বঙাইগাঁৱত অনুষ্ঠিত উত্তৰ পূব হৰিদেৱ সংঘৰ অধিৱেশনৰ সামৰণী

বঙাইগাঁৱত অনুষ্ঠিত উত্তৰ পূব হৰিদেৱ সংঘৰ অধিৱেশনৰ সামৰণী 

নতুন সমিতি গঠন 

                          বঙাইগাঁওঃ ১০ মাৰ্চঃ 

'আজি মানুহৰ মন বস্তুবাদী হৈ পৰিছে ৷ যাৰ বাবে সমাজখনক সামাজিক অস্থিৰতাই গ্ৰাস কৰিছে ৷ এই ক্ষেত্ৰত মহাপুৰুষ শ্ৰী শ্ৰী হৰিদেৱৰ আদৰ্শ সৰোগত কৰি আগবাঢ়ি গলেহে এই সামাজিক অস্থিৰতাসমূহ নোহোৱা হ'ব ৷' এই ভাষ্য দেৰগাঁৱৰ ন গোঁসাই সত্ৰৰ সত্ৰাধিকাৰ ৰোহিনী বল্লভ দেৱ গোস্বামীৰ ৷ আজি  উত্তৰ পূব ভাৰত হৰিদেৱ সংঘৰ ৪২ সংখ্যক অধিবেশনৰ অন্তিম দিনা অনুষ্ঠিত মুকলি সভাত উপস্থিত থাকি সত্ৰাধিকাৰ গৰাকীয়ে এইদৰে কয় ৷ 

উল্লেখ্য যে বঙাইগাঁৱৰ দোলাইগাঁওস্থিত উত্তৰ বঙাইগাঁও হাইস্কুল খেল পথাৰৰ মহাপুৰুষ শ্ৰী শ্ৰী হৰিদেৱ ক্ষেত্ৰত আঠ মাৰ্চৰ পৰা  তিনিদিনীয়া কাৰ্যসূচীৰে অনুষ্ঠিত উত্তৰ পূব ভাৰত হৰিদেৱ সংঘৰ ৪২ সংখ্যক দ্বি-বাৰ্ষিক অধিবেশনৰ দেওবাৰে অন্তিম দিনা আবেলি সংঘৰ কাৰ্যকৰী সভাপতি কুলৰঞ্জন ভূঞাৰ সভাপতিত্বত অনুষ্ঠিত মুকলি সভাত সত্ৰাধিকাৰগৰাকীৰ লগতে কেবাগৰাকীও বিশিষ্ট ব্যক্তিয়ে ভাষণ ৰাখে ৷ সভাত সমাজসেৱিকা মৃণালিনী দেৱীয়ে কয় যে মহাপুৰুষ হৰিদেৱে  তাহানিতে পুৰুষৰ সমানে মহিলাকো সম অধিকাৰ দিছিল ৷ আনহাতে দিছপুৰ মহাবিদ্যালয়ৰ  অধ্যাপিকা ড৹ সুমিত্ৰা গোস্বামীয়ে মহাপুৰুষজনাৰ দৰ্শন সন্দৰ্ভত তত্বগধুৰ ভাষণ প্ৰদান কৰে ৷ মুকলি সভাত হৰিপুৰ আৰু পিৰলা সত্ৰৰ সত্ৰাধিকাৰ দ্বীপেন গোস্বামীয়েও ভাষণ দিয়াৰ লগতে গোবিন্দ বল্লভ গোস্বামী , সাহিত্যিক পেঞ্চনাৰ   ড৹ সত্যেন্দ্ৰনাথ গোস্বামী , কান্তেশ্বৰ কলিতা , অভ্যৰ্থনা সমিতিৰ কাৰ্যকৰী সভাপতি বৰদা কান্ত ভাগৱতী প্ৰমূখ্যে কেইবাজনো বিশিষ্ট ব্যক্তি উপস্থিত থাকে ৷ 

