🔯ৰূপসী বিমানবন্দৰৰ নাম সলনিৰ চৰকাৰৰ সিদ্ধান্তৰ বিৰোধিতা🔯

🔯ৰূপসী বিমানবন্দৰৰ নাম সলনিৰ চৰকাৰৰ সিদ্ধান্তৰ বিৰোধিতা🔯 

মুখ্যমন্ত্ৰীলৈ আক্ৰাছুৰ বলোৰাম বৰ্মন গোটৰ স্মাৰক পত্ৰঃ 

সিদ্ধান্ত সলনি নকৰিলে জংগী আন্দোলন গঢ়ি তোলাৰ হুংকাৰ 

📝২ আগষ্টঃ ৰূপসী বিমানবন্দৰ নাম সলনিৰ চৰকাৰৰ কেবিনেট সিদ্ধান্তৰ বিৰোধিতা কৰিছে আক্ৰাছুৰ আন এটা গোটৰ সভাপতি বলোৰাম বৰ্মনে ৷ এই সন্দৰ্ভত বৃহত্তৰ বঙাইগাঁও প্ৰেছ ক্লাবত আয়োজন কৰা এখন সংবাদ মেলত আক্ৰাছুৰ সভাপতিগৰাকীয়ে ৰাজ্য চৰকাৰে শেহতীয়াভাবে কেবিনেটত বিমানবন্দৰৰ নাম সলনিৰ বাবে যিটো সিদ্ধান্ত গ্ৰহণ কৰিছে তাক তীব্ৰ গৰিহণা জনাই কয় যে ইতিহাস থকা জাতি এটাক কেতিয়াও ধ্বংস কৰিব নোৱাৰে ৷ কিন্তু কোচ ৰাজবংশী জনগোষ্ঠীটোক ধ্বংস কৰাৰ বাবে ৰাজ্য চৰকাৰ আৰু বিটিআৰ চৰকাৰে যি চেষ্টা হাতত লৈছে তাক আমি গৰিহণা দিছো ৷ জাতি এটাক এইদৰে নিঃ শেষ কৰিব নালাগে ৷ কোচ ৰাজবংশীসকলৰ যি মৌলিক অধিকাৰ সেয়া বিটিআৰ অঞ্চল বা ৰাভা হাচং অঞ্চলত ইতিমধ্যে খৰ্ব কৰা হৈছে ৷ তথাপিতো মানি মানি লৈছো ৷ কাৰণ এই অঞ্চলসমূহ শান্তিপূৰ্ণভাবে থাকিব লাগে ৷ কিন্তু তাৰ পিচতো কিয় বাৰে বাৰে কোচ ৰাজবংশী জনগোষ্ঠীটোক লক্ষ্য কৰি লোৱা হয়  ? বিদ্যাপুৰৰ ৰাজবাৰীক বড়োৰ ৰজাৰ বুলি উল্লেখ কৰাৰ উদাহৰণ আছে ৷ শেহতীয়াকৈ কোচ ৰাজবংশৰ ইতিহাস জড়িত ৰূপসী বিমানবন্দৰৰ নাম সলনি কৰিব বিচৰাটো সঁচাকৈ দুখজনক কথা ৷ সংবাদ মেলত সভাপতি বৰ্মনে সংবাদ মেলৰ পূৰ্বে ৰূপসী বিমানবন্দৰৰ নাম গুৰু কালিচৰণ ব্ৰহ্ম