বঙাইগাঁৱত জ্ঞান মেলা

                       বঙাইগাঁৱত জ্ঞান মেলা 

                      বঙাইগাঁওঃ ২৮ ফেব্ৰুৱাৰীঃ 

ৰাষ্ট্ৰীয় আবিস্কাৰ অভিযানৰ অধীনত আজি বঙাইগাঁও জিলা সৰ্ব শিক্ষা অভিযান মিছনে জিলা ভিত্তিত এদিনীয়া কাৰ্যসূচীৰে জ্ঞান মেলা অনুষ্ঠিত কৰে ৷ বঙাইগাঁৱৰ জিলা শিক্ষা আৰু প্ৰশিক্ষণ প্ৰতিষ্ঠান ( ডায়েট)ৰ চৌহদত অনুষ্ঠিত কৰা এই জ্ঞান মেলা অনুষ্ঠানৰ দ্বাৰ মুকলি কৰে বঙাইগাঁও জিলাৰ জিলা উন্নয়ন আয়ুক্ত চন্দ্ৰা দেৱীয়ে ৷ লগতে উক্ত অনুষ্ঠানত জিলা শিক্ষা আৰু প্ৰশিক্ষণ প্ৰতিষ্ঠানৰ অধ্যক্ষ গৌৰী শংকৰ শৰ্মা উপস্থিত থাকে ৷ সেইদৰে বিজ্ঞান আৰু গণিত প্ৰকল্পৰ বিচাৰক হিচাপে উপস্থিত থাকে বঙাইগাঁও বীৰঝৰা মহাবিদ্যালয়ৰ উদ্ভিদ বিজ্ঞান বিভাগৰ অধ্যাপিকা ড৹ ৰাণু ৰায় আৰু বঙাইগাঁও জিলা শিক্ষা আৰু প্ৰশিক্ষণ প্ৰতিষ্ঠানৰ অধ্যাপক ৰূপনাথ দাস ৷ ইপিনে জিলা উন্নয়ন আয়ুক্ত চন্দ্ৰা দেৱীয়ে নিজৰ বক্তব্যত ছাত্ৰ - ছাত্ৰীসকলৰ পাঠ ভিত্তিক শিক্ষাৰ লগতে বিজ্ঞান আৰু অংক অধিক ফলপ্ৰসূভাৱে আমাৰ জীৱনত কেনেদৰে ব্যৱহাৰ কৰি লাভাম্বিত হ'ব পাৰি তাৰ ওপৰত আলোকপাত কৰে ৷ লগতে ছাত্ৰ - ছাত্ৰীক সঠিকভাৱে সঠিক পথত আগুৱাই যোৱাৰ বাবে সদা সতৰ্ক প্ৰহৰী হিচাপে থকা শিক্ষক- শিক্ষয়িত্ৰীসকলক তেওঁলোকৰ জ্ঞানেৰে উদ্বুদ্ধ কৰাৰ বাবে আহ্বান জনায় ৷

 আনহাতে ডায়টৰ অধ্যক্ষ শৰ্মাই তেৱঁৰ বক্তব্যত কয় যে আমি পুৱা শুই উঠাৰ পৰা নিশা শুবলৈ যোৱালৈকে যিবিলাক সামগ্ৰী দৈনন্দিন জীৱনত ব্যৱহাৰ কৰো সেই সকলোবোৰেই বিজ্ঞানৰ অৱদান ৷ গতিকে বিজ্ঞান আৰু গণিতক অধিক ব্যৱহাৰিক কৰিলে আমি অধিক লাভাম্বিত হ'ম ৷ ইপিনে আবেলি অনুষ্ঠিত হয় বঁটা বিতৰণী সভা ৷ ডায়েটৰ অধ্যক্ষ গৌৰী শংকৰ শৰ্মাই সভাপতিত্ব কৰা বঁটা বিতৰণী সভাত প্ৰকল্পৰ অন্যতম পৰ্যবেক্ষক তথা ডায়েটৰ অধ্যাপক ৰূপনাথ দাসে ছাত্ৰ - ছাত্ৰীসকলে উপস্থাপন কৰা প্ৰকল্পসমূহৰ ওপৰত সন্তুষ্টি প্ৰকাশ কৰে ৷ লগতে তেওঁ প্ৰকল্পসমূহত ছাত্ৰ - ছাত্ৰীসকলক নিজকে অধিক নিয়োজিত কৰিবলৈ পৰামৰ্শ দিয়ে ৷ এইক্ষেত্ৰত বিদ্যালয়ৰ শিক্ষকে ভৱিষ্যতে আৰু অধিক সহায় কৰিব বুলি আশা প্ৰকাশ কৰে ৷ সভাত জিলা প্ৰাথমিক শিক্ষা বিষয়া আমীৰ হুছেইনে মুখ্য অতিথি হিচাপে উপস্থিত থাকি বক্তব্য ৰাখে ৷ 

ইয়াৰ পিচতে জ্ঞান মেলাত অংশ গ্ৰহণ কৰি বঁটা লাভ কৰা ছাত্ৰ - ছাত্ৰীসকলক বঁটা প্ৰদান কৰা হয় ৷ জ্ঞান মেলাত প্ৰকল্প প্ৰতিযোগিতাত  পঞ্চগাঁও হাইস্কুলে প্ৰথম স্থান, পঞ্চপুৰ এম ই স্কুলে দ্বিতীয় স্থান আৰু দেওহাটী মজলীয়া বিদ্যালয়ে তৃতীয় স্থান লাভ কৰে ৷ সেইদৰে কুইজ প্ৰতিযোগিতাত পঞ্চপুৰ এম ই স্কুলে প্ৰথম আৰু চাপৰাকাটা - পোপৰাগাঁও হাইস্কুলে দ্বিতীয় স্থান লাভ কৰে ৷ জিলা ভিত্তিত অনুষ্ঠিত এই জ্ঞান মেলাত অংশ গ্ৰহণ কৰা সকলো প্ৰতিযোগিকে মানপ্ৰত্ৰ প্ৰদান কৰা হয় ৷ অনুষ্ঠানত বঙাইগাঁও জিলাৰ বিদ্যালয়সমূহৰ পৰিদৰ্শক ছাদুল্লা খান, জিলা প্ৰকল্প বিষয়া কীৰ্তি গোস্বামীৰ লগতে সৰ্বশিক্ষা মিছনৰ সকলো বিষয়ববীয়া উপস্থিত থাকে ৷