মুকলি সভাত অধিৱেশন উপলক্ষে প্ৰকাশ কৰা 'হৰিদেৱ জ্যোতি ' শীৰ্ষক স্মৃতি গ্ৰন্থখন উন্মোচন কৰে বৰদৈল কান্ত ভাগৱতীয়ে ৷ সভাত শৈলেন তালুকদাৰৰ  শ্ৰীশ্ৰী হৰিদেৱ কথা গুৰু চৰিত, কুলৰঞ্জন ভূঞাৰ ' ভাগৱত তত্ব কথা আদিকে ধৰি কেবাখনো গ্ৰন্থ উন্মোচন কৰা হয় ৷ সন্ধিয়ালৈ সমুহীয়া বন্তি প্ৰজ্বলন আৰু সাংস্কৃতিক সন্ধিয়া অনুষ্ঠিত হয় ৷ ইপিনে অন্তিম দিনাৰ কাৰ্যসূচীৰ শুভাৰম্ভ হয় পুৱাৰ প্ৰসংগ আৰু গুৰু বন্দনাৰে ৷ ইয়াৰ পিছত ভাগৱত পাঠ কৰে প্ৰভাত চন্দ্ৰ নেওগে ৷ অন্তিম দিনাৰ অনুষ্ঠানৰ মূল আকৰ্ষণ আছিল অধিবেশনস্থলীৰপৰা উলিওৱা সাংস্কৃতিক শোভাযাত্ৰা ৷ সাংস্কৃতিক শোভাযাত্ৰা উদ্বোধন কৰে বিশিষ্ট সমাজ সেৱক সুবোধ চৌধুৰীয়ে  ৷ সাংস্কৃতিক শোভাযাত্ৰাত খোল বাদন, নামৰ দল, বিহু নৃত্য, বড়ো নৃত্য, ঝুমুৰ ,কোচ ৰাজবংশী আদিকে ধৰি বিভিন্ন জনগোষ্ঠীৰ সাংস্কৃতিক দলে অংশ গ্ৰহণ কৰে ৷ অধিৱেশনস্থলীৰ পৰা উলিওৱা শোভাযাত্ৰা বি অ চি গেট তথা চহৰৰ মাজেৰে পাগলাস্থানহৈ নতুন পাৰাৰে পুনৰ অধিৱেশনস্থলীত উপস্থিত হয় ৷ 

উল্লেখ্য যে এই অধিৱেশনতেই আগন্তুক ২০১৯-২১ দ্বি-বৰ্ষৰ বাবে কান্তেশ্বৰ কলিতাক সভাপতি , ৰমেশ তালুকদাৰক সম্পাদক আৰু বিমল আগৰৱালাক কোষাধ্যক্ষ হিচাপে লৈ ৪৫ জনীয়া কেন্দ্ৰীয় সমিতিখন গঠন কৰা হয় ৷ অধিবেশনৰ অন্তত উত্তৰ পূব হৰিদেৱ সংঘৰ কেন্দ্ৰীয় সমিতিয়ে অধিৱেশনখন সফলভাৱে সামৰণী পৰাত সমুহ বঙাইগাঁওবাসী ৰাইজক ধন্যবাদ জনায় ৷ লগতে দোলাইগাওঁ হৰিদেৱ সত্ৰৰ মুল স্থায়ী তোৰণখন পিতৃ প্ৰভাত চন্দ্ৰ শৰ্মা আৰু মাতৃ ধৰ্মেশ্বৰী শৰ্মাৰ সোঁৱৰণত তেওঁলোকৰ পৰিয়ালবৰ্গই প্ৰদান কৰা বাবে চাৰি পুত্ৰ মুকুন্দ নাৰায়ণ শৰ্মা , শৰত চন্দ্ৰ শৰ্মা , জয়ন্ত কুমাৰ শৰ্মা আৰু বিজয় কুমাৰ শৰ্মালৈ ধন্যবাদ জ্ঞাপন কৰে ৷