখন স্বায়ত্তশাসিত পৰিষদ দিছে যদিও সেইখনো ফুটুকাৰ ফেনত পৰিণত হৈছে ৷ যিধৰণে কামৰ অগ্ৰগতি হ'ব লাগিছিল সেয়াও হোৱা নাই ৷ সেয়ে নাম সলনি নহয়, যদি কৰিব বিচাৰে জনগোষ্ঠীটোক জনজাতিকৰণ কৰক ৷ ইপিনে কোচ ৰাজবংশী জনগোষ্ঠীৰ বহুধা বিভক্ত সংগঠন আক্ৰাছুক আগন্তুক এসপ্তাহৰ ভিতৰত একত্ৰিতকৰণৰ বাবে ৰাইমেল আহ্বান কৰি ৰাইজৰ ওপৰত দায়িত্ব অৰ্পণ কৰিব বুলিও সংবাদ মেলত উল্লেখ কৰে ৷ ৰাইজে জনগোষ্ঠীটোৰ এই বহুধা বিভক্ত সংগঠনটোক একত্ৰিত কৰাৰ বাবে সিদ্ধান্ত ল'ব আৰু একত্ৰিত হোৱাৰ পিচত জনগোষ্ঠীটোৰ যি প্ৰাপ্য অধিকাৰ সেয়া কাঢ়ি অনাৰ বাবে সাজু হ'ব বুলিও সভাপতি বৰ্মনে উল্লেখ কৰে ৷ সংবাদ মেলত সংগঠনটোৰ আন কেইবাগৰাৰীও বিষয়ববীয়া উপস্থিত আছিল 🔯