NEWS 4 BONGAIGAON

বঙাইগাঁৱত পথ দুৰ্ঘটনাত থিতাতে নিহত যুৱক 

বঙাইগাঁওঃ ৯ জুনঃ বঙাইগাওঁ সদৰ থানাৰ অন্তৰ্গত চাপৰাকাটাৰ এছ এছ বি কেম্পৰ ওচৰৰ ৰাষ্ট্ৰীয় ঘাইপথত আজি পুৱাৰ ভাগত সংঘটিত এক পথ দুৰ্ঘটনাত এজন মটৰ চাইকেল আৰোহী থিতাতে নিহত হয় ৷ নিহত যুৱকজন আনন্দী ৰায়( ৩১) বুলি চিনাক্ত কৰা হয় ৷ জানিব পৰা মতে কৃষাণ বজাৰত ভাড়া ঘৰত থকা আনন্দী ৰায়ে পুৱাৰ ভাগত নিজৰ এএছ ১৯ ই ৯০৬১ নম্বৰৰ মটৰ চাইকেলখনলৈ ৰাখালডুবিৰ দিশে গৈ থকা অৱস্থাত এছ এছ বি কেম্পৰ ওচৰৰ ৰাষ্ট্ৰীয় ঘাইপথত থকা  দলঙত এই দুৰ্ঘটনাটো সংঘটিত হয় ৷ দুৰ্ঘটনাটোত মূৰত গুৰুতৰভাৱে আঘাত পোৱাত থিতাতে নিহত হয় যুৱকজন ৷ উল্লেখ্য যে মৃতদেহটো দলংখনৰ মাজ ভাগত পৰি থকাৰ বিপৰীতে মটৰ চাইকেলখন যুৱকজনে যিটো দিশত গৈ আছিল সেই দিশে দলংখন পাৰ কৰি পৰি থকা বুলি আৰক্ষীয়ে জানিবলৈ দিছে ৷ আৰক্ষীয়ে যুৱকজনৰ মটৰ চাইকেলত কোনো বাহনে খুন্দিয়াই থৈ যোৱাৰ ফলতে দুৰ্ঘটনাটো সংঘটিত হোৱা বুলি সন্দেহ প্ৰকাশ কৰাৰ লগতে ঘটনাৰ তদন্ত অব্যাহত ৰাখিছে ৷ দুৰ্ঘটনাৰ পিছতে মৃতদেহটো উদ্ধাৰ কৰি বঙাইগাঁও অসামৰিক চিকিৎসালয়ত মৰণোত্তৰ পৰীক্ষা সম্পন্ন  কৰাৰ পাছত পৰিয়ালৰ লোকক গটাই দিয়া হয় ৷ উল্লেখ্য যে মৃত আনন্দী ৰায়ৰ পৰিয়ালৰ বাকী সদস্যসকল বঙাইগাঁও চহৰৰ পাগলাস্থানস্থিত আৰ পি এফ কলনীৰ ওচৰত থকাৰ বিপৰীতে আনন্দী ৰায়ে নিজৰ পত্নী আৰু এটি সন্তানকলৈ কৃষাণ বজাৰত ভাড়া ঘৰত থাকি সৰু সুৰা ব্যৱসায় কৰিছিল ৷ দুৰ্ঘটনাটো পুৱা দহ মান বজাত সংঘটিত হয় বুলি জানিব পৰা গৈছে ৷