🔯বঙাইগাঁৱত জিলা আক্রাছুৰ সংবাদমেল🔯

🔯বঙাইগাঁৱত জিলা আক্রাছুৰ সংবাদমেল🔯

স্মাৰ্ট মিটাৰ সমূহে ধীৰে ধীৰে গ্ৰাহক সকলক বিষপাণ কৰোৱাই আছে

৩০ ছেপ্টেম্বৰৰ ভিতৰত এপিডিচিএল কর্তৃপক্ষক স্মাৰ্ট মিটাৰ সমূহ আঁতৰাই পূৰ্বৰ দৰে মিটাৰ স্থাপন কৰাৰ দাবী

বৰপেটাহৈ গুৱাহাটীলৈ যোৱা ৰাষ্ট্ৰীয় ঘাইপথটো 'ৰাণী অভয়েশ্বৰী পথ' হিচাপে নামাকৰণ কৰাৰ দাবী

N4B:বঙাইগাঁওঃ ৮ ছেপ্টেম্বৰঃ বঙাইগাঁও জিলা কোচ ৰাজবংশী ছাত্ৰ সন্থাই জনগোষ্ঠীটোৰ বিভিন্ন দাবীৰ সমর্থনত আন্দোলন কৰি অহাৰ উপৰিও কোচ ৰাজবংশী কলা -কৃষ্টি, সংস্কৃতি, সমাজ সংস্কাৰ, স্থানীয় উন্নয়ন আদি বিভিন্ন বিষয়ৰ ওপৰত সদা সৰ্বদা গুৰুত্ব আৰোপ কৰি আহিছে ৷ আনকি অসংগঠিত শ্ৰমিক সকলক সংগঠিত কৰাৰ ক্ষেত্ৰতো বঙাইগাঁও জিলা কোচ ৰাজবংশী ছাত্ৰ সন্থাই আগভাগলৈ সেইসকল শ্ৰমিকক ক্ৰমাগতভাৱে সংগঠিত কৰিবলৈ চেষ্টা অব্যাহত ৰাখিছে। এই প্ৰচেষ্টা কমতাপুৰ স্বায়ত্তশাসিত পৰিষদৰ ভিতৰত বিশেষকৈ বঙাইগাঁও জিলাত ভৱিষ্যতেও অব্যাহত থাকিব ৷ এই মন্তব্য কৰিছে বঙাইগাঁও জিলা কোচ ৰাজবংশী ছাত্ৰ সন্থাৰ সভাপতি সঞ্জীৱ কুমাৰ ৰায়ে ৷ বঙাইগাঁও চহৰৰ শ্বহীদ বেদীস্থিত আক্রাছুৰ মুখ্য কার্যালয়ত দেওবাৰে আয়োজিত এক সংবাদ মেলত জিলা সভাপতি ৰায়ে লগতে কয় যে আমাৰ ঐতিহাসিক বৰেণ্য লোক সকলৰ স্মৃতি ৰক্ষাৰ্থে বিভিন্ন কাৰ্যব্যৱস্থা হাতত লোৱাৰ অংশহিচাপে চাপাগুৰিৰ পৰা বঙাইগাঁও চহৰৰ সোঁমাজেদি যোৱা ২ নম্বৰ ৰাজ্যিক পথটোক বিশ্ব মহাবীৰ চিলাৰায়ৰ নামত উচৰ্গা কৰি এই পথটোক ইতিমধ্যে " বীৰ চিলাৰায় পথ"  হিচাবে নতুনকৈ নামাকৰণ কৰিবলৈ বিভাগীয় কর্তৃপক্ষক বাধ্য কৰিছোঁ। কিন্তু পথৰ দুয়োপিনে থকা দোকান পোহাৰ, অনুষ্ঠান -প্ৰতিষ্ঠান , বিদ্যালয় - মহাবিদ্যালয় আদিয়ে নিজৰ নিজৰ নাম ফলকসমূহৰ সংশোধন ঘটাই নতুনকৈ নাম ফলক  আঁৰি দিয়া নাই। এই সম্পৰ্কত বঙাইগাঁও জিলা প্ৰশাসন আৰু পৌৰপ্ৰশাসনক বিহীত ব্যৱস্থা ল'বলৈ বাৰে বাৰে সংগঠনৰ তৰফৰ পৰা পত্ৰ প্ৰেৰণ অথবা স্মাৰক পত্ৰ প্ৰদান কৰি আহিছে। বঙাইগাঁও পৌৰসভা কৰ্তৃপক্ষই কিছু প্ৰচেষ্টা হাতত ললেও ইয়াৰ পূৰ্ণ কাৰ্যকাৰিতা হৈ উঠা নাই। সেয়ে অহা ১৫ চেপ্টেম্বৰৰ ভিতৰত সংশ্লিষ্ট দোকান পোহাৰ, অনুষ্ঠান -প্ৰতিষ্ঠান আদিক ব্যৱস্থা ল'বলৈ সংবাদ মেল যোগে সকলো লৈকে আহ্বান জনায় ৷ অন্যথায় কিবা অশুভ পৰিস্থিতিৰ সৃষ্টি হ'লে বঙাইগাঁও জিলা কোচ ৰাজবংশী ছাত্ৰ সন্থা দায়ী নহ'ব বুলি স্পষ্ট কৰি দিয়ে ৷ সংবাদ মেলত দেওহাটীৰ পৰা অভয়াপুৰী নগৰৰ মাজেৰে বৰপেটাহৈ গুৱাহাটীলৈ যোৱা ৰাষ্ট্ৰীয় ঘাইপথটো "ৰাণী অভয়েশ্বৰী পথ" হিচাবে নতুনকৈ নামাকৰণ কৰিবলৈ লোক নিৰ্মাণ বিভাগৰ যোগেদি অসম চৰকাৰলৈ দাবী জনায় । 