নামকৰণৰ বিৰোধিতা কৰি বঙাইগাঁও জিলাৰ আয়ুক্তৰ জৰিয়তে মুখ্যমন্ত্ৰীলৈ এখন স্মাৰক পত্ৰ প্ৰদান কৰাৰ কথাও উল্লেখ কৰে ৷ আক্ৰাছুৰ সভাপতিগৰাকীয়ে কয় যে দ্বিতীয় বিশ্বযুদ্ধৰ পিচত এই অঞ্চলটো সুৰক্ষাৰ বাবে বৃটিছে যেতিয়া শাসন কৰিছিল তেতিয়া জমিদাৰ যতীন্দ্ৰ নাৰায়ণ চৌধুৰীয়ে বিমানবন্দৰৰ বাবে চাহ বাগানৰ ৩৫০০ বিঘা মাটি দান দিছিল ৷ সেই স্থানত নিৰ্মিত বিমানবন্দৰটোৰ নাম বৃটিছে তেওঁৰ পত্নী ৰূপসী দেৱীৰ নামেৰে নামকৰণ কছিল ৷ বৰ্তমান ইয়াৰ প্ৰায় ১১৫০ বিঘা মাটি কালি আছে ৷ গতিকে বড়ো সমাজে যদি প্ৰকৃতাৰ্থত কালিচৰণ ব্ৰহ্মক সন্মান দিব বিচাৰে তেন্তে তেওঁক কোকৰাঝাৰ বা যিবিলাক বড়ো জনগোষ্ঠীৰ অঞ্চল আছে তাতে দিব পাৰে ৷ চিকিৎসা মহাবিদ্যালয়খন তেওঁৰ নামত নামকৰণ কৰিব পাৰে ৷ চিআইটিৰ নামকৰণ কৰিব পাৰে ৷ তাকে নকৰি এই ব্যক্তিসকলক বিতৰ্কলৈ আনি অপমান কৰাটো লজ্বাজনক আৰু দুখজনক কথা হৈছে ৷ ইয়াৰ বাবে বিটিচিৰ মুখ্য কাৰ্যবাহী সদস্য প্ৰমোদ বড়োৰ লগতে বড়ো জনগোষ্ঠীৰ বুদ্ধিজীৱি সকলোকো ধিক্কাৰ জনায় ৷লগতে এনে ব্যক্তিসকলক অপমান নকৰিবলৈকো আহ্বান জনায় ৷ ৰূপসী অঞ্চলটো কোচ ৰাজবংশীসকলৰ এটা ইতিহাস প্ৰতিদ্ধ ঠাই ৷ গতিকে এনে এটা সিদ্ধান্ত যে কোচ ৰাজবংশীসকলে কেতিয়াও মানি নলয় সেয়া চৰকাৰ তথা সকলোৱে জানে ৷ কেৱল এটা বিতৰ্ক তথা তেনে ব্যক্তিক অপমান কৰাৰ কাৰণে কালিচৰণ ব্ৰহ্মৰ নামটো উপস্থাপন কৰা হৈছে ৷ সেয়ে চৰকাৰে যদি এই সিদ্ধান্ত সলনি নকৰে তেতিয়াহলে জংগী আন্দোলন গঢ়ি তোলাৰো হুংকাৰ দিয়ে ৷ 

