১০ মাৰ্চত বঙাইগাঁৱত ৰাষ্ট্ৰীয় পলিঅ’ প্ৰতিষেধক অভিযান

১০ মাৰ্চত বঙাইগাঁৱত ৰাষ্ট্ৰীয় পলিঅ’ প্ৰতিষেধক অভিযান

বঙাইগাঁওঃ ৮ মাৰ্চঃ

অহা ১০ মাৰ্চত সমগ্ৰ বঙাইগাঁও জিলাত ৰাষ্ট্ৰীয় পলিঅ’ প্ৰতিষেধক অভিযান পালন কৰা হ’ব৷ ইয়াৰ অধীনত ৫ বছৰৰ তলৰ সকলো শিশুক পলিঅ’ প্ৰতিষেধক প্ৰদান কৰা হ’ব ৷  এই প্ৰতিষেধক জন্ম হওঁতেই দিয়া প্ৰতিষেধকৰ অতিৰিক্তভাৱে দিব লাগিব ৷ এই অভিযানত নিৰ্দিষ্ট প্ৰতিষেধক কেন্দ্ৰৰ লগতে ঘৰে ঘৰে গৈও প্ৰতিষেধক প্ৰদান কৰা হ’ব ৷ বস্তি অঞ্চলত প্ৰতিষেধক প্ৰদানৰ বাবে ভ্ৰাম্যমান গোট গঠন কৰা হ’ব ৷ জিলাখনৰ মুঠ ৪৮৭ টা বুথ আৰু ২২ টা ট্ৰেনজিট পইণ্টযোগে  এই প্ৰতিষেধক প্ৰদান কৰা হ'ব ৷ 

বঙাইগাঁৱৰ যুটীয়া স্বাস্থ্য সেৱা সঞ্চালক ডাঃ ৰত্ন বসুমতাৰীয়ে আজি এক সংবাদমেলত এই কথা প্ৰকাশ কৰে ৷ যুটীয়া স্বাস্থ্য সেৱা সঞ্চালকগৰাকীৰ কাৰ্যালয় কক্ষত অনুষ্ঠিত সংবাদ মেলত সঞ্চালকগৰাকীয়ে কয় যে  বিশেষভাৱে প্ৰশিক্ষণপ্ৰাপ্ত স্বাস্থ্যকৰ্মীয়ে শিশুসকলক এই প্ৰতিষেধক প্ৰদান কৰিব ৷ এই প্ৰতিষেধককলৈ শংকিত নহ’বলৈকো অভিভাৱকসকলক আহ্বান জনাইছে স্বাস্থ্য বিভাগে ৷ সংবাদ মেলত মুখ্য চিকিৎসা আৰু স্বাস্থ্য বিষয়া ডাঃ ভূপেন বৈশ্য, জিলা তথ্য আৰু জনসংযোগ বিষয়া বিনুৰাণী ৰাজবংশী, জ্যেষ্ঠ চিকিৎসা বিষয়া ডাঃ  ভাস্কৰ মেধি, ডাঃ দেৱানন্দ বণিক্য  ডি এম ই পম্পী কলিতা আদি উপস্থিত থাকে ৷