NEWS 4 BONGAIGAON

🔯বঙাইগাঁৱত লক্ ডাউন উলংঘাঃ

👉গো মাংস বিক্ৰী কৰাকলৈ উত্তেজনা👉তিনিজনক আটক

বঙাইগাঁওঃ২৯ মাৰ্চঃ

 মহামাৰী কৰ'না ভাইৰাছৰ সংক্ৰমণ প্ৰতিৰোধৰ বাবে দেশজুৰি চলি থকা লক্ ডাউনৰ লগতে বঙাইগাঁওজিলাত ১৪৪ ধাৰা চলি থকাৰ মাজতে আজি বঙাইগাঁৱৰ দোলাইগাঁৱত একাংশ লোকে লক্ ডাউন উলংঘা কৰি গো মাংস  কাটি বিক্ৰী কৰাকলৈ স্থানীয় ৰাইজৰ মাজত উত্তেজনাময় পৰিস্থিতিৰ সৃষ্টি হয় ৷ উল্লেখ্য যে শনিবাৰে বঙাইগাঁৱৰ নিউ বঙাইগাঁও ভাওলাগুৰিৰ বৌদি বজাৰত একাংশ লোকে লক্ ডাউন উলংঘা কৰি দোকান - পোহাৰ খোলাত আৰক্ষীয়ে বন্ধ কৰি দিয়াত আৰক্ষীক শিলগুটিৰে আক্ৰমণ কৰি পৰিস্থিতি উত্তপ্ত কৰি তোলাত পৰিস্থিতি নিয়ন্ত্ৰণৰ বাবে শেষত আৰক্ষীয়ে শূন্যলৈ গুলিচালনা কৰিবলগীয়া হৈছিল যদিও এই ঘটনাৰ পিছতো গা লৰা নাই একাংশ লোকৰ ৷ ফলত শনিবাৰৰ ঘটনা সংঘটিত হোৱা স্থানৰ কিছু নিলগতে পুনৰ আজি লক্ ডাউন উলংঘা কৰে একাংশ লোকে ৷ জানিব পৰা মতে বঙাইগাঁও চহৰৰ উত্তৰ বঙাইগাঁও আৰক্ষী পহৰা চকীৰ অন্তৰ্গত দোলাইগাঁৱৰ বাহাৰুল শ্বেখ নামৰ লোকজনৰ গৃহত দিনৰ ১ মান বজাত লক্ ডাউন উলংঘা কৰি গো মাংস কাটি বিক্ৰী কৰি থকাত লোকৰ সমাগম হয় ৷ পিছত স্থানীয় লোকে জানিব পাৰে আৰু বিষয়টোকলৈ উত্তেজনাময় পৰিস্থিতিৰ সৃষ্টি হয় ৷ স্থানীয় লোক উক্ত ঠাইত উপস্থিত হয় আৰু এই কাৰ্যত জড়িতসকলক কৰায়ত্ত কৰাৰ চেষ্টা চলায় যদিও ইতিমধ্যে গৃহটোৰ গৰাকী বাহাৰুল শ্বেখসহ লোকসকল পলায়ণ কৰিছিল ৷ স্থানীয় লোকে বিষয়টো সন্দৰ্ভত  আৰক্ষীক খবৰ দিয়াত আৰক্ষী আৰু চি আৰ পি এফৰ দল উপস্থিত হোৱাতহে পৰিস্থিতি ক্ষান্ত হয় ৷

আনহাতে স্থানীয় লোকে বাকীসকলক কৰায়ত্ত কৰিব নোৱাৰিলেও বাহাৰুল শ্বেখৰ পত্নী আৰু নজৰুল হক নামৰ এজক আটক কৰি ৰাখে আৰু ঘটনাস্থলীত উপস্থিত হোৱা আৰক্ষীক গোটাই দিয়ে ৷ আৰক্ষীয়ে কিছু গো মাংস আদিও জব্দ কৰে ৷ ঘটনাস্থলীত জিলাৰ আৰক্ষী অধীক্ষক সিংহৰাম মিলি, কাৰ্যবাহী দণ্ডাধীশ ৰিন্টু বড়ো আদি উপস্থিত হৈ পৰিস্থিতিৰ বুজ লয় ৷ ইপিনে বিষয়টো সন্দৰ্ভত জিলাৰ আৰক্ষী অধীক্ষক সিংহৰাম মিলিয়ে সংবাদ মাধ্যমক জানিবলৈ দি কয় যে বাহাৰুল শ্বেখ নামৰ লোক এজন ঘৰত গো মাংস কাটি বিক্ৰী কৰাত লোকৰ সমাগম হোৱাৰ খবৰ পাই আৰক্ষী উপস্থিত হয় যদিও বাহাৰুল শ্বেখসহ লোকসকলে পলায়ণ কৰে ৷ কিন্তু ঘৰটোৰ মালিক বাহাৰুল শ্বেখৰ পত্নী আৰু মাংস কিনিবলৈ অহা এজনক আটক কৰিছো ৷ লক্ ডাউন চলি থকাৰ পিছত লক্ ডাউন উলংঘা কৰাসকলৰ বিৰুদ্ধে আইনী ব্যৱস্থা গ্ৰহণ কৰা হ'ব ৷ লগতে পলাতক হৈ থকাসকলকো কৰায়ত্ত কৰা হ'ব ৷ আৰক্ষী অধীক্ষকগৰাকীয়ে ঘটনাস্থলীৰ পৰা এ এচ ১৯চি ৪১৫১ নম্বৰৰ এখন টেম্প'ও জব্দ কৰা বুলি কৈ টেম্প'খনেৰে গৰুটো আনিছিল বুলি সন্দেহ প্ৰকাশ কৰে ৷ আনহাতে আৰক্ষীয়ে পিছত চাহাবুদ্দিন নামৰ এজন লোককো আটক কৰে ৷ বৰ্তমানলৈকে আৰক্ষীয়ে তিনিজনক আটক #কৰিছে ৷