সভাপতি বৰ্মনে কয় যে কোচ ৰাজবংশীসকলৰ উদাৰতা তথা সৰলতাক দুৰ্বলতা বুলি নেভাবিব ৷ কোচ ৰাজবংশীসকলে অসম আন্দোলনকে ধৰি সকলোতে সহযোগ কৰি আহিছে ৷ কিন্তু প্ৰতিটো ক্ষেত্ৰতে জনগোষ্ঠীটোক হেয় প্ৰতিপন্ন কৰা হয় ৷ গতিকে চৰকাৰৰ এই সিদ্ধান্তক কেতিয়াও মানি নলও ৷  আমি কোচ ৰাজবংশী জনগোষ্ঠীৰ স্বাভিমানক আঘাত হনা কাৰ্যৰ বিৰুদ্ধে সদায় মাত মাতি যাম ৷ ইপিনে মুখ্যমন্ত্ৰীলৈ প্ৰেৰণ কৰা স্মাৰক পত্ৰত সংগঠনটোৰ নেতৃত্বই  উল্লেখ  কৰে যে ৰূপসী অঞ্চলৰ জনিদাৰ যতীন্দ্র নাৰায়ণ চৌধুৰীয়ে ৩৫০০ বিঘা চাহ বাগান দ্বিতীয় বিশ্ব যুদ্ধৰ সময় খিনিত ( সম্ভৱত ১৯২৭-২৮ চন) তেতিয়াৰ বৃৃৃটিছ শাসিত চৰকাৰখনক দান হিচাপে প্রদানেৰে আমেৰিকান কোম্পানী এটাৰ যোগে প্রায় ন বছৰৰ মূৰত ১৯৩৮ চনত এয়াৰষ্ট্ৰিপ তথা এয়ান ফিল্ড বনায়। ইয়াৰ দৈর্ঘ্য আছিল ১.৯ কিলোমিটাৰ। মূলতঃ যুদ্ধৰ বাবে নির্মিত এই বিমান বন্দৰ স্বাধীনতাৰ পৰৱর্তী সময়ত সৰু সৰু বিমান কলিকতা লৈ চলাচল হৈছিল। কিন্তু ১৯৮৫ চনত সম্পূর্ণ ৰূপে বন্ধ যৈ পৰিছিল। বর্তমানে ইয়াৰ প্রায় ১১৫০ বিঘা মাটি কালি আছে। তাহানিতে কোচ ৰাজবংশৰ জমিদাৰৰ পৰা হস্তান্তৰ যোগে মাটি খিনি লৈ এই অঞ্চলত বনোৱা বিমানবন্দৰটো বৃটিছে আনুষ্ঠানিকভাৱে জমিদাৰ যতীন্দ্র নাৰায়ণ চৌধুৰীৰ পত্নী ৰূপসী দেৱীৰ নামত 'ৰূপসী' বিমান বন্দৰ' নামেৰে তেতিয়াৰ গৃহমন্ত্রী চৰ্দাৰ বল্লভ ভাই পেটেলৰ সৈতে হোৱা মার্জাৰ চুক্তি ( Marzar Agreement) অনুসৰি নামাংকিত কৰিছিল, সেই হেতুকে ঐতিহাসিক কোচ কমতাপুৰ ৰাজ্য, ৰূপসী অঞ্চলৰ জমিদাৰ তথা কোচ ৰাজবংশী জনগোষ্ঠীৰ আত্মসম্মানৰ প্ৰতি লক্ষ্য ৰাখি এই বিমান বন্দৰৰ নামাকৰণ কালিচৰণ ব্রহ্মৰ নামত নহৈ সেই অঞ্চলৰ কোচ ৰাজবংশী সকলৰ এজন সম্ভ্রান্ত ব্যক্তিৰ নামত সম্মান জ্ঞাপনেৰে নামাংকিত কৰিলে কোচ ৰাজবংশী সকল কৃতাৰ্থ হ'ব। অন্যথা, কালিচৰণ ব্ৰহ্মৰ নামত গৃহীত হলে কোচ ৰাজবংশী জনগোষ্ঠীটোকে চৰম অপমান কৰা হ'ব। ৰূপসী অঞ্চলৰ সামাজিক, সাংস্কৃতিক, অর্থনৈতিক, ৰাজনৈতিক আৰু শৈক্ষিক উত্তৰণৰ ক্ষেত্ৰত ৰূপসী বিমান বন্দৰৰ অৱদান সদায় বহন হৈ আছে। সেয়ে এই বিমানবন্দৰৰ নামকৰণ প্ৰস্তাৱিত কালিচৰণ ব্রহ্মৰ নামত গৃহীত নকৰিবলৈ অনুৰোধ জনাইছে ৷ সংবাদ মেলত সংগঠনটোৰ সাধাৰণ সম্পাদক আদিকে ধৰি কেইবাজনো বিষয়ববীয়াও উপস্থিত আছিল ৷