সংবাদ মেলত জিলা আক্ৰাছুৰ সভাপতিগৰাকীয়ে কয় যে বঙাইগাঁও পৌৰসভাৰ অধীনস্থ চিলাৰায় দৈনিক বজাৰত ভাৰত চৰকাৰৰ অনুদানত পৌৰ কৰ্তৃপক্ষই এটা ব্যৱসায়িক প্ৰতিষ্ঠানৰ প্ৰকাণ্ড গৃহ নিৰ্মাণ কৰি আছে আৰু এই নিৰ্মাণ কাৰ্য অতি সোনকালে সম্পূৰ্ণ কৰি বঙাইগাঁও পৌৰসভাৰ যোগেদি ৰাইজৰ ওচৰত উচৰ্গা কৰিব। সেয়ে উক্ত ব্যৱসায়িক ভৱনটোত কোচ ৰাজবংশী আৰু স্থানীয় খিলঞ্জীয়া জনগোষ্ঠীৰ লোকৰ মাজত কমেও ৮০ শতাংশ সংৰক্ষণ কৰি আবন্টন দিবলৈ সংশ্লিষ্ট কৰ্তৃপক্ষক দাবী জনায় ৷ আনহাতে বৰ্তমান সমগ্র অসমতে এপিডিচিএলৰ দ্বাৰা  গ্ৰাহকৰ ঘৰে ঘৰে সংস্থাপিত স্মাৰ্ট মিটাৰৰ বিসংগতিৰ বিষয়ে তীব্ৰ জনমত গঢ়ি উঠাৰ বিষয়টো উত্থাপন কৰি কয় যে এই স্মাৰ্ট মিটাৰ সমূহে "ধীৰে ধীৰে গ্ৰাহক সকলক বিষপাণ কৰোৱাই আছে আৰু  গ্ৰাহকে প্ৰতি মাহত পূৰ্বতকৈ প্ৰায় দুগুণ বিলৰ ধন আদায় দিবলগা হৈছে। সেয়ে, অহা ৩০ ছেপ্টেম্বৰৰ ভিতৰত এপিডিচিএল কর্তৃপক্ষকক স্মাৰ্ট মিটাৰ সমূহ আঁতৰাই পূৰ্বৰ দৰে উপযুক্ত মিটাৰ স্থাপন কৰিবলৈ ছাত্র সংগঠনটোৱে দাবী উত্থাপন কৰে ৷ অন্যথা অক্টোৱৰৰ প্ৰথম সপ্তাহৰ পৰা গ্ৰাহকৰ ঘৰে ঘৰে গৈ স্মাৰ্ট মিটাৰ সমূহ খুলি পেলোৱা হ'ব বুলিও হুমকি দিয়ে ৷ এই ক্ষেত্রত গ্ৰাহক ৰাইজক সহযোগ কৰিবলৈও আহ্বান জনায়। সংবাদ মেলত জিলা আক্ৰাছুৰ কেইবাগৰাকী বিষয়ববীয়াও উপস্থিত আছিল